الہاس نگر میونسپل انتظامیہ نے شانتی نگر علاقے میں موجود شمشان بھومی میں ڈاکٹر بابا صاحب امبیڈکر کا مجسمہ نصب کیا ہے۔

یہاں شانتی نگر میں واقع شمشان بھومی میں ڈاکٹر بابا صاحب امبیڈکر کا مجسمہ نصب کرنے سے ان کے پیروکاروں میں زبردست ناراضگی پائی جارہی ہے اور مجسمے کو کسی دوسرے پُروقار مقام پر منتقل کرنے کا مطالبہ کیا جارہا ہے۔ اس سلسلے میں امبیڈکر کے پیروکاروں اور سماجی کارکنوں کی ایک بڑی تعداد نے الہاس نگر ریلوے اسٹیشن کے باہر جمع ہو کر خاموش احتجاج کیا اور انتظامیہ کے خلاف اپنی ناراضگی کا اظہار کیا۔ 
الہاس نگر میونسپل انتظامیہ نے شانتی نگر علاقے میں موجود شمشان بھومی میں ڈاکٹر بابا صاحب امبیڈکر کا مجسمہ نصب کیا ہے۔ مقامی امبیڈکری برادری اور پیروکاروں کا مطالبہ ہے کہ ایک ایسی عظیم شخصیت جنہوں نے ملک کو دستور دیا ان کا مجسمہ قبرستان یا شمشان بھومی جیسی جگہ پر ہونا ان کی توہین کے مترادف ہے۔ مظاہرین کا کہنا ہے کہ اس مجسمہ کو شہر کے کسی مرکزی اور باعزت مقام پر منتقل کیا جائے تاکہ عوام مناسب طریقے سے انہیں خراجِ عقیدت پیش کر سکیں۔ 

یہ بھی پڑھئے: ٹی ای ٹی کے مشکل ہونے کےباوجود ان اساتذہ نے کئی مرتبہ یہ امتحان پاس کیا

جمعہ کی صبح الہاس نگر ریلوے اسٹیشن کے باہر مظاہرین نے بینرز اور پلے کارڈز تھامے پُرامن طریقے سے اپنا احتجاج ریکارڈ کرایا۔ مظاہرے میں شریک افراد نے واضح کیا کہ اس حوالے سے انتظامیہ کو عرضداشت دی گئی ہے لیکن اب تک کوئی ٹھوس کارروائی عمل میں نہیں لائی گئی۔ مظاہرین نے میونسپل کارپوریشن اور مقامی انتظامیہ سے مطالبہ کیا ہے کہ وہ اس معاملے کی حساسیت کو سمجھتے ہوئے فوری طور پر مجسمے کی منتقلی کے لئے جگہ کا تعین کریں اور اس عمل کو مکمل کریں۔ انہوں نے انتباہ دیا کہ اگر ان کے مطالبات کو نظر انداز کیا گیا تو وہ مستقبل میں اپنے احتجاج کو مزید تیز کرنے پر مجبور ہوں گے۔ اس موقع پر امن و امان کی صورتحال برقرار رکھنے کیلئے ریلوے اسٹیشن کے گرد و نواح میں پولیس کی نفری بھی تعینات کی گئی تھی۔