وزیراعلیٰ دیویندر فرنویس نے کانگریس پر چین سے فنڈنگ پر ملک میں انتشار پھیلانے کا الزام لگایا،نائب وزیر اعلیٰ ایکناتھ شندے نے بھی خطاب کیا۔

اتوار کو جب دہلی میں انڈیا اتحاد کے لیڈروں کی قیادت میں ووٹ چوری، ایس آئی آر اور گیانیش کمار کے استعفیٰ کیلئے ریلی نکالی گئی تھی اسی وقت  ایکناتھ شندے کے گڑھ تھانے میں بی جےپی کی جانب سے ’لوک تنتر بچاؤ پد یاترا ‘ (جمہوریت بچاؤ پیدل مارچ) نکالی گئی۔ اس ریلی میں مہاراشٹر کے وزیر اعلیٰ دیویندر فرنویس،نائب وزیر اعلیٰ ایکناتھ شندے، مرکزی وزیر بھوپیندر یادو اور مہایوتی اتحاد کے دیگر لیڈر بھی شامل ہوئے۔ ریلی میں وزیر اعلیٰ دیویندر فرنویس انڈیا اتحاد اور خصوصی طورپر کانگریس پر ووٹ چوری کے نام پر کئے جانے والے مظاہروں پر شدید تنقید کی۔ انہوں نے الزام لگایا کہ ملک میں انتشار اور بے چینی پیدا کرنے کیلئے کانگریس کو چین سے فنڈنگ ہو رہی ہے۔ فرنویس نے عزم کیا کہ جب تک آخری بنگلہ دیشی درانداز کو ووٹر لسٹ سے نہیں نکالا جاتا، تب تک جدوجہد جاری رہے گی۔

 ریلی کہا ں سے کہاں نکالی گئی؟

یہ ریلی صبح تقریباً ساڑھے ۹؍بجے تھانے کے پانچ پکھاڑی علاقے میںتھانے میونسپل کارپوریشن ہیڈ کوارٹر کے قریب واقع ’پرمارتھ نیکیتن‘ سے شروع ہو کر چندن واڑی، المیڈا چوک اور دگڑی اسکول کے راستے سے گزرتے ہوئے تلاؤ پالی پر واقع پنیہ سلوک اہلیہ دیوی ہولکر کے مجسمے کے پاس ختم ہوئی جہاں ایک عوامی جلسہ میں وزیر اعلیٰ ، نائب وزیر اعلیٰ اور دیگر لیڈروں نے خطاب کیا۔

یہ بھی پڑھئے: میرا بھائندر میں ریاستی حکومت کا ’سیوا سنکلپ ابھیان‘

ریلی کا مقصد

یہ ریلی اپوزیشن انڈیا اتحاد بالخصوص کانگریس اور اس کے اتحادیوں کی جانب سے آئین اور جمہوری اداروں کے خلاف مبینہ کوششوں،’ووٹ چوری‘ کے الزامات اور عدم استحکام پیدا کرنے کے خلاف طاقت کا مظاہرہ کرنے کیلئے نکالی گئی تھی۔ وزیر اعلیٰ دیویندر فرنویس نے تھانے کی ریلی میں کانگریس پر براہ راست چین سے فنڈنگ حاصل کرنے کا سنسنی خیز الزام لگایا ہے۔ انہوں نے اپنے خطاب میں راہل گاندھی کو مخاطب کرتے ہوئے سوال کیا کہ ’’راہل جی، مجھے جواب دیں کہ ہندوستان کو نقصان پہنچانے کیلئے چین کی طرف سے آپ کی کانگریس پارٹی اور آپ کے ٹرسٹ کو کتنا فنڈ (ڈونیشن) ملا ہے؟ ‘‘ انہوں نے الزام لگایا کہ کانگریس چین سے ملنے والے اس فنڈ کا استعمال ملک کے اندر انتشار، بے چینی اور بدامنی پھیلانے کیلئے کر رہی ہے۔

 غیر ملکی سازش کا دعویٰ

وزیر اعلیٰ نے مزید کہا کہ جس طرح پڑوسی ممالک (جیسے نیپال، بنگلہ دیش اور سری لنکا) میں  حکومتوں کو غیر مستحکم کیا گیا، اسی طرح کی غیر ملکی فنڈڈ سازشیں ہندوستان کے آئینی اداروں کے خلاف بھی رچی جا رہی ہیں۔

اسی دوران ایکناتھ شندے نے خطاب کرتےہوئے کہاکہ کانگریس اپنے مفاد کیلئے نوجوانوں کا استعمال کر رہی ہے۔ انہوںنے ادھو ٹھاکرے کا نام لئے بغیر انہیں  نشانہ بناتے ہوئے کہا کہ بی ایم سی میں ’نوٹ’ چرانے والے آج ووٹ چوری کی باتیں کرنے لگے۔

راہل اور کانگریس پر آئین کوتوڑنے کا الزام 

وزیر اعلیٰ دیویندر فرنویس نے کانگریس اور راہل گاندھی پر سخت تنقید کرتے ہوئے کہا کہ کانگریس کی لڑائی بی جے پی یا نریندر مودی سے نہیں بلکہ ہندوستان اور ہندوستانی آئین کے خلاف ہے۔ انہوں نے الزام لگایا کہ جو لوگ’ووٹ چوری‘ کا الزام لگا رہے ہیں، حقیقت میں وہی آئین کو توڑنے والے ہیں۔ انہوں نے مزید کہا کہ جب تک آخری بنگلہ دیشی درانداز کو ووٹر لسٹ سے نہیں نکالا جاتا، تب تک جدوجہد جاری رہے گی۔