کیپ ورڈے کی فٹ بال ٹیم جب اپنے پہلے فیفا ورلڈ کپ میں شرکت کے لیے پہنچی تھی تو لوگ اسے صرف ایک عام ٹیم سمجھ رہے تھے، لیکن اب یہ افریقی جزیرے کا چھوٹا سا ملک ناک آؤٹ مرحلے میں پہنچنے سے محض ایک میچ کی دوری پر کھڑا ہے۔

کیپ ورڈے کی فٹ بال ٹیم جب اپنے پہلے فیفا ورلڈ کپ میں شرکت کے لیے پہنچی تھی تو لوگ اسے صرف ایک عام ٹیم سمجھ رہے تھے، لیکن اب یہ افریقی جزیرے کا چھوٹا سا ملک ناک آؤٹ مرحلے میں پہنچنے سے محض ایک میچ کی دوری پر کھڑا ہے۔ گروپ ایچ کے اپنے افتتاحی میچ میں کیپ ورڈے نے یورپی چیمپئن اسپین کو ڈرا پر روک کر سب کو حیران کر دیا تھا۔ اس کے بعد دوسرے میچ میں زبردست واپسی کرتے ہوئے دو بار کی ورلڈ کپ چیمپئن یوروگوئے کے خلاف ۲۔۲؍گول سے ڈرا کھیلا۔ اب جمعہ کے روز سعودی عرب کے خلاف اس کا آخری گروپ میچ یہ طے کرے گا کہ ٹورنامنٹ کی یہ سب سے غیر متوقع اور خوبصورت کہانی آگے بڑھے گی یا نہیں۔
یوروگوئے کے خلاف میچ کے بعد کیپ ورڈے کے ہیڈ کوچ پیڈرو لیٹاؤ بریٹو، جنہیں بوبیسٹا  کے نام سے جانا جاتا ہے، انہوں نے کہا’’یہ ایک ایسی کامیابی ہے جس کا سہرا ہمیں ان تمام چھوٹی قومی ٹیموں کو دینا چاہیے جنہوں نے عالمی ٹورنامنٹ کے لیے کوالیفائی کرنے کے لیے سخت جدوجہد کی ہے۔‘‘

یہ بھی پڑھئے:۷۱؍فیصد ہندوستانی شہریوں کی فٹبال ورلڈ کپ وزیٹر ویزا درخواست مسترد

کیپ ورڈے کی اس شاندار کارکردگی کی بنیاد ان کی مضبوط دفاعی لائن رہی ہے۔ اسپین کے خلاف میچ میں ان کے ۴۰؍ سالہ تجربہ کار گول کیپر ووزینہا  نے سات شاندار بچاؤ کیے اور پلیئر آف دی میچ قرار پائے۔ انہوں نے فیران ٹوریس، پیڈری اور ایمرک لاپورٹے کے یقینی گولز کو روک کر کیپ ورڈے کو عالمی سطح پر سرخیوں میں لا کھڑا کیا۔ یوروگوئے کے خلاف کیپ ورڈے نے دکھایا کہ وہ صرف دفاع کرنا نہیں جانتے بلکہ حملہ کرنا بھی جانتے ہیں۔ کیون پینا نے فری کک کے ذریعے ملک کا پہلا ورلڈ کپ گول اسکور کیا جبکہ متبادل (سبسٹیٹیوٹ) کھلاڑی ہیلیو واریلا نے یوروگوئے کے گول کیپر فرنانڈو موسلیرا کی غلطی کا فائدہ اٹھاتے ہوئے شاندار گول کر کے میچ برابر کر دیا۔۲۴؍ سالہ واریلا کا اپنے ورلڈ کپ آغاز پر یہ پہلا بین الاقوامی گول تھا۔
گروپ ایچ میں اس وقت کیپ ورڈے اور یوروگوئے دونوں کے دو دو پوائنٹس ہیں جبکہ سعودی عرب نے بھی یوروگوئے کو ۱۔۱؍گول  سے ڈرا پر روکا تھا۔ اس گروپ کے دوسرے میچ میں اسپین کا سامنا یوروگوئے سے ہوگا۔ کیپ ورڈے کے لیے سعودی عرب کے خلاف جیت اسے براہِ راست ناک آؤٹ (راؤنڈ آف ۳۲ ) میں پہنچا دے گی، جبکہ ایک ڈرا بھی دوسری ٹیموں کے نتائج کی بنیاد پر کافی ہو سکتا ہے۔

یہ بھی پڑھئے:رتیک روشن نے رجنی کانت کے ساتھ ’’جیلر ۲‘‘ کی شوٹنگ مکمل کی

امریکہ، میکسیکو اور کنیڈا میں کھیلے جا رہے اس ورلڈ کپ میں کیپ ورڈے کی اس کہانی نے دنیا بھر کے فٹ بال شائقین کے دل جیت لیے ہیں۔ ٹیم کے مداح میامی کے اسٹیڈیم میں جشن منا رہے ہیں اور اب کھلاڑی تاریخ کا ایک اور نیا باب لکھنے کے لیے پوری طرح تیار ہیں۔ ٹیم کے ڈیفینڈر اسٹوپیرا نے کہا’’ہمیں خود پر یقین ہے اور ہم ایک ٹیم کے طور پر سخت محنت کر رہے ہیں۔ اب ہماری نظریں اگلے میچ پر ہیں تاکہ ہم اگلے مرحلے میں پہنچ سکیں۔‘‘