سماجوادی پارٹی (ایس پی)  کے صدر اکھلیش یادو نے کہا ہے کہ اترپردیش میں بی جے پی حکومت کے دور میں ظلم، زیادتی اور بدعنوانی عروج پر پہنچ چکی ہے۔

سماجوادی پارٹی (ایس پی)  کے صدر اکھلیش یادو نے کہا ہے کہ اترپردیش میں بی جے پی حکومت کے دور میں ظلم، زیادتی اور بدعنوانی عروج پر پہنچ چکی ہے۔ انہوں نے الزام لگایا کہ بی جے پی حکومت طاقت کے ناجائز استعمال میں مصروف ہے اور پولیس و انتظامیہ کو معصوم شہریوں کو ستانے کے لئے استعمال کیا جا رہا ہے۔
 اکھلیش یادو نے بدھ کو آگرہ میں ایس پی کے سینئرلیڈر اور راجیہ سبھا رکن رام جی لال سمن کے ساتھ میڈیا سے گفتگو کرتے ہوئے پولیس کے رویے کو ناپسندیدہ قرار دیا۔ انہوں نے کہا کہ پی ڈی اے کی یکجہتی سے خوفزدہ بی جے پی حکومت نے پولیس کو آگے کر کے سماجوادی پارٹی کے کارکنان کے ساتھ بدسلوکی کرائی اور پارٹی کے نمائندہ وفد کو روک کر غیر جمہوری اقدام کیا۔ 
 انہوں نے کہا کہ بی جے پی کو یہ تسلیم کرنا چاہئے کہ وہ اپنی ہار دیکھ کر مایوس ہے۔ انہوں نے خبردار کرتے ہوئے کہا کہ پی ڈی اے سماج اب مزید پابندیوں کو برداشت نہیں کرے گا۔  
 اکھلیش یادو نے الزام لگایا کہ بی جے پی حکومت صوبے میں ظلم، بدعنوانی اور لوٹ کو فروغ دے رہی ہے اور ہر محکمے میں بجٹ کی تقسیم غیر منصفانہ ہو رہی ہے جس سے عام لوگ، کسان اور نوجوان شدید پریشان ہیں۔انہوں نے یقین ظاہر کیا کہ۲۰۲۷ء کے اسمبلی انتخابات میں عوام بی جے پی کے تکبر اور بدانتظامی کو جڑ سے اکھاڑ پھینکیں گے۔ اکھلیش یادو نے کہاکہ بی جے پی حکومت جائے گی تبھی لوگوں کو انصاف اور بدعنوانی سے آزادی ملے گی۔