ابھی ابھی چھٹیاں ختم ہوئی ہیں اسلئے بچوں کے ساتھ ساتھ والدین کو ہر کام آرام سے کرنے کی عادت ہوگئی تھی۔ مگر اسکول کھولنے سے اچانک ان پر ذمہ داریاں آگئی ہیں۔

ابھی ابھی چھٹیاں ختم ہوئی ہیں اسلئے بچوں کے ساتھ ساتھ والدین کو ہر کام آرام سے کرنے کی عادت ہوگئی تھی۔ مگر اسکول کھولنے سے اچانک ان پر ذمہ داریاں آگئی ہیں۔ اس لئے انہیں معمول پر لوٹنے میں پریشانیاں ہورہی ہیں۔ یہاں چند باتیں بتائی جا رہی ہیں جن پر عمل کرکے آپ بچوں کو اسکول وقت پر بھیج سکتی ہیں:
وقت پر سونا: صبح بچوں کو وقت پر اسکول کیلئے تیار کرنے کیلئے ضروری ہے کہ بچے صبح جلدی اٹھیں۔ سب سے اہم مائیں وقت سے پہلے اٹھیں۔ اکثر دیکھا جاتا ہے کہ دیر سے اٹھنے کی وجہ سے گھر میں ہنگامہ کھڑا ہوجاتا ہے اور مائیں چیختی چلاتی نظر آتی ہیں۔ ایسی صورتحال پیدا نہ ہو اس لئے رات میں آپ اور بچے جلدی سو جائیں۔
اسکول بیگ کی تیاری: ٹائم ٹیبل کے حساب سے، بچے خود رات میں ہی کتابیں اور اسٹیشنری کا سارا سامان بیگ میں رکھ لیں۔ یہ بھی ان کی ذمہ داری ہوگی کہ اگر ٹیچر نے کوئی سامان منگوایا ہے تو وہ وقت رہتے گھر میں بتائیں گے۔ اس سے کئی پریشانیاں آسان ہوجائیں گی۔
ناشتہ اور ٹفن: اسکول جانے سے قبل بچوں کو ناشتہ ضرور دیں۔ ناشتے اور ٹفن کی تیاری رات میں ہی کرلیں تاکہ صبح میں کوئی دقت نہ ہو۔ خیال رہے کہ ناشتہ اور ٹفن بچوں کی پسند کا ہو۔
چیزوں کو منظم رکھنے کی عادت: لنچ باکس اور اسکول بیگ کے علاوہ دیگر سامان جیسے، جوتے موزے، پانی کی بوتل وغیرہ کو ان کی جگہ پر رکھیں تاکہ اگلے دن موزے کہاں رکھا ہے؟ کا ہنگامہ نہ ہو۔
 اِن چھوٹی چھوٹی باتوں کا خیال رکھتے ہوئے مائیں صبح کے ہنگامے سے بچ سکتی ہیں۔ اس سے ماں اور بچے، دونوں کا مزاج بھی اچھا رہے گا۔ ساتھ ہی بچہ خوشی خوشی وقت پر اسکول جائے گا۔