چیک جمہوریہ کی حکومت نے ایک ایسے بل کی منظوری دے دی ہے جس کے تحت ستمبر ۲۰۲۷ء سے کنڈرگارٹن، پرائمری اسکولوں اور کثیر سالہ گرامر اسکولوں کے ابتدائی درجات میں طلبہ کے موبائل فون استعمال کرنے پر پابندی عائد کی جا سکتی ہے۔ پابندی صرف کلاس روم تک محدود نہیں ہوگی بلکہ وقفے، کیفے ٹیریا اور اسکول کی دیگر سرگرمیوں کے دوران بھی نافذ رہے گی۔

چیک جمہوریہ کی حکومت نے اسکولوں میں طلبہ کے موبائل فون کے استعمال کو محدود کرنے کے لیے ایک اہم قدم اٹھاتے ہوئے ایسے بل کی منظوری دے دی ہے، جس کے تحت ستمبر ۲۰۲۷ء سے ملک کے بیشتر ابتدائی تعلیمی اداروں میں موبائل فون کے استعمال پر پابندی عائد کی جا سکتی ہے۔ چیک ریڈیو کی رپورٹ کے مطابق وزیرِ تعلیم رابرٹ پلاگا نے بتایا کہ کابینہ نے اس تجویز کی متفقہ طور پر حمایت کی ہے۔ یہ بل وزیرِ تعلیم اور وزیراعظم آندریج بابیش کی مشترکہ پیشکش پر تیار کیا گیا ہے۔ بل کے مطابق کنڈرگارٹن، پرائمری اسکولوں اور کثیر سالہ گرامر اسکولوں کے ابتدائی درجات میں زیرِ تعلیم بچوں کو اسکول کے دوران موبائل فون استعمال کرنے کی اجازت نہیں ہوگی۔

یہ بھی پڑھئے: روس کا ایران کے دارخوین جوہری پاور پلانٹ پر حملے پرشدید رد عمل

مجوزہ پابندی صرف تدریسی اوقات تک محدود نہیں رہے گی بلکہ وقفے، اسکول کیفے ٹیریا، کھیل کے اوقات اور اسکول کے احاطے میں ہونے والی رضاکارانہ سرگرمیوں کے دوران بھی طلبہ موبائل فون استعمال نہیں کر سکیں گے۔ البتہ بل میں بعض طلبہ کے لیے خصوصی رعایت بھی رکھی گئی ہے۔ اس کے مطابق جن طلبہ کو طبی وجوہات یا خصوصی تعلیمی ضروریات کے باعث الیکٹرانک آلات استعمال کرنے کی ضرورت ہو، انہیں اس پابندی سے مستثنیٰ رکھا جائے گا۔ اسی طرح اگر کسی سبق، عملی سرگرمی یا تعلیمی دورے کے دوران موبائل فون یا دیگر الیکٹرانک آلات کو تدریسی مقصد کے لیے ضروری قرار دیا جائے تو اسکول انتظامیہ ان کے محدود استعمال کی اجازت دے سکے گی۔
چیک حکومت کا کہنا ہے کہ اس اقدام کا مقصد طلبہ کی تعلیمی توجہ میں اضافہ، کلاس روم میں نظم و ضبط کو بہتر بنانا اور بچوں میں اسکرین ٹائم کم کرنا ہے۔ تاہم اس مجوزہ قانون کے نافذ ہونے سے قبل اسے چیک پارلیمنٹ کی منظوری حاصل کرنا ضروری ہوگی۔ اگر پارلیمنٹ اس بل کی توثیق کر دیتی ہے تو نئی پابندیاں ستمبر ۲۰۲۷ء سے ملک بھر کے متعلقہ تعلیمی اداروں میں نافذ ہو جائیں گی۔