فلسطین اور اسرائیل کے درمیان جنگ کے تعلق سےمودی حکومت نے ہندوستان کی کئی دہائیوں سے چلی آرہی خارجہ پالیسی سے انحراف کرتے ہوئے اسرائیل کی حمایت کا اعلان کیا ہے جس کےبعد ملک میں ہر اس شخص کو نشانہ بنایا جا رہا ہے جو ذرا بھی فلسطین کی حمایت میں کوئی بیان دے۔

فلسطین اور اسرائیل کے درمیان جنگ کے تعلق سےمودی حکومت نے ہندوستان کی کئی دہائیوں سے چلی آرہی خارجہ پالیسی سے انحراف کرتے ہوئے اسرائیل کی حمایت کا اعلان کیا ہے جس کےبعد ملک میں ہر اس شخص کو نشانہ بنایا جا رہا ہے جو ذرا بھی فلسطین کی حمایت میں کوئی بیان دے۔ حال ہی میں این سی پی سربراہ شرد پوار نے ایک جلسہ میں کہا تھا کہ’ جس زمین پر جنگ جاری ہے وہ فلسطینی باشندوں کی ہے۔  اسرائیل وہاں پر قابض ہے۔‘ ان کے اس بیان کے بعد بی جے پی لیڈران نے شرد پوار کے خلاف محاذ کھول دیا ہے۔ ان لیڈران میں مہاراشٹر کے نائب وزیر اعلیٰ دیویندر فرنویس بھی شامل ہو گئے ہیں۔ 
دیویندر فرنویس نے ایک ٹویٹ کرکے شرد پوار پر فلسطین کے نام پر ووٹوں کی سیاست کرنے کا الزام لگایا ہے۔ البتہ انہوں نے یہ تاویل بھی پیش کی کہ حکومت ہند نے اپنی خارجہ پالیسی تبدیل نہیں کی ہے۔ نائب وزیر اعلیٰ نے ٹویٹ کیا ’’ہندوستان نے اسرائیل ۔ فلسطین تنازع کے تعلق سے اپنا موقف بالکل بھی تبدیل نہیں کیا ہے۔ البتہ ہندوستان ہمیشہ سے کسی کے بھی خلاف ، کسی بھی طرح کی دہشت گردی کی مخالفت کرتا ہے۔ ‘‘انہوں نے کہا ’’ساری دنیا اسرائیل میں’بے گناہوں‘ کی موت کی مذمت کر رہی تھی تو ہندوستان نے بھی کی۔‘‘ فرنویس نے اصرار کیا کہ ’’شردپوار جی کو دہشت گردی کی اتنے ہی سخت الفاظ میں مذمت کرنی چاہئے۔ ‘‘ انہوں نے آگے لکھا ہے ’’میری شرد پوار جی سے گزارش ہے کہ وہ ووٹ بینک کے تعلق سے غور نہ کریں بلکہ دہشت گردی کی مضبوطی کے ساتھ مخالفت کریں۔ ‘‘
 پیگاسیس اور ای وی ایم کی خاطر اسرائیل کی حمایت 
دیویندر فرنویس کے الزامات کے جواب میں شیوسینا ترجمان سنجے رائوت نے نائب وزیر اعلیٰ کو تاریخ کا مطالعہ کرنے کا مشورہ دیا ہے۔ ساتھ ہی بی جے پی پر الزام لگایا ہے کہ وہ پیگاسیس جیسے جاسوسی ایپ اور ای وی ایم سے چھیڑ چھاڑ کرنے والی ٹیکنالوجی حاصل کرنے کی غرض سے اسرائیل کی حامی بنی ہوئی ہے۔ سنجے رائوت نے کہا کہ ’’دنیا میں کیا ہو رہا ہے، ان لوگوں کو اس کا علم نہیں ہے۔ دیویندر فرنویس کو چاہئے کہ وہ پہلے تاریخ کا مطالعہ کریں۔ اٹل بہاری واجپئی کا  پارلیمنٹ سے کیا ہوا خطاب سنیں۔ ‘‘رائوت نے زور دے کر کہا ’’ ہندوستان کی خارجہ پالیسی ہمیشہ سے فلسطینیوں کی حمایت کرنا رہی ہے۔ پنڈت نہرو، اندرا گاندھی یا اٹل بہاری واجپئی کسی نے اس پالیسی کو تبدیل نہیں کیا۔ حکومتیں بدلتی رہیں لیکن ملک کی پالیسی وہی رہی۔‘‘  شیوسینا لیڈر نے الزام لگایا کہ ’’آپ( بی جے پی) کو پیگاسیس( جاسوسی ایپ) اسرائیل سے ملا ہے۔ ای وی ایم کے ساتھ چھیڑ چھاڑ کرنے  والی ٹیکنا لوجی اسرائیل نے دی ہے۔ اسی لئے آپ اسرائیل کے حامی بنے ہوئے ہیں۔ ‘‘سنجے رائوت نے اس دوران امریکی صدر جو بائیڈن کی بھی یہ کہتے ہوئے مذمت کی کہ ’’ غزہ پر حملہ ہو رہا تھا اور جو بائیڈن تل ابیب میں بیٹھ کر اس کا نظارہ کر رہے تھے۔ آخر یہ کہاں کی انسانیت ہے۔‘‘ یاد رہے کہ مہاراشٹر میں اب تک پولیس یا انتظامیہ نے غزہ کے مظلومین کی حمایت میں مظاہرہ کرنے کی اجازت نہیں دی ہے بلکہ بعض مقامات پر مظاہرین کے خلاف قانونی کارروائی کی گئی ہے۔