• Sun, 22 November, 2026
  • EPAPER

Inquilab Logo Happiest Places to Work

مشترکہ لنچ کے بعد اپوزیشن تازہ دَم،سرکار کی ناک میں دَم

Updated: October 08, 2026, 1:20 PM IST | Farzan Qureshi | Mumbai

راہل، پرینکا گاندھی،منوج کمار جھا، ڈیریک اوبرائن سمیت کئی لیڈران کو پولیس نے بڑی مشقت کے بعد حراست میں لیا، راہل گاندھی نے اپنے اوپر درج ہر ایف آئی آر کومیڈل قرار دیا، سی ای سی گیانیش کمار اور مودی حکومت دونوں کو اپوزیشن کی وارننگ۔

Priyanka Gandhi and Rahul Gandhi protested vehemently. The police had a tough time taking them into custody. Photo: PTI
پرینکا گاندھی اور راہل گاندھی نے پوری شدت کے ساتھ احتجاج کیا۔ پولیس کو انہیں حراست میں لینے کیلئے ناکوں چنے چبانے پڑے۔ تصویر: پی ٹی آئی

چیف الیکشن کمشنر گیانیش کمار کے استعفیٰ کے مطالبہ پر بدھ کو انڈیا اتحاد کی جماعتوںنے جنتر منتر کے  قریب زبردست احتجاج کیا ۔ تمام جماعتوںنے متحد ہوکر اپنی طاقت کا مظاہرہ کیا جس سے حکومت کی ناک میں دم ہو گیا۔ اس دوران کانگریس کی رکن پارلیمنٹ پرینکا گاندھی کا ایک نیا انداز دیکھنے کو ملا۔احتجاج کے دوران و ہ آئین کی کتاب کو سینے سے لگائے سڑک پر لیٹ گئیں اور پولیس کو انہیں وہاں سے ہٹانا دشوار ہوگیا تھا۔ بڑی مشقت کے بعد پولیس نے انہیں حراست میں لے لیا۔ دوسری جانب اپوزیشن لیڈر راہل گاندھی نے بھی زور دار انداز میں سینہ سپر ہوکر دو ٹوک کہاکہ اب گیانیش کمار کو جانا ہی پڑے گا۔  انہوں نے اپنے اوپر درج کی گئی ایف آئی آر پر کہاکہ ابھی میرے اوپر ۴۵ ؍ ایف آئی آر ہیں اور میرا ہدف ۱۰۰ ؍ ایف آئی آر کا ہے ، ہر ایف آئی آر میرے لئے ایک میڈل ہے۔ احتجاج سے قبل انڈیا اتحاد کے لیڈران کو کناٹ پلیس میں واقع رتنا ساگر ہوٹل میں لنچ کیلئے مدعو کیا گیا تھا۔

یہ بھی پڑھئے:مضافات کے مختلف علاقوں میں پولیس کے چھاپے، ۱۰؍فرضی ڈاکٹروں پر کیس درج

اس کے بعد اپوزیشن لیڈروں کا قافلہ جنتر منتر کیلئے آگے بڑھا لیکن پولیس اور نیم فوجی دستوںنے اس قافلہ کو گھیر لیا۔ جب پولیس نے ممبران پارلیمنٹ کو اشوکا روڈ پر روکا تو پرینکا گاندھی کو جس طرح سے روکا گیا اس سے وہ  ناراض ہو گئیں اور سڑک پر لیٹ کر دھرنا شروع کر دیا۔ اس کے بعد پولیس نے راہل گاندھی کو زبردستی جائے وقوع سے ہٹا دیا اور انہیں حراست میں لے لیاپھرپولیس نے پرینکا گاندھی کو بھی حراست میں لے لیا۔ ٹی ایم سی کے ایم پی ڈیرک اوبرائن اور آر جے ڈی کے منوج جھا کو بھی حراست میں لیا گیا۔احتجاج میں اتنی شدت تھی کہ پولیس افسران کے بھی ہاتھ پیر پھول گئے تھے۔

پرینکا گاندھی نے الزام لگایا کہ پولیس نے مجھے کھینچا گیااور سڑک پر گرادیا جس کی وجہ سے مجھے جگہ جگہ کھروچ آئی  ہے ۔ٹی ایم سی لیڈر مہوا موئترا  بھی اس احتجاج میں شامل تھیں۔ انہوں نے کہا کہ پولیس یہاں مظاہرین کے ساتھ کس طرح کا رویہ اختیار کررہی ہے، وہ ہم سب دیکھ رہے ہیں۔ سی پی آئی رکن پارلیمنٹ پی سندوش کمار نے کہاکہ ہمیں حراست میںلینے سے گیانیش کمار بچ نہیں پائیں گے، انہیںجانا ہی ہو گا۔تقریباً ساڑھے ۶؍ بجے تمام بڑے لیڈران کو پولیس نے حراست میں لے لیا اور الگ الگ مقامات پر لے گئی۔ 

