ارجنٹائنا کے صدر ہاویئر میلی نے اتوار کو ہونے والے وسط مدتی انتخابات میں اپنی پارٹی ایل ایل اے کی نمایاں فتح کو ملک کیلئے ایک ’’اہم موڑ‘‘ قرار دیا ہے۔ انہوں نے عزم ظاہر کیا کہ وہ ریاست کے حجم میں کمی اور معیشت کی مکمل ڈی ریگولیشن (غیر منظمی) کے اپنے اصلاحاتی ایجنڈے پر مزید تیزی سے عمل کریں گے۔

ارجنٹائنا کے صدر ہاویئرمیلی نے اتوار کو اپنی پارٹی لا لیبرٹاد اوانزا (ایل ایل اے) کے وسط مدتی انتخابات میں غیر متوقع فتح کو ’’ملک کو بدلنے والا لمحہ‘‘ قرار دیا۔ انہوں نے کہا کہ یہ کامیابی اس بات کا ثبوت ہے کہ ارجنٹائنا اب پیچھے نہیں بلکہ آگے بڑھنا چاہتا ہے۔میلی کی پارٹی نے کانگریس کے اراکین کیلئے ڈالے گئے ووٹوں میں سے ۸۴ء۴۰؍  فیصد حاصل کرتے ہوئے اپوزیشن پر سبقت حاصل کی۔ یہ کامیابی ایک ایسے وقت میں آئی جب سرمایہ کار حکومت کی کارکردگی پر گہری نظر رکھے ہوئے تھے۔ ۵۵؍ سالہ صدر نے بیونس آئرس میں حامیوں سے خطاب کرتے ہوئے کہا کہ ’’آج ہم ایک تاریخی موڑ پر پہنچ گئے ہیں۔ آج ایک عظیم ارجنٹائنا کی تعمیر کا آغاز ہو رہا ہے۔‘‘ انہوں نے کہا کہ نئی پارلیمنٹ ’’ارجنٹائنا کی تاریخ کی سب سے زیادہ اصلاح پسند کانگریس‘‘ ثابت ہوگی۔

یہ بھی پڑھئے:عمر خالد اور شرجیل امام ضمانت درخواست: سپریم کورٹ دہلی پولیس پر برہم

واضح رہے کہ اتوار کو چیمبر آف ڈیپوٹیز کی نصف نشستوں اور سینیٹ کی ایک تہائی نشستوں پر ووٹنگ ہوئی۔ ایل ایل اے نے اپنی پارلیمانی طاقت میں تین گنا سے زائد اضافہ کرتے ہوئے ایوانِ زیریں میں ۱۰۱؍ نشستیں (پہلے ۳۷) اور سینیٹ میں ۲۰؍ نشستیں (پہلے ۶) حاصل کیں۔مرکزی اپوزیشن، یعنی سینٹر لیفٹ پیرونسٹ تحریک، نے ۶۴ء۳۱؍ فیصد ووٹ حاصل کئے اور دوسرے نمبر پر رہی۔ میلی نے کہا کہ ’’یہ فتح اس بات کا ثبوت ہے کہ بیشتر شہری اب پیچھے نہیں جانا چاہتے۔‘‘ واضح رہے کہ یہ انتخابات ہاویئرمیلی کی مقبولیت کا پہلا بڑا قومی امتحان تھے، جو دو سال قبل اقتدار میں آنے کے بعد سے معیشت کی سخت اصلاحات کے وعدے پر قائم ہیں۔

یہ بھی پڑھئے:باغیوں کیخلاف نتیش کا اقدام ،پارٹی سےبرطرف

ٹرمپ کا مالی تعاون اور امریکی امداد
ارجنٹائنا کی قومی کرنسی پیسو پر دباؤ کے باعث، میلی نے امریکی صدر ڈونالڈ ٹرمپ سے مدد طلب کی تھی۔ واشنگٹن نے ۴۰؍ ارب ڈالر کے بیل آؤٹ پیکج کا وعدہ کیا، تاہم ٹرمپ نے خبردار کیا کہ اگر انتخابات میں میلی کو کامیابی نہ ملی تو وہ ’’سخاوت‘‘ نہیں دکھائیں گے۔ یو ایس ٹریژری نے حالیہ ہفتوں میں ارجنٹائنا پیسو کو سہارا دینے کیلئے کئی بار مارکیٹ میں مداخلت کی، جبکہ ملکی سرمایہ کاروں نے میلی کی اصلاحات پر عدم اعتماد کے باعث کرنسی فروخت کر دی تھی۔