ایک کیتھولک پادری نے خبردار کیا ہے کہ موجودہ عالمی حالات ایسے رخ پر جا رہے ہیں جو بعض مسیحی پیش گوئیوں کے مطابق دجال کے ظہور کی راہ ہموار کر سکتے ہیں۔ ان کے مطابق مستقبل میں ایک ایسا عالمی نظام بن سکتا ہے جس میں معیشت اور ڈجیٹل ٹیکنالوجی کے ذریعے لوگوں کی زندگیوں پر کنٹرول قائم کیا جائے گا۔

کیتھولک پادری فادر چاڈ ریپرگر نے حال ہی میں ایک گفتگو کے دوران کہا ہے کہ دنیا کے موجودہ حالات بعض قدیم مسیحی پیش گوئیوں سے مشابہت رکھتے ہیں، جن میں ایک ایسی شخصیت کے ظہور کا ذکر کیا گیا ہے جسے مسیحی عقیدے میں دجال کہا جاتا ہے۔ انہوں نے یہ بات شان ریان شو میں گفتگو کرتے ہوئے کہی۔ فادر ریپرگر کے مطابق مسیحی روایت میں دجال کو یسوع مسیح کے برعکس ایک ایسی شخصیت کے طور پر بیان کیا گیا ہے جو خود کو انسانیت کا نجات دہندہ ظاہر کرے گی لیکن درحقیقت لوگوں کو ایمان سے دور کرنے کی کوشش کرے گی۔ انہوں نے کہا کہ ’’دجال کو دنیا پر حکومت کرنے کے قابل ہونا چاہیے۔‘‘

یہ بھی پڑھئے: روس: انٹرنیٹ پابندیاں جاری رہیں گی، شہریوں کی سلامتی اولین ترجیح

ان کے مطابق ابتدائی مسیحی مفکرین نے پیش گوئی کی تھی کہ ایسی شخصیت ایک ایسے وقت میں سامنے آئے گی جب دنیا اخلاقی بحران اور روحانی زوال کا شکار ہوگی۔ انہوں نے کہا کہ ان کے خیال میں یہ رجحان کئی دہائیوں سے بڑھ رہا ہے۔ انہوں نے کہا، ’’ایک ایسا تاثر پیدا ہو گیا ہے جہاں لوگ خدا کے قوانین اور فطری قانون کے کسی بھی معنی میں پیروی نہیں کر رہے۔‘‘ فادر ریپرگر کے مطابق یہی صورتحال اس بات کی علامت ہو سکتی ہے کہ دنیا ایک ایسے مرحلے کی طرف بڑھ رہی ہے جہاں دجال کے ظہور کے لیے ماحول تیار ہو رہا ہے۔
انہوں نے مزید کہا کہ بائبل کی بعض پیش گوئیوں میں ایک ایسے عالمی معاشی نظام کا ذکر بھی ملتا ہے جس میں طاقتور قوتیں یہ طے کریں گی کہ کون خرید و فروخت کر سکتا ہے اور کون نہیں۔ ان کے مطابق جدید ڈجیٹل ٹیکنالوجی اور ڈجیٹل کرنسی جیسے نظام مستقبل میں ایسے کنٹرول کے لیے راستہ ہموار کر سکتے ہیں۔ انہوں نے مزید کہا کہ ’’ہم تقریباً اس مقام پر پہنچ چکے ہیں جہاں وہ یہ فیصلہ کر سکتے ہیں کہ اگر آپ کچھ شرائط پر دستخط نہیں کرتے تو آپ کو اس ڈجیٹل کرنسی تک رسائی نہیں ملے گی جسے دنیا بھر میں نافذ کیا جا سکتا ہے۔‘‘
انہوں نے بائبل کی کتاب ’’مکاشفہ‘‘ کا حوالہ دیتے ہوئے کہا کہ اس میں ’’حیوان کے نشان‘‘ کا ذکر موجود ہے، جس کے بغیر لوگوں کے لیے خرید و فروخت ممکن نہیں ہوگی۔ بعض مسیحی ماہرینِ الہٰیات کے مطابق یہ پیش گوئیاں آخری زمانے کے واقعات سے جڑی ہوئی ہیں۔ ان کے مطابق دجال ایک طاقتور عالمی شخصیت کے طور پر سامنے آئے گا جو لوگوں سے اپنی اطاعت کا مطالبہ کرے گا۔ فادر ریپرگر کے مطابق اس شخصیت کو شیطانی قوتوں کی مدد حاصل ہوگی اور وہ ان لوگوں کو سزا دے گا جو اس کی اطاعت سے انکار کریں گے۔

یہ بھی پڑھئے: نیتن یاہو اپنے منطقی انجام کے بہت نزدیک پہنچ گئے

انہوں نے کہا کہ بہت سے لوگ اس کی شخصیت اور دعوؤں سے متاثر ہو جائیں گے اور آسانی سے اس کے پیروکار بن سکتے ہیں۔ تاہم مسیحی عقیدے کے مطابق آخرکار دجال کو شکست دی جائے گی۔ بعض روایات میں بتایا گیا ہے کہ دو بائبلی شخصیات اس کے خلاف کھڑی ہوں گی اور اس کے اقتدار کا خاتمہ کریں گی۔ ماہرین کے مطابق ایسے بیانات مذہبی تعبیرات اور عقائد کا حصہ ہیں، اور مختلف مسیحی مکاتب فکر ان پیش گوئیوں کی مختلف انداز میں تشریح کرتے ہیں۔