آر بی ایل بینک نے کہا کہ سرمایہ کاری ترجیحی ایشو کے ذریعے کی جائے گی، جس میں۲۸۰؍ روپے فی حصص کے حساب سے۰۴ء۹۵۹؍ ملین شیئرز جاری کیے جائیں گے۔

متحدہ عرب امارات کی  ایمریٹس این بی ڈی بینک نے ہندوستانی نجی بینک آر بی ایل بینک میں بڑی سرمایہ کاری کرنے کا فیصلہ کیا ہے۔ اس معاہدے کی قیمت تقریباً۲۶۸۵۰؍ کروڑ روپے ہے، جس کا تخمینہتقریباً ۳؍بلین ڈالرس ہے۔ معاہدے کے تحت  ایمریٹس این بی ڈی آر بی ایل  بینک کا۶۰؍ فیصد تک حاصل کرے گا، جو کہ کسی ہندوستانی نجی بینک میں آج تک کی سب سے بڑی بیرون ملک  سرمایہ کاری ہے۔ معاہدے کا اعلان ہفتے کے روز کیا گیا تھا اور یہ ریگولیٹری منظوری اور دیگر شرائط سے مشروط ہے۔
آر بی ایل بینک نے کہا کہ سرمایہ کاری ترجیحی ایشو کے ذریعے کی جائے گی، جس میں ۲۸۰؍روپے فی حصص کے حساب سے ۰۴ء۹۵۹؍ ملین شیئرس ہوں گے جبکہ حتمی تعداد غیر ملکی ملکیت کی حدود پر منحصر ہوگی، امارات  این بی ڈی کم از کم ۵۱؍فیصدحصص حاصل کرے گا۔
اوپن آفر اور انضمام کے منصوبے
اس معاہدے کے ساتھ، ایمریٹس  این بی ڈی کو سیبی  کے ضوابط کے مطابق، عوامی حصص یافتگان سے آر بی ایل  بینک کے۲۶؍فیصد حصص کے حصول کے لیے کھلی پیشکش کرنے کی ضرورت ہوگی۔ یہ پیشکش ۲۸۰؍ فی شیئر کے حساب سے۵۸ء۴۱۵؍ ملین شیئرز کے لیے ہوگی۔ مزید برآں، ایمریٹس  این بی ڈی  کی ہندوستان میں ۳؍ شاخیں ممبئی، دہلی اور چنئی آر بی ایل  بینک کے ساتھ ضم ہو جائیں گی۔ انضمام کے بعد ایمریٹس  این بی ڈی کو اسی شرح پر اضافی حصص ملے گا۔

یہ بھی پڑھئے:چاندی کی قیمت : ایک ہفتے میں چاندی۸؍ہزار روپے سستی ہو گئی

معاہدے کی تکمیل کے بعد ایمریٹس این بی ڈی آر بی ایل  بینک کا پروموٹر بن جائے گا اور اپنے ڈائریکٹرز کو بورڈ میں نامزد کر سکے گا۔ ایمریٹس  این بی ڈی  گروپ کے سی ای او شین نیلسن نے کہاکہ آر بی ایل  بینک میں ہماری سرمایہ کاری ہندوستان کی تیزی سے بڑھتی ہوئی معیشت پر ہمارے اعتماد کی عکاسی کرتی ہے۔ یہ شراکت داری آر بی ایل کی گھریلو طاقت کو ہماری علاقائی رسائی اور مالیاتی معلومات کے ساتھ جوڑ دے گی، جس سے ترقی اور اختراع کے لیے ایک نیا پلیٹ فارم تیار ہوگا۔  انہوں نے مزید کہا کہ  آر بی ایل  بینک جیسی مضبوط کمپنی کا ہونا ہندوستان میں ہماری موجودگی کو مزید مضبوط کرے گا، جس سے مشرق وسطیٰ، شمالی افریقہ، ترکی اور جنوبی ایشیا میں صارفین کو فائدہ پہنچے گا۔
آر بی ایل بینک کے ایم ڈی اور سی ای او آر سبرامنیا کمار  نے کہا کہ یہ شراکت داری ہمیں ایک مضبوط اور عالمی سطح پر قابل احترام اینکر شیئر ہولڈر فراہم کرے گی، جو ہمارے مستقبل کے لیے ایک ٹھوس سرمایہ کی بنیاد بنائے گی۔ ہم اس اتحاد کی صلاحیت سے پرجوش ہیں اور ہمیں یقین ہے کہ یہ تمام اسٹیک ہولڈرز کو بہتر قدر فراہم کرے گا۔