منگل، ۱۷؍ اگست ریاست میں ’ایس آئی آر‘ (اسپیشل انٹنسیو ریویژن) کے تحت رائے دہندگان کا انومریشن فارم جمع کرنے کا آخری دن تھا لیکن انوشکتی نگر ودھان سبھا حلقہ میں اکثر و بیشتر ’بی ایل او(بوتھ لیول آفیسر)‘ انومریشن فارم پُر کرنے میں مصروف نظر آئے۔ اس کی وجہ یہ بتائی گئی ہے کہ اس علاقے کے زیادہ تر فارم غیر تربیت یافتہ طلبہ سے اسکین کروائے گئے تھےجو غلطیوں کا سبب بنے اور انہیں دوبارہ بی ایل او کے پاس بھیجا گیا تھا۔ واضح رہے کہ ۱۷۲؍ انوشکتی نگر اسمبلی حلقہ انتخاب میں رائے دہندگان کی تعداد ۳؍ لاکھ ۷۳؍ ہزار ۸۵۵؍ ہے جبکہ انتقال کرجانے والے اور دیگر مقامات پر منتقل ہونے والوں جیسی وجوہات کی بناء پر جو نام حذف کئے جانے ہیں، ان کی تعداد ایک لاکھ ۲۵۹؍ ہے۔ مقامی افراد کا سوال ہے کہ ۳؍ لاکھ میں سے ایک لاکھ افراد کے نام حذف ہونا کیسے ممکن ہے۔ 

یہ بھی پڑھئے:سی جے پی کا خوف، راجستھان کے اسکولوں میں باہری افراد کے داخلہ پر پابندی

پیر کو ایس آئی آر مہم کا آخری دن ہونے کے باوجود اس حلقہ انتخاب میں بڑی تعداد میں بی ایل او انہیں واپس ملنے والے فارم میں تصحیح کرنے اور انہیں دوبارہ جمع کرانے کی کارروائی میں مصروف تھے۔ 

ایک بی ایل او نے اپنی شناخت ظاہر نہ کرنے کی شرط پر انقلاب کو بتایا کہ ’’ہر بی ایل او کے پاس مختلف تعداد میں فارم واپس بھیجے گئے ہیں، جن کی تعداد سیکڑوں میں ہے۔ ‘‘ اس افسر نے یہ بھی کہا کہ ’’مانخورد میں واقع ’ای سی ایس‘ سینٹر پر فارم اسکین کرنے کی ذمہ داری نوجوان طلبہ کو دی گئی تھی۔ ان طلبہ نے کسی فارم میں فوٹو اسکین نہیں کیا تو کسی فارم کی تفصیل غلط درج کردی جس کی وجہ سے ہر بی ایل او کے حصے کے سیکڑوں فارم ناقابل قبول تھے۔ کئی میں ’اینومیلی(غلطی)‘ بتائی گئی اس لئے فارم دوبارہ ان کے پاس بھیجے گئے ۔ ‘‘

مقامی سماجی کارکن رفیق شیخ نے کہا کہ ’’ہم سے جتنے افراد کا انتظام ہوسکا، ہم نے مختلف سینٹروں پر بی ایل او کی مدد کیلئے بھیج دیئے لیکن ۱۷۲؍ انوشکتی نگر ودھان سبھا میں بی ایل او کی تعداد ۲۶۲؍ ہے اور اکثر و بیشتر بی ایل او کے پاس سیکڑوں فارم واپس آئے ہیں تو ہم ہر ایک کے پاس تو کسی کو مدد کیلئے نہیں بھیج سکتے۔ ‘‘ 

یہ بھی پڑھئے: بھیونڈی : ایف اے سی کے نام پر بجلی صارفین پر اضافی بوجھ

انہوں نے یہ بھی کہا کہ ’’بہت بڑی تعداد میں مقامی افراد اس بات سے واقف نہیں ہیں کہ اس طرح کی کوئی گڑ بڑ ہوئی ہے۔ جو لوگ واقف ہیں، ان میں سے بھی زیادہ تر لوگ انتظار میں ہیں کہ آئندہ مرحلے میں اگر انہیں بلایا گیا تب درپیش مسئلہ کا حل تلاش کیا جائے گا۔ ‘‘