ڈاکٹر سرینواس مکملا امریکن میڈیکل اسوسی ایشن (اے ایم اے) کے ۱۸۰؍ ویں صدر منتخب ہوئے ہیں۔ وہ پہلے ہند نژاد امریکی ہیں جنہیں اس عہدے پر فائز کیا گیا ہے۔

سرینواس ’’بوبی‘‘ مکملا ہندوستانی نژاد پہلے ایسے شخص بن گئے ہیں جنہیں امریکن میڈیکل اسوسی ایشن (اے ایم اے) کے صدر منتخب کیا گیا ہے، جو امریکہ میں ڈاکٹروں کی سب سے بڑی پیشہ ورانہ تنظیم ہے۔ مکملا نے شکاگو میں اپنی افتتاحی تقریب کے دوران کہا کہ ’’مَیں خوش ہوں اور یہ حیرت انگیز ہے۔‘‘ وہ اے ایم اے کے ۱۸۰؍ ویں صدر بنے ہیں۔ یو ایس نیوز کے مطابق، مکملا فلنٹ، مشی گن میں مقیم ایک تجربہ کار ای این ٹی ماہر ہیں اور ان کے پاس دو دہائیوں سے زیادہ کا طبی تجربہ ہے۔ ۱۹۷۲ء میں آندھرا پردیش سے تارکین وطن والدین کے ہاں پیدا ہوئے۔ وہ میک لارن فلنٹ اور ہرلے میڈیکل سینٹر جیسے کئی ممتاز اسپتالوں سے وابستہ ہیں۔ وہ یونیورسٹی آف مشی گن میڈیکل اسکول سے فارغ التحصیل ہیں۔ 

یہ بھی پڑھئے: امریکہ کادعویٰ:نیوآرک ایئرپورٹ پر زیر حراست،ہندوستانی نوجوان،درست ویزے کے بغیرامریکہ میں داخل ہواتھا

اوٹولرینگولوجی کے شعبے میں ان کا ایک معروف نام ہے۔ پچھلے سال، مکملا کا ایم آر آئی سکین ہوا جس میں ان کے دماغ کے عارضی لاب میں ۸؍ سینٹی میٹر ٹیومر کا انکشاف ہوا۔ تشخیص کے تین ہفتے بعد ان کی سرجری ہوئی جس نے ۹۰؍ فیصد ٹیومر کو کامیابی سے ہٹا دیا۔ اے این آئی کی ایک رپورٹ کے مطابق ڈاکٹر سرینواس نے صدر بننے کے بعد کہا کہ ’’ہمارے صحت کے نظام کو بہت سے ہنر مند ڈاکٹروں کی تجاویز کی ضرورت ہے، ہر ریاست کے ماہر ڈاکٹر لیڈر ہیں اور ہم سب ایک ناقابل یقین مقصد کی جانب تیزی سے بڑھ رہے ہیں۔ ‘‘ مکملا نے روشنی ڈالی کہ لاکھوں امریکیوں کو علاج کی تلاش میں تاخیر، مالی مجبوریوں اور غیر یقینی صورتحال کا سامنا کرنا پڑتا ہے۔
واضح رہے کہ مکملا کی صدارت ایک ایسے وقت میں ہوئی ہے جب اے ایم اے صحت عامہ میں وسیع اصلاحات پر زور دے رہی ہے۔ ان کی قیادت میں اسوسی ایشن نے حال ہی میں الٹرا پروسیسڈ فوڈز کے خطرات اور مناسب غذائیت کی اہمیت کے بارے میں بیداری پیدا کرنے کیلئے ایک پالیسی اپنائی ہے۔