ہیئر اسٹائل اگرچہ سنگھار کی ہی ایک قسم ہے لیکن یہ مرحلہ برائیڈل ملبوسات اور زیورات کی طرح خاص اہمیت رکھتا ہے۔

ہیئر اسٹائل اگرچہ سنگھار کی ہی ایک قسم ہے لیکن یہ مرحلہ برائیڈل ملبوسات اور زیورات کی طرح خاص اہمیت رکھتا ہے۔ اگر آپ بھی چاہتی ہیں کہ شادی کے دن سب سے خوبصورت اور منفرد نظر آئیں تو ہیئر اسٹائل کے انتخاب کے لئے مکمل طور پر میک اَپ آرٹسٹ کی پسند پر انحصار نہ کریں بلکہ اس ضمن میں چند باتوں کا خیال رکھیں۔ ذیل میں ہیئر اسٹائل کے متعلق چند باتیں بتائی جا رہی ہیں :
لمبا چہرہ

زیادہ تر ہیئر اسٹائلسٹ لمبے چہرے والی خواتین کیلئے برائیڈل ہیئر اسٹائل میں ہائی اَپ ڈو بنا دیتے ہیں، جو چہرے کو مزید لمبا دکھاتی ہے۔ چہرے کی ایسی ساخت پر ہیئر اسٹائلنگ کیلئے اُونچے بال بنانے سے گریز کرنا چاہئے۔ اسی طرح فلیٹ ہیئر اسٹائل اپنانے کے بجائے لو بن اور ویوی لک اس ساخت پر ایک بہترین ہیئر اسٹائل ثابت ہوگا۔ 
گول چہرہ

اگر آپ کے چہرے کی ساخت گول ہے تو ہیئراسٹائلسٹ ایسی دلہنوں کے لئے افقی رُخ جاتا ہوا ہیئر اسٹائل اپنانے سے گریز کرنے کا مشورہ دیتے ہیں کیونکہ اس طرح کے ہیئر اسٹائل میں آپ کا چہرہ مزید گول اور چوڑا محسوس ہوتا ہے۔ گول چہرے کی ساخت والی خواتین کو چاہئے کہ عمودی رُخ والے ہیئر اسٹائل اپنائیں۔ اس کے علاوہ درمیانی مانگ کے بجائے سائیڈ مانگ والے ہیئر اسٹائل اپنائیں، یہ آپ کے چہرے کےحجم کو متوازن کرکے عروسی حسن بڑھانے کا سبب بنے گا۔ 
بیضوی چہرہ

چہرے کی بیضوی ساخت خوش قسمت تصور کی جاتی ہے، اس ساخت پر ہیئر اسٹائل کی تمام اقسام جچتی ہیں۔ تاہم، ہیئر اسٹائلسٹ ایسی ساخت رکھنے والی خواتین کو شادی کے خاص دن کے لئے chic and sleek اپنانے کا مشورہ دیتے ہیں۔ اگر دلہن کا قد کم ہے تو انہیں چاہئے کہ ایسے ہیئر اسٹائل کا انتخاب کریں، جو ٹاپ پر سے اونچا ہو۔ یہ ہیئر اسٹائل ان کا قد نمایاں کرنے میں اہم کردار ادا کرے گا۔ 
چوکور چہرہ
چوکور چہرے والی دلہنوں کو چاہئے کہ شادی جیسے خاص موقع کے لئے جیومیٹریکل شیپ اور اسٹرکچرڈ ہیئر اسٹائل کا انتخاب نہ کریں۔ چونکہ ان خواتین کے نقوش شارپ ہوتے ہیں، اس لئے سوفٹ سائڈ بینگ کے ہمراہ بنایا گیا ہیئر اسٹائل ان کے چہرے پر نرمی اور معصومیت پیدا کرے گا۔ چہرہ زیادہ چوڑا ہو تو راؤنڈ یا ویوی لک کے ذریعے بھی چوڑائی ختم کی جاسکتی ہے۔ 

یہ بھی پڑھئے: برائیڈل میک اَپ کے ۴؍ منفرد انداز جو آپ کی شادی کی تقریب کو خاص بنا دیں گے

چند اہم باتیں 
جس طرح شادی کی تاریخ طے ہوتے ہی دلہنیں میک اَپ آرٹسٹ کی تلاش اور ایڈوانس بکنگ شروع کردیتی ہیں، بالکل اسی طرح ہیئر اسٹائل کے نئے ٹرینڈز کی تلاش بھی کئی دن قبل شروع کردیں۔ اس سے بہت آسانی ہوجاتی ہے۔ 
دوسرے مرحلے میں یہ طے کریں کہ اس دن آپ کون سا لک اپنانا چاہتی ہیں، مثال کے طور پر کئی دلہنیں روایتی انداز جبکہ کچھ ماڈرن یا پھر کچھ منفرد اسٹائل اپنانا چاہتی ہیں۔ اس ضمن میں میک اَپ آرٹسٹ کی مدد بھی لی جاسکتی ہے۔ 
ایسے ہیئر اسٹائل کا انتخاب کریں، جسے بنوا کر آپ شادی والے دن پرسکون اور آرام دہ محسوس کریں۔ یہ نہ ہو کہ ہیئر اسٹائل آپ کے لئے پریشانی کا باعث بن جائے اور آپ کے لئے اسے سنبھالنا مشکل ہوجائے۔ 
ہیئر اسٹائل بھی شخصیت کی عکاسی کرتا ہے، آپ جس کسی بھی ہیئر اسٹائل کا انتخاب کریں، اسے شادی کے دن سے قبل ایک بار بناکر ضرور دیکھ لیں یا پھر اس سے متعلق معلومات حاصل کرلیں۔ 
برائیڈل ہیئر اسٹائل منتخب کرنے سے قبل اپنے چہرے کی ساخت کا خاص خیال رکھیں۔ دلہن کے ہیئر اسٹائل کا انتخاب کرتے وقت سب سے پہلی ترجیح چہرے کی ساخت کو دینی چاہئے، ٹرینڈز اپنانے کا مرحلہ بعد کا ہے۔ دنیا کے مشہور اور معروف ہیئراسٹائلسٹ اس حوالے سے کچھ مشورے دیتے ہیں۔