بلجیم کے وزیر دفاع تھیو فرانکن نے روس کو متنبہ کیا ہے کہ اگر برسلز پر کوئی میزائل حملہ کیا گیا تو نیٹو اس کا فیصلہ کن اور بھرپور جواب دے گا۔ انہوں نے واضح کیا کہ مغرب کے خلاف روسی اقدامات برداشت نہیں کئے جائیں گے۔

بلجیم کے وزیر دفاع تھیو فرانکن نے روس کو سخت وارننگ دیتے ہوئے کہا ہے کہ اگر روس نے برسلز پر میزائل داغا تو نیٹو کا ردعمل فیصلہ کن اور تباہ کن ہوگا۔ فرانکن نے پیر کو ’’روز ڈی مورگن ‘‘کو دیئے گئے انٹرویو میں کہا کہ ’’اگر (روسی صدر ولادیمیر) پوتن برسلز پرمیزائل داغتے ہیں تو ہم ماسکو کو نقشے سے مٹا دیں گے۔‘‘ انہوں نے نیٹو کے اجتماعی دفاعی عزم پر زور دیتے ہوئے کہا کہ اتحاد کسی بھی حملے کا بھرپور جواب دے گا۔ فرانکن نے امریکی صدر ڈونالڈ ٹرمپ کی قیادت میں نیٹو کے ساتھ امریکی وابستگی پر کسی بھی قسم کے شکوک و شبہات کو رد کر دیا۔ ان کے مطابق ’’یورپ میں امریکی حکومت کے خلاف تعصب بہت زیادہ اور ناقابلِ یقین ہے۔ امریکہ نے واضح طور پر کہا ہے کہ وہ اپنے نیٹو اتحادیوں کی سو فیصد حمایت جاری رکھے گا۔ برسلز پر کروز میزائل حملہ کسی بھی لحاظ سے عقلمندی نہیں ہوگی۔‘‘

یہ بھی پڑھئے: امریکی صدر ٹرمپ جاپان پہنچے،اگلا پڑاؤ جنوبی کوریا ہوگا

تاہم، فرانکن نے روس کی فوجی صلاحیتوں کو کم سمجھنے کے خلاف خبردار کرتے ہوئے کہا کہ روس نے اپنی جنگی معیشت کو مضبوط کیا ہے۔ انہوں نے کہا کہ ’’روس اب نیٹو کی مجموعی پیداوار کے مقابلے میں چار گنا زیادہ گولہ بارود تیار کر رہا ہے جبکہ یورپ کے پاس تاحال کوئی مرکزی کمان نہیں ہے۔‘‘ یوکرین جنگ کے حوالے سے فرانکن نے کہا کہ ’’روس کو وہاں مشکلات کا سامنا ہے۔ روس دراصل پورے مغرب کے خلاف لڑ رہا ہے۔ یوکرینی فوج ہماری فراہم کردہ اسلحہ، گولہ بارود اور مالی مدد سے لڑ رہی ہے، ورنہ وہ کب کے پسپا ہو چکے ہوتے۔‘‘ انہوں نے مزید کہا کہ مغرب کو مستقبل میں روس اور چین کے مشترکہ چیلنج کیلئے بھی تیار رہنا چاہئے۔

یہ بھی پڑھئے: غزہ میں اسرائیلی بمباری سے ہونے والا ملبہ تشویش کا باعث

فرانکن نے کہا کہ ’’چین یوکرین میں جنگ کو جاری رکھنا چاہتا ہے کیونکہ اس سے مغرب کمزور ہوتا ہے۔ وہ روسی خام مال خرید رہا ہے، ہتھیار فراہم کر رہا ہے اور شمالی کوریا کے فوجیوں کی ممکنہ تعیناتی پر پیوٹن کی حمایت کر رہا ہے۔‘‘ آخر میں انہوں نے اس بات پر اطمینان ظاہر کیا کہ روس بالٹک ریاستوں پر حملہ نہیں کرے گا کیونکہ وہ نیٹو کے رکن ہیں۔ وزیر دفاع نے مزید کہا کہ ’’جلد ہی یورپ کے پاس چھ سو ایف ۳۵؍ طیارے ہوں گے۔ روسی ان سے خوفزدہ ہیں۔‘‘