درخواست کے مطابق، ہندوستان فیفا کے سب سے بڑی ویورشپ مارکیٹس میں سے ایک ہے۔ ملک میں ۲۰۲۲ء کے ورلڈ کپ کے دوران ۷ء۷۴۵ ملین انٹریکشنز ریکارڈ کئے گئے تھے۔ درخواست میں کہا گیا ہے کہ کسی بھی براڈکاسٹر نے ابھی تک ٹورنامنٹ کیلئے ہندوستانی میڈیا حقوق حاصل نہیں کئے ہیں۔

دہلی ہائی کورٹ نے ملک میں فیفا ورلڈ کپ ۲۰۲۶ء کی ٹیلی کاسٹ سے متعلق ایک درخواست پر مرکزی وزارتِ اطلاعات و نشریات اور پرسار بھارتی کو نوٹس جاری کئے ہیں۔ عدالت نے مشاہدہ کیا کہ درخواست میں مانگی گئی رعایتیں مفادِ عامہ کی عرضی کی نوعیت کی ہیں۔ جسٹس پروشیندر کمار کورو نے اس معاملے کی سماعت اگلے ہفتے مقرر کی ہے۔

یہ درخواست ایڈووکیٹ اودھیش بیروا کی جانب سے دائر کی گئی تھی جس میں پرسار بھارتی کے ذریعے فیفا ورلڈ کپ ۲۰۲۶ء کی نشریات کو یقینی بنانے کی ہدایات مانگی گئی ہیں۔ درخواست گزار کی جانب سے پیش ہونے والے سینئر ایڈووکیٹ ویبھو گگر نے عدالت کو بتایا کہ ”وہ پہلے ہی کوشش کر رہے ہیں اور عدالت کی مداخلت اس میں مددگار ثابت ہوگی۔“

یہ بھی پڑھئے: مودی کی ایندھن بچاؤ مہم، آئی ٹی ملازمین نے ورک فرام ہوم کا مطالبہ کیا

درخواست میں خاص طور پر افتتاحی میچ، کوارٹر فائنلز، سیمی فائنلز اور فائنل کی ’فری ٹو ایئر‘ (مفت) ٹیلی کاسٹ کا مطالبہ کیا گیا ہے۔ اس میں حکام کو ٹورنامنٹ کے تمام ۱۰۴ میچوں کے نشریاتی حقوق حاصل کرنے کی ہدایات دینے کی استدعا کی گئی ہے۔ واضح رہے کہ ۱۱ جون سے ۱۹ جولائی ۲۰۲۶ء کے درمیان منعقد ہونے والے فیفا ورلڈ کپ ۲۰۲۶ء کی مشترکہ میزبانی امریکہ، کنیڈا اور میکسیکو کریں گے۔

درخواست کے مطابق، ہندوستان فیفا کی سب سے بڑی ویورشپ مارکیٹس میں سے ایک ہے۔ ملک میں ۲۰۲۲ء کے ورلڈ کپ کے دوران ۷ء۷۴۵ ملین انٹریکشنز ریکارڈ کئے گئے تھے۔ درخواست میں کہا گیا ہے کہ کسی بھی براڈکاسٹر نے ابھی تک ٹورنامنٹ کیلئے ہندوستانی میڈیا حقوق حاصل نہیں کئے ہیں۔ اس میں مزید دعویٰ کیا گیا کہ مارکیٹ میں محدود دلچسپی کے بعد فیفا نے ہندوستان کیلئے ۲۰۲۶ء اور ۲۰۳۰ء کے مشترکہ ورلڈ کپ حقوق کی قیمت ۱۰۰ ملین امریکی ڈالر سے کم کرکے ۳۵ ملین امریکی ڈالر کر دی تھی۔ درخواست کے مطابق، جیو اسٹار کی جانب سے مبینہ طور پر دی گئی ۲۰ ملین امریکی ڈالر کی بولی کو مسترد کر دیا گیا تھا۔

یہ بھی پڑھئے: اقلیتی اداروں کو ’آرٹی ای‘ کے تحت لانے کی عرضداشت

درخواست گزار نے دلیل دی کہ ٹورنامنٹ کی ٹیلی کاسٹ کو یقینی بنانے میں ناکامی ہندوستانی شہریوں کو معلومات حاصل کرنے اور قومی اہمیت کے کھیلوں کے مقابلوں تک رسائی کے ان کے بنیادی حق سے محروم کر دے گی۔ درخواست میں معاملے کی حساسیت اور عجلت پر زور دیا گیا کیونکہ ٹورنامنٹ کا آغاز ۱۱ جون سے ہونا طے پایا ہے۔