امریکی گلوکار اور راک بینڈ ڈیو میتھیوز بینڈ کے سربراہ نے اپنے ۲۰۲۶ء کے دورۂ موسیقی کے دوران کنسرٹس کے اختتام پر فلسطین کے حق میں پیغامات والے پلے کارڈز اٹھا کر غزہ میں جاری تباہی کی طرف توجہ مبذول کرائی۔ ان پلے کارڈز پر ’فری فلسطین‘، ’یہ نسل کشی ہے‘ اور ’بچوں کا قتل بند کرو‘ کے نعرے درج تھے۔

نیوز ویب سائٹ کیپیٹل پرینسا کی ۱۱؍ نومبر کی رپورٹ کے مطابق، ڈیو میتھیوز نے یہ پلے کارڈز اپنے حالیہ کنسرٹس کے آخری لمحات میں دکھائے۔ ان پیغامات کی ویڈیوز سوشل میڈیا پر بھی گردش کر رہی ہیں۔ ان کا یہ اقدام ایسے وقت سامنے آیا ہے جب غزہ میں اسرائیلی فوجی کارروائیوں اور شہری آبادی کو پہنچنے والے نقصان پر عالمی سطح پر فنکاروں اور موسیقاروں کی جانب سے آواز اٹھائی جارہی ہے۔ ڈیو میتھیوز بینڈ نے ۱۰؍ نومبر کو امریکی شہر بالٹی مور کے سی ایف جی بینک ایرینا میں پرفارم کیا۔ رپورٹ کے مطابق تقریباً ۳؍ گھنٹے جاری رہنے والا یہ کنسرٹ شائقین سے کھچا کھچ بھرے ہال میں منعقد ہوا۔ میتھیوز کے فلسطین سے متعلق پیغامات اسی دورۂ موسیقی کے دوران توجہ کا مرکز بنے ہیں۔ یہ پہلا موقع نہیں جب میتھیوز نے اپنے کنسرٹ کے اسٹیج کو فلسطین کے حق میں آواز بلند کرنے کے لیے استعمال کیا ہو۔ ۲۰۲۵ء میں نیو جرسی کے ایک کنسرٹ کے دوران بھی انہوں نے فلسطینی رومال پہن کر ’نسل کشی بند کرو‘ اور ’بچوں کا قتل بند کرو‘ کے پیغامات والے پلے کارڈز اٹھائے تھے۔ اس وقت بھی ان کے اس اقدام کی خبریں سامنے آئی تھیں۔

Dave Matthews holds up signs at his show last night in Providence, RI: “FREE PALESTINE” “THIS IS A GENOCIDE” “STOP KILLING CHILDREN” Video: @kimperfection https://t.co/YcAzZlOv9Q

— Marco Foster (@MarcoFoster_) November 10, 2026

رواں سال جون میں شمالی کیرولائنا کے شہر ریلی میں ایک کنسرٹ کے دوران میتھیوز نے اسرائیل پر اپنی تنقید کے حوالے سے بھی وضاحت پیش کی تھی۔ انہوں نے اسٹیج پر تحریری بیان پڑھتے ہوئے کہا تھا کہ وہ اسرائیل اور امریکی حکومت کی پالیسیوں اور غزہ و مغربی کنارے کے شہریوں کے ساتھ ان کے سلوک سے اختلاف رکھتے ہیں، لیکن ان کے موقف کو یہود دشمنی یا کسی مذہبی گروہ کے خلاف تعصب کے طور پر پیش نہیں کیا جانا چاہیے۔ انہوں نے یہودی عوام کی تاریخ اور ثقافت کے لیے اپنے احترام کا اظہار بھی کیا تھا۔ میتھیوز نے ۷؍ اکتوبر ۲۰۲۳ء کو اسرائیل پر حماس کے حملے کو خوف ناک اور پرتشدد واقعہ قرار دیا تھا، تاہم ان کا کہنا تھا کہ اس کے بعد فلسطینی عوام پر مسلط ہونے والی جنگ اور تشدد بھی اتنا ہی ہولناک ہے اور اس سے ان کی تکالیف میں مسلسل اضافہ ہوا ہے۔ انہوں نے غزہ، مغربی کنارے اور لبنان میں تشدد ختم کرنے کا مطالبہ کرتے ہوئے کہا تھا کہ وہ اس کے خلاف آواز اٹھاتے رہیں گے۔

یہ بھی پڑھئے: غزہ معاملے پر امریکی کارکنوں کا آئی سی سی سے ٹرمپ اور روبیو کے گرفتاری وارنٹ جاری کرنے کا مطالبہ

ڈیو میتھیوز کے حالیہ پلے کارڈز نے ایک بار پھر یہ بحث نمایاں کردی ہے کہ موسیقار اور فنکار اپنے فن کے ذریعے سیاسی اور انسانی مسائل پر کس حد تک اظہارِ خیال کرسکتے ہیں۔ یاد رہے کہ حالیہ مہینوں میں امریکی ریپر میکلمور بھی فلسطین کے حق میں اپنے بیانات اور پرفارمنس کے باعث خبروں میں رہے ہیں۔ ستمبر میں نیو جرسی کے ایک بڑے اسٹیڈیم میں ان کے ’فری فلسطین‘ کے نعرے اور غزہ سے متعلق پیغامات پر تنازع پیدا ہوا تھا۔ بعد ازاں انہیں ایڈ شیرن کے دورۂ موسیقی سے الگ کردیا گیا، جس کے بارے میں میکلمور نے کہا تھا کہ ان کے فلسطین نواز موقف پر بعض مقامات نے اعتراض کیا تھا۔