ٹیکنالوجی کی معروف امریکی کمپنی ایپل (Apple) نے ہندوستان میں اپنے نئے ٹچ اسکرین میک بک پرو ماڈلز متعارف کرادیے ہیں، جو کمپنی کے لیپ ٹاپس کی تاریخ میں ایک بڑی تبدیلی سمجھے جارہے ہیں۔ پہلی مرتبہ میک بک پرو میں ٹچ اسکرین کی سہولت دی گئی ہے۔

 ٹیکنالوجی کی معروف امریکی کمپنی ایپل (Apple) نے ہندوستان میں اپنے نئے ٹچ اسکرین میک بک پرو  ماڈلز متعارف کرادیے ہیں، جو کمپنی کے لیپ ٹاپس کی تاریخ میں ایک بڑی تبدیلی سمجھے جارہے ہیں۔ پہلی مرتبہ میک بک پرو میں ٹچ اسکرین کی سہولت دی گئی ہے، جبکہ نئے ماڈلز میں جدید ٹینڈم او ایل ای ڈی ڈسپلے، طاقتور ایم ۵؍پرو اور ایم ۵؍ میکس چپس اور آئی فون کی طرز کا ڈائنامک آئی لینڈ بھی شامل ہے۔ ہندوستان میں ان نئے لیپ ٹاپس کی ابتدائی قیمت۳۴۹۹۰۰؍ روپے ہے جبکہ زیادہ سے زیادہ خصوصیات والے ماڈل کی قیمت تقریباً ۱۷ء۱۸؍ لاکھ روپے تک پہنچتی ہے۔ نئے میک بک پرو کو ۱۴؍انچ اور  ۱۶؍ انچ کے سائز میں پیش کیا گیا ہے، اور یہ خاص طور پر ویڈیو ایڈیٹنگ، گرافک ڈیزائننگ، سافٹ ویئر ڈیولپمنٹ، مصنوعی ذہانت اور دیگر پیشہ ورانہ کام کرنے والوں کو مدنظر رکھتے ہوئے تیار کیے گئے ہیں۔ ان بنیادی قیمتوں کے علاوہ، خریدار اپنی ضرورت کے مطابق میموری، اسٹوریج، نینو ٹیکسچر ڈسپلے اور پیشہ ورانہ سافٹ ویئر کے اضافی اختیارات منتخب کرسکتے ہیں۔ تمام اعلیٰ درجے کی سہولتوں والے ماڈل کی قیمت تقریباً  ۱۷ء۱۸؍ لاکھ روپے تک پہنچ سکتی ہے۔ یوں یہ لیپ ٹاپ عام صارفین کے بجائے زیادہ تر پیشہ ورانہ کام کرنے والوں اور اعلیٰ کارکردگی کے خواہش مند صارفین کے لیے ہے۔ 

یہ بھی پڑھئے:کریتی کھربندا نے سنجیدہ سے مزاحیہ تک مختلف قسم کے رول نبھائے

نئے میک بک پرو کی سب سے بڑی خصوصیت اس کا ٹچ اسکرین ڈسپلے ہے۔ ایپل نے اسکرین میں براہِ راست ٹچ سینسر شامل کیے ہیں، جس سے صارف انگلیوں کے ذریعے مواد منتخب کرنے، صفحات اسکرول کرنے، تصاویر کو بڑا کرنے اور دیگر کام انجام دے سکیں گے۔ اس کے باوجود کمپنی نے روایتی کی بورڈ اور ٹریک پیڈ کو برقرار رکھا ہے، تاکہ صارف اپنی ضرورت کے مطابق دونوں طریقوں سے لیپ ٹاپ استعمال کرسکیں۔
 نئے ماڈلز میں PROLED XDR ڈسپلے دیا گیا ہے، جو ٹینڈم او ایل ای ڈی ٹیکنالوجی پر مبنی ہے۔ کمپنی کے مطابق، یہ ڈسپلے ایچ ڈی آر مواد میں۲۰۰۰؍نٹس تک زیادہ سے زیادہ چمک۱۰۰۰۰۰۰۰:۱؍ کنٹراسٹ ریشو اور ۱۰؍ہرٹز سے  ۱۲۰؍ہرٹز تک متغیر ریفریش ریٹ فراہم کرتا ہے۔ اس سے ویڈیو ایڈیٹنگ، فلم سازی، تصاویر کی رنگوں کے اعتبار سے درست تدوین اور تیز رفتار بصری مواد دیکھنے میں مدد مل سکتی ہے۔  نئے ٹچ اسکرین میک بک پرو میں ایم  ۵؍پرو اور ایم ۵؍ میکس پروسیسر کے اختیارات دیے گئے ہیں۔ زیادہ سے زیادہ ۱۲۸؍ جی بی یونیفائیڈ میموری اور ء۱۶؍ٹی بی اسٹوریج کی سہولت دستیاب ہے۔ یہ خصوصیات بڑے ویڈیو پروجیکٹس، تھری ڈی ڈیزائن، پیچیدہ سافٹ ویئر اور مصنوعی ذہانت سے متعلق کاموں کے لیے اہم ہوسکتی ہیں۔

یہ بھی پڑھئے:سشانت سنگھ راجپوت کے گھر میں رہنے کے لیے ہمت کی ضرورت نہیں: ادا شرما

ایپل نے بیٹری کا دورانیہ استعمال اور ماڈل کے لحاظ سے  ۲۴؍گھنٹے تک بتایا ہے۔ کنیکٹیویٹی کے لیے تھنڈربولٹ ۵، وائی فائی ۷، بلیوٹوتھ ۶، ایچ ڈی ایم آئی، ایس ڈی ایکس سی کارڈ سلاٹ اور میگ سیف چارجنگ جیسی سہولتیں بھی شامل ہیں۔  ایپل نے پہلی بار میک بک پرو میں ڈائنامک آئی لینڈ کا فیچر بھی شامل کیا ہے۔ اس کے ذریعے صارف اہم اطلاعات، لائیو سرگرمیوں، موسیقی کے کنٹرول اور دیگر معلومات تک فوری رسائی حاصل کرسکتے ہیں۔ یہ فیچر آئی فون کے تجربے کو میک کمپیوٹر کے ساتھ مزید مربوط کرنے کی کوشش ہے۔ نئے لیپ ٹاپس کو سلور اور اسپیس بلیک رنگوں میں پیش کیا گیا ہے، جبکہ ڈیزائن کو پہلے کے مقابلے میں زیادہ پتلا اور ہلکا بنایا گیا ہے۔