یہ بھی پڑھئے:دہلی میں ۵؍ منزلہ عمارت منہدم،۳؍ افراد ہلاک

حراست میں لئے جانے کے بعد راہل گاندھی نے ایک مرتبہ پھر کہاکہ گیانیش کمار کے استعفیٰ تک احتجاج جاری رہے گا، مودی اور شاہ ہمیں روک نہیں سکتے۔ یہ لڑائی ملک کی سب سے مقد س چیز کو بچانے کیلئے ہے۔ اس سے قبل انڈیا اتحاد کی جماعتوںنے لنچ کرنے کےبعد بس کے ذریعےجنتر منتر  پہنچنے کی کوشش کی لیکن پولیس نے انہیں کچھ قدم دور ہی روک لیا۔ انڈیا اتحاد کے لیڈروں نے بھی  وہیںزور دار احتجاجی مظاہرہ  شروع کردیا۔ احتجاج سے قبل کانگریس کی جانب سے انڈیا اتحاد میں شامل جماعتوں کو آج ظہرانہ کے لیے ’رتنا ساگر‘ ہوٹل میں موعو کیا گیا ،لیکن اس ظہرانے میں سماج وادی پارٹی کی غیر موجودگی پر سوال بھی اٹھے۔  اس پر صفائی دیتے ہوئے کانگریس لیڈر جے رام رمیش نے کہاکہ ظہرانے میں انڈیا اتحاد کی تمام جماعتوں کو مدعو کیا گیا تھا چونکہ لنچ کا فیصلہ دیر رات کیا گیا تھا اور سبھی کو اطلاع دی گئی تھی، اس  لئےکچھ جماعتوں کے نمائندے اس میں شامل نہیں ہوسکے۔

یہ بھی پڑھئے:’’حکومت ملک میں خانہ جنگی جیسی کیفیت پیدا کرنا چاہتی ہے‘‘

 جے رام رمیش نے کہاکہ ایس آئی آر ، ووٹ چوری اور حد بندی کے خلاف پورا اپوزیشن مضبوطی سے ایک دوسرے کے ساتھ ہے۔لنچ کے بعد میڈیا سے بات کرتے ہوئے کہاکہ کانگریس کے قومی صدر ملکارجن کھرگے نے کہاکہ جب تک ہمارے مطالبات پورے نہیں ہوتے ہم ایسے ہی احتجاج کرتے رہیں گے۔  انہوںنے کہاکہ  الیکشن کمیشن بار بار غلطیاں کررہا ہے اور مودی جی کرارہے ہیں۔ جب مودی جی ایسی غلطی کرارہے ہیں تو اس کا مطلب ہے کہ وہ  ملک میں جمہوریت ختم کرنے کی کوشش کررہے ہیں کھرگے نے کہاکہ چاہے کتنا بھی ڈرا لو ہم ڈرنے والے نہیں ہیں، ہنستے رہیں گے اور آگے بڑھتے رہیں گے ۔راہل گاندھی نے کہاکہ گزشتہ روز اپوزیشن کے ۳۰۰؍ اراکین پارلیمنٹ الیکشن کمشنر سے ملنا چاہتے تھے، لیکن وہ ہم سے ملے نہیں، دہلی پولیس نے ہمیں روک لیا۔ہم ملک کو بتائیں گے کہ گیانیش کمار قانونی طور پر الیکشن کمشنر نہیںہیں ۔انھوںنے کہاکہ مودی ، امیت شاہ ،موہن بھاگوت اور گیانیش کمار نے ملک کی جمہوریت کو ختم کیا ہے ،جنھوںنے یہ کام کیا ہے وہ ملک کے غدار ہیں ،ان پر ہم ایکشن لیں گے ،میں بتارہا ہوں کہ گیانیش کمار کو استعفیٰ دینا پڑے گا۔گزشتہ روز آکاش وانی میں دھرنے کے بعد راہل گاندھی اور پرینکا گاندھی کے خلاف ایف آئی آر درج کی گئی ۔ اس پر راہل گاندھی نے کہاکہ میرے اوپر ۴۵ ؍ایف آئی آر ہیں ،میرا ہدف ہے اور میں چاہتا ہوں کہ میرے اوپر ۱۰۰ ؍ ایف آئی آر درج ہوں ،ہر ایف آئی آر میرے لئے ایک میڈل ہے۔

راہل گاندھی اور پرینکا گاندھی لگاتار دوسرے دن حراست میں لئے گئے

کانگریس اور انڈیا اتحاد کی دیگر جماعتوںنے مسلسل دوسرے دن  چیف الیکشن کمشنر گیانیش کمار کے استعفے کے مطالبے کو لے کر مظاہرہ کیا۔ اس دوران پولیس نے کانگریس لیڈر راہل گاندھی اور پرینکا گاندھی سمیت کچھ دیگر لیڈروں کو حراست میں لے لیا۔ حالانکہ بعد میں انہیں رِہا کر دیا گیا لیکن یہ لگاتار دوسرا دن ہے جن اپوزیشن لیڈر راہل گاندھی اور پرینکا گاندھی کو پولیس نے حراست میں لیا۔ اتحاد کے لیڈرمظاہرے کے لئے بس میں سوار ہو کر جنتر منتر جا رہے تھے لیکن پولیس نے رکاوٹیں کھڑی کرکے انہیں پہلے ہی روک دیا، جس کے بعد وہ وہیں سڑک پر دھرنے پر بیٹھ گئے۔ پولیس نے کچھ دیر بعد راہل  گاندھی، پرینکا گاندھی  ،ڈیریک اوبرائن ،منوج کمار جھا اور دیگرلیڈروں کو حراست میں لے لیا۔ 

متعلقہ خبریں

This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK