ممتا بنرجی کے بھتیجے اور پارٹی کے جنرل سیکریٹری ابھیشیک نے یہ الزام بھی لگایا کہ ریاست میں بی جے پی حکومت بنگال کو پولیس اسٹیٹ میں تبدیل کررہی ہے، کہاکہ انہیں عدلیہ پر اب بھی بھروسہ ہے لیکن کہیں سے تو آواز بلند ہونی چاہئے۔

ترنمول کانگریس کے قومی جنرل سیکریٹری اور ڈائمنڈ ہاربر سے رکن پارلیمنٹ ابھشیک بنرجی نے مغربی بنگال کی سیاست میں ایک نیا تنازع کھڑا کرتے ہوئے بی جے پی کے ساتھ ساتھ سپریم کورٹ کے کردار پر بھی سخت سوال اٹھائے ہیں۔ انہوں نے الزام لگایا کہ ریاست میں بی جے پی حکومت بنگال کو پولیس اسٹیٹ میں تبدیل کر رہی ہے۔ اس کے ساتھ ہی انہوں نے اسمبلی انتخابات میں ترنمول کانگریس کی شکست  کے لئے بی جے پی کے بجائے سپریم کورٹ کو ذمہ دار قرار دیتے ہوئے کہا کہ ان کی پارٹی بنگال کا انتخاب سپریم کورٹ کی وجہ سے ہاری ہے۔ابھیشیک بنرجی نے عدلیہ پر تنقید کرتے ہوئے یہ بھی واضح کیا کہ انہیں اب بھی عدلیہ پر اعتماد ہے اور وہ اس کا احترام کرتے ہیں لیکن اس احترام کا مطلب یہ نہیں  ہےکہ عدالتی فیصلوں اور ان کے نفاذ پر سوال نہیں اٹھائے جا سکتے۔ ان کا کہنا تھا کہ ملک کی اعلیٰ ترین عدالت کی جانب سے دی گئی ہدایات پر عمل درآمد نہیں کیا گیا، جس کے نتیجے میں انتخابی عمل اور نتائج پر سنگین سوالات پیدا ہوئے ہیں۔ ابھیشیک بنرجی نے اپنی تنقید کے دوران سپریم کورٹ کے چیف جسٹس سوریہ کانت کی سربراہی والی بنچ کا بھی حوالہ دیا۔

یہ بھی پڑھئے: ایران کے جزیرے قشم پر دو میزائل حملے، ایرانی فوج کا امریکی ڈرون مار گرانے کا دعویٰ

ان کا الزام ہے کہ عدالت نے انتخابی عمل میں شفافیت اور گنتی کے طریقہ کار سے متعلق جو ہدایات جاری کی تھیں، ان پر عمل نہیں کیا گیا۔ انہوں نے کہا کہ ترنمول کانگریس کو امید تھی کہ ملک کی اعلیٰ ترین عدالت کی ہدایات کے بعد سرکاری مشینری اور الیکشن کمیشن ان پر عمل کرنے کے پابند ہوں گے لیکن ایسا نہیں ہوا۔انہوں نے خاص طور پر ووٹوں کی گنتی کے دوران ’’رینڈمائزیشن‘‘ کے طریقہ کار پر عمل نہ ہونے کا الزام لگایا۔ ان کے مطابق، ووٹوں کی گنتی ۴؍ تاریخ کو ہونی تھی جبکہ سپریم کورٹ نے ۲؍ تاریخ کو رینڈمائزیشن کے عمل پر عمل درآمد کی ہدایت دی تھی۔ ان کا دعویٰ ہے کہ اس طریقہ کار میں ریاستی اور مرکزی حکومت کے افسران کی شمولیت ضروری تھی لیکن گنتی کے عمل میں ریاستی حکومت کے کسی افسر کو شامل نہیں کیا گیا۔