ملک کی اقتصادی راجدھانی ممبئی میں منگل کو مہا راشٹر کے وزیر گریش مہاجن کو خواتین ریزروشن کے حوالے سے منعقد بی جے پی کے مظاہرے کے دوران ایک خاتون کے غصے کا سامنا کرنا پڑا۔ دراصل ممبئی کے ورلی میں بی جے پی کے مظاہرے کی وجہ سے شدید ٹریفک جام ہو گیا تھا جس سے سیکڑوں لوگ پریشان ہو رہے تھے۔ یہ حالت دیکھ کر ایک خاتون  نےاپنی کار سے نکل کر  وزیر کو موقع پر ہی گھیر لیا اور جم کر کھری کھری سنائی۔ یہ واقعہ اس وقت ہوا جب گریش مہاجن ریلی کے دوران میڈیا سے گفتگوکر رہے تھے۔

 

 

یہ مظاہرہ اپوزیشن پارٹیوں کے خلاف منعقد کیا گیا تھا۔ مظاہرہ کے دوران ایک ناراض خاتون وزیر کے پاس پہنچی اور روڈ جام کرنے، نیز عام لوگوں کو ہو رہی پریشانیوں کو لے کر ان پر ناراضگی ظاہر کرنے لگی۔خاتون نے انتہائی برہمی کا اظہار کرتے ہوئے کہا کہ ’’یہاں سے نکل جاؤ، آپ ٹریفک جام کررہے ہو۔‘‘ خاتون نے سوال کیا کہ ریلی پاس کے کسی میدان میں کیوں نہیں کی گئی جس سے ٹریفک میں رخنہ نہیں پڑتا اور عوام پریشان نہیں ہوتے؟ اس پر وزیر گریش مہاجن نے خاتون کو سمجھانے کی کوشش کی لیکن وہ مزید ناراض ہو گئی اور تلخ انداز میں کہا کہ ’’سمجھ میں نہیں آتا کیا؟ آپ کو کیا ہو گیا ہے؟ سیکڑوں لوگ یہاں پھنسے ہوئے ہیں۔‘‘اس واقعہ کا ویڈیو سوشل میڈیا پر تیزی کے ساتھ وائرل ہو رہا ہے۔ اس ویڈیو میں دیکھا جا سکتا ہے کہ جب ایک پولیس افسر نے معاملہ سلجھانے کی کوشش کی تو خاتون اس پر بھی ناراض ہو گئی اور کسی سے بھی بات کرنے سے انکار کر دیا۔ یہ پورا واقعہ کیمرے میں قید ہو گیا جو سوشل میڈیا پر موضوع بحث بن گیا ہے اور بی جے پی کی اس سے کافی سبکی ہو رہی ہے۔