آندھرا پردیش کی رہنے والی ۹۴؍ سالہ ضعیفہ نے امریکی شہریت ترک کردی، ان کی خواہش ہے کہ وہ اپنے مادر وطن میں بطور ہندوستانی آخری سانس لیں، ان کے حب الوطنی کے جذبے نے متعدد افراد کو متاثر کیا۔

آندھرا پردیش کے ضلع باپٹلا کے چنتھگمپالا گاؤں کی رہائشی مہالکشمی اماں اپنے شوہر ناگا بھوشنم کی وفات کے بعد اپنے بیٹے بچیاہ چودھری (جو ایک آنکالوجسٹ ہیں) کے ساتھ رہنے کے لیے ورجینیا کے شہر پیٹرزبرگ منتقل ہو گئی تھیں۔ انہوں نے جولائی ۲۰۰۰ء میں امریکی شہریت حاصل کی اور تقریباً ۱۸ سال تک امریکہ میں مقیم رہیں۔ تاہم، ۲۰۱۸ء میں جب ان کا بیٹا منگلاگری کے این آر آئی ہسپتال میں شامل ہوا تو وہ ہندوستان واپس آگئیں اور تب سے اپنے آبائی گاؤں میں مستقل طور پر رہائش پزیر ہیں۔اپنی ہندوستانی شناخت بحال کرنے کے عزم کے تحت، مہالکشمی اماں نے باضابطہ طور پر اپنی امریکی شہریت ترک کر دی ہے اور ہندوستانی قومیت کی بحالی کے لیے آن لائن درخواست جمع کرائی ہے۔ اپنے بیٹے کے ہمراہ انہوں نے حال ہی میں باپٹلا کے ضلع کلکٹر جے وینکٹا مورلی سے ملاقات کی اور اپنی درخواست پر جلد از جلد عملدرآمد کی اپیل کی۔انہوں نے ضلع انتظامیہ سے کہا، ’’کلکٹر گارو، میری عمر قریب ۹۵ سال ہے۔ میری صرف ایک خواہش ہے کہ اپنے آخری دن اپنی مٹی میں ہندوستانی شہری کی حیثیت سے گزاروں۔ میں چاہتی ہوں کہ میری آخری رسومات میرے آبائی گاؤں میں انجام پائیں۔ میں نے امریکی شہریت پہلے ہی ترک کر دی ہے۔ براہِ کرم مجھے جلد از جلد ہندوستانی شہریت حاصل کرنے میں مدد کریں۔‘‘

یہ بھی پڑھئے: ککڑی کی کھیتی کیلئے وزیر کواپنی ہی وزارت سے۹۹؍ لاکھ کی سبسیڈی

واضح رہے کہ مہالکشمی اماں کی درخواست محض قانونی حیثیت کا مسئلہ نہیں، بلکہ ایک گہری ذاتی خواہش ہے کہ وہ اپنی زندگی کا اختتام اسی جگہ کریں جہاں سے اس کا آغاز ہوا تھا۔ تقریباً دو دہائیوں کے بعد امریکی شہریت ترک کرنے کا ان کا فیصلہ اپنے وطن سے جذباتی تعلق اور ایک ہندوستانی کے طور پر یاد کیے جانے کی خواہش کو ظاہر کرتا ہے۔بعد ازاں ان کی اپیل نے وسیع طور پر توجہ حاصل کی ، بہت سے لوگ ان کی وطن سے وابستگی کی تعریف کر رہے ہیں باوجود اس کے کہ انہوں نے برسوں بیرونِ ملک گزارے۔ اب توقع ہے کہ حکام غیرملکی شہریت ترک کرنے کے بعد ہندوستانی شہریت بحال کرنے کے متعلقہ دفعات کے تحت ان کی درخواست پر جلد از جلد عملدرآمد کریں گے۔