یہ ایک ممکنہ فہرست ہے جس میں مہاراشٹر میں پنچ گنی کے ڈیکن ٹریپس، مہابلیشور اور آندھرا پردیش کی ترومالا ہلز کے نام ہیں۔

ملک کے ۷؍ خوب  صورت تاریخی مقامات یونیسکو کی ممکنہ عالمی ثقافتی ورثہ کی فہرست  میں شامل کر لیے گئے ہیں۔ ان میں مہاراشٹر میں پنچ گنی کے ڈیکن ٹریپس ، مہابلیشور اور آندھرا پردیش کی ترومالا ہلز کے نام شامل ہیں ۔ یونیسکو میں ہندوستان کے مستقل نمائندہ وفد کے مطابق یہ۷؍ورثہ ملک کی خوشحال ثقافتی وراثت کا حصہ ہیں۔ 
 ’انڈیا ایٹ یونیسکو‘ نے سوشل میڈیا پلیٹ فارم ’ایکس‘ پر پوسٹ شیئر کرتے ہوئے لکھا، ’’یونیسکو میں ہندوستان کے مستقل نمائندہ وفد کو یہ اعلان کرتے ہوئے خوشی محسوس ہو رہی ہے کہ ہندوستان کے۷؍ مقامات کو یونیسکو کی ممکنہ عالمی ورثہ کی فہرست م شامل کر لیا گیا ہے۔‘‘’انڈیا ایٹ یونیسکو‘ کے مطابق جن مقامات کو شامل کیا گیا ہے ان میں (۱) پنچ گنی کا ڈریگن ٹریپ اور مہابلیشور (مہاراشٹر) (۲) میگھالیہ کی غاریں (مشرقی کھاسی ہلز، میگھالیہ) (۳) ناگا ہلز اوفیو لائٹ (کفائر، ناگالینڈ) (۴) ترومالا ہلز (تروپتی، آندھرا پردیش)،(۵) ورکلا (کیرالا) (۶) ایرا مٹّی ڈِبّالو (وشاکھا پٹنم)(۷) سینٹ میری آئی لینڈ کلسٹر (اوڈپی، کرناٹک) شامل ہیں۔
 اسی کے ساتھ یونیسکو کی ممکنہ عالمی ورثہ کی فہرست میں ہندوستان کے۶۹؍مقامات کے نام درج ہو چکے ہیں۔ ان میں۴۹؍ ثقافتی نوعیت  کے ہیں،۳؍ ملے جلے زمرے کے ہیں اور۱۷؍ قدرتی زمرے کےمقامات موجود ہیں۔
 یونیسکو میں ہندوستان کے مستقل نمائندہ وفد نے بتایا کہ ان مقامات کا انتخاب ہندوستان  کے قدرتی اور ثقافتی ورثہ کے تحفظ کے تئیں اس  کے  مضبوط عزم کو ظاہر کرتا ہے۔ انہوں نے اس عمل میں محکمہ آثار قدیمہ کے اہم کردار کیلئے اظہار تشکر کیا۔ بتا دیں کہ یونیسکو کی عالمی ورثہ فہرست میں کسی بھی مقام کو مستقل طور سے شامل کرنے سے پہلے اسے ٹینٹیٹیو (ممکنہ) لسٹ میں رکھا جاتا ہے۔اس سے اس مقام کی اہمیت، تحفظاتی کوششوں اور عالمی شناخت کو منظوری ملتی ہے۔