سوشل میڈیا پر آپ تفریح ​​​​اور بہت سارے فوائد سے لطف اندوز ہونے کے قابل اس لئےہیں کہ آپ کی حیثیت یہاں ایک’ پروڈکٹ‘کی ہے لیکن اس پلیٹ فارم پرذاتی تفصیلات سے متعلق محتاط رہنا بھی ضروری ہے۔

 آج کی دنیا میں سوشل میڈیا کے بغیر زندگی کا تصور نہیں کیا جا سکتا۔ یہ وہ میڈیم ہے جس کی مدد سے ہم اپنے دوستوں اور رشتہ داروں سے باخبر رہتے ہیں ۔ اس پلیٹ فارم کے ذریعےنوکریاں بھی ملتی ہیں ، شاپنگ بھی ہوتی ہے اور تفریح کے مواقع بھی ملتے ہیں ۔یہ سوشل میڈیا کا ایک اچھا پہلو ہے لیکن اس کے بہت سے مضر اثرات بھی ہیں ۔ سوشل میڈیا پر آپ تفریح ​​​​اور بہت سارے فوائد سے لطف اندوز ہونے کے قابل اس لئےہیں کہ آپ کی حیثیت وہاں ایک پروڈکٹ کی ہے۔ سوشل میڈیا کمپنیاں ہر لمحہ آپ کی پسند اور ناپسند کا اندازہ لگاتی رہتی ہیں اور آپ کا پورا’یوزر ایکسپرینس‘ اسی بنیاد پر بنایا جاتا ہے۔دھیان رہے کہ سوشل میڈیا وہ پلیٹ فارم ہے جہاں کچھ مالی فراڈ بھی آسانی سے انجام دے دیتے ہیں ۔
 اس لیے اگر آپ سوشل میڈیا کا استعمال کرتے ہوئے چند باتوں کا خیال رکھیں تو نہ صرف آپ کا ذاتی ڈیٹا محفوظ رہے گا بلکہ آپ کا تجربہ بھی بہت اچھا ہوگا۔ آئیے جانتے ہیں ٹیک ماہر ابھیشیک تیلنگ سے ایسے ہی کچھ آسان لیکن اہم طریقوں کے بارے میں :
 انٹرنیٹ پر ڈیٹا کو حذف نہیں کیا جاتا!
 ابھیشیک تیلنگ کے مطابق جو یوٹیوب پر کنٹینٹ کرئیٹر ہیں ، ایک بار جب کوئی بھی ڈیٹا انٹرنیٹ ڈائرکٹری میں داخل ہوجاتا ہے تو اسے مکمل طور پر حذف کرنا بہت مشکل ہوتا ہے۔ اس لیے سوشل میڈیا پر کبھی بھی اپنی ذاتی معلومات پوسٹ نہ کریں ۔ جیسے گھر کا پتہ، فون نمبر یا مالیاتی تفصیلات وغیرہ۔ تصاویر اور ویڈیوز شیئر کرتے وقت بھرپور احتیاط کریں ۔ایسی کوئی بھی چیز آن لائن پوسٹ نہ کریں جسے آپ ایک فیصد بھی ذاتی سمجھتے ہوں اور جس کے لیک ہونے سے آپ کو کوئی نقصان ہو سکتا ہے۔
ٹو فیکٹر آتھنٹی کیشن انیبل کریں 
 سوشل میڈیا پر۲؍ فیکٹر توثیقی سسٹم(۲؍ ایف اے)ایک حفاظتی ڈھال کی مانند ہے جسےتوڑنا آسان نہیں ہے۔ اگر یہ فعال ہےتو چاہے آپ کا پاس ورڈ ہیک ہو جائے، کوئی بھی آپ کے اکاؤنٹ تک کسی اور تصدیق کے بغیر رسائی حاصل نہیں کر سکتا۔ چاہے وہ آپ کا آئیرس اسکین ہو یا فنگر پرنٹس یا او ٹی پی، اس لیے اس سسٹم کو فعال رکھیں ۔
پرائیویسی سیٹنگ کا دھیان رکھیں 
 سوشل میڈیا پر آپ کے ذاتی ڈیٹا کی حفاظت کیلئےجوپہلا پہرےدار کھڑا ہے وہ ہے آپ کے فون اور سوشل میڈیا پلیٹ فارم پر دی گئی رازداری کی ترتیبات یعنی پرائیویسی سیٹنگ ہے۔پرائیویسی سیٹنگ وقتاً فوقتاً اَپ ڈیٹ کے بعد چیک کرتے رہیں ۔دیکھیں کہ اس پلیٹ فارم پر آپ کی پوسٹس کون دیکھتا ہے؟ آپ کے رابطوں اور دوستوں تک کس کی رسائی ہے؟ آپ کی تصاویر کون دیکھ سکتا ہے؟ اور سب سے اہم بات، کیا آپ کے مقام تک رسائی کو `Always Allow` جیسے آپشن پر منتخب تو نہیں کیا گیا؟
 دوستوں کے نمبر اور اکاؤنٹ سے متعلق بھی محتاط رہیں 
 کیونکہ آج کل ہم اتنے باشعور ہو چکے ہیں کہ ہم اجنبیوں کی طرف سے بھیجی گئی چیٹ یا لنکس سے دل بہلاتے ہی نہیں ۔ اس لیے اب ہیکروں نے دوسرا راستہ اختیار کیا ہے۔ وہ ایک دوست کا سوشل میڈیا اکاؤنٹ ہیک کرتے ہیں اور پھر آپ کا۔ یہ سب چیٹ یا ہائپر لنکس کی مدد سے ہوتا ہے۔چیٹ میں آپ سے کچھ ڈاؤن لوڈ کرنے یا کسی لنک پر کلک کرنے کو کہا جائیگا جو آپ کے `دوست نے بھیجا ہو گا۔ آپ سوچیں گے کہ آپ کے دوست نے بھیج دیا ہے، تو آپ اس پر کلک کریں گے یا ڈاؤن لوڈ کریں گے۔اس طرح آپ کو پھنسانے کی کوشش کی جائے گی۔ اس لیے اگر ذرا سا بھی شبہ ہےکہ آپ کے دوست کی سوشل میڈیا یاچیٹ پرسرگرمیاں عجیب و غریب ہیں توہوشیار ہوجائیں ۔
غیر فعال اکاؤنٹس پر نظر رکھیں 
 وقت گزرنے کے ساتھ ساتھ سوشل میڈیا پر آپ کی فرینڈ لسٹ بڑھتی جاتی ہے جن میں سے کچھ کو آپ جانتے ہیں لیکن فرینڈ لسٹ میں بہت سے لوگ ایسے ہیں جن سے آپ نہ تو ملے ہیں اور نہ ہی آپ ان سے روزانہ کی بنیاد پر بات چیت کرتے ہیں ، بہت سے لوگ غیر فعال ہیں ۔ اس لیے ایسے دوستوں کو ہر دو ماہ میں ایک بار اپنی فرینڈ لسٹ سے نکالنے کا کام کریں ۔ہیکرز پہلے ایسے غیر فعال اکاؤنٹس پر قبضہ کرتے ہیں اور پھر ان کے ذریعے آپ کے اکاؤنٹ میں گھسنے کی کوشش کرتے ہیں ۔