ہندوستانی نژادامریکی نوجوان کاروباری اَرکین گپتا کا نام فوربز انڈر۳۰؍ کی فہرست میںشامل کیا گیا ہے۔ فلوریڈا کےمیامی میں رہنے والے ارکین گپتا کو فائنانشیل اِنوویشن کے لئےیہ اعزاز دیا گیا ہے۔ اکنامک ٹائمز کی رپورٹ  کے مطابق ارکین گپتا نے مالیاتی جدت اور ابتدائی مرحلے کی سرمایہ کاری کی حکمتِ عملیوں میں اپنی نمایاں خدمات کے باعث فوربز کی۳۰؍ سال سے کم عمر کامیاب شخصیات کی فہرست میں جگہ بنا ئی ہے ۔ فوربز کے مطابق گپتا کو سالانہ فہرست میں شامل کیے جانے کی بنیادی وجوہات اُن کا ڈیٹا پر مبنی سرمایہ کاری کے فریم ورک تیار کرنے میں پیش پیش ہونا اور اسکیل ایبل مالیاتی پروڈکٹس کی تخلیق میں اُن کی نمایاں قائدانہ صلاحیت ہے۔ انہوں نے ایک بیان میں کہا کہ ’’یہ اعزاز اس بات کو مضبوط کرتا ہے کہ زیادہ ذہین مالیاتی ٹولز تک رسائی کو عام کرنا کتنا ضروری ہے۔‘‘  گپتا کا کہنا ہے کہ وہ ایسے مالیاتی حل تیار کرنے کا سلسلہ جاری رکھیں گے جوفائنانشیل ورلڈ میں شفافیت میں اضافہ کریں اور پہلی بار سرمایہ کاری کرنے والوں کو بااختیار بنائیں۔اس وقت ارکین گپتا ’سیٹاڈیل ‘ سے وابستہ ہیں اور۲؍بلین ڈالر مالیت کے لانگ شارٹ پورٹ پولیو کو سنبھالتے ہیں۔ا س سے قبل وہ مورگن اسٹینلی میں وائس پریسڈنٹ تھے۔

فوربز میگزین ۲۰۱۱ءسے فوربز لسٹ شائع کی کررہی ہے۔ ان فہرستوں میں دنیا کے ۳۰؍ سال سے کم عمر کے مختلف شعبوں میں نمایاں کارکردگی دکھانے والے۳۰؍ بااثر اور قابلِ ذکر افراد کو شامل کیا جاتا ہے۔ امریکی فہرست میں مجموعی طور پر۶۰۰؍ افراد شامل ہوتے ہیں یعنی۲۰؍ مختلف شعبوں میں ہر شعبے سے۳۰؍ افراد کا انتخاب کیا جاتا ہے۔ ایشیا اور یورپ کی فہرستوں میں۱۰؍کیٹیگریز ہوتی ہیں، جن میں کل۳۰۰؍ افراد شامل کیے جاتے ہیں، جبکہ افریقہ کے لیے صرف۳۰؍ افراد پر مشتمل ایک ہی فہرست جاری کی جاتی ہے۔ فوربز اس پروجیکٹ سے متعلق کانفرنس بھی منعقد کرتا ہے اور اپنی ویب سائٹ پر ’تھرٹی انڈر تھرٹی ‘کے نام سے ایک الگ سیکشن بھی رکھتا ہے۔