سوشل میڈیا پر وائرل ایک تصویر اور دعویٰ میں کہا گیا ہے کہ نئی ایپسٹین فائلز سے انکشاف ہوا کہ بل گیٹس نے ۲۰۱۷ء میں جیفری ایپسٹین کے ساتھ وبا کی منصوبہ بندی کی۔ دستیاب حقائق اور مصدقہ رپورٹس کے مطابق یہ دعویٰ درست نہیں اور گمراہ کن ہے۔ کسی معتبر عدالتی دستاویز یا تحقیق میں ایسی بات ثابت نہیں ہوتی۔

سوشل میڈیا پر ایک تصویر اور سرخی تیزی سے وائرل ہو رہی ہے جس میں دعویٰ کیا جا رہا ہے کہ نئی ایپسٹین فائلز کے مطابق بل گیٹس نے ۲۰۱۷ء میں جیفری ایپسٹین کے ساتھ وباکی سمیولیشنز کی منصوبہ بندی کی، یعنی کووِڈ ۱۹؍ کے آغاز سے تین سال پہلے۔ اس دعوے کو مختلف پلیٹ فارمز پر بغیر سیاق و سباق کے پھیلایا جا رہا ہے۔حقائق کی جانچ سے واضح ہوتا ہے کہ یہ دعویٰ ثبوت سے عاری اور گمراہ کن ہے۔ دستیاب عدالتی ریکارڈز، مستند صحافتی تحقیقات اور عوامی بیانات میں ایسا کوئی ثبوت موجود نہیں جو یہ ثابت کرے کہ بل گیٹس نے جیفری ایپسٹین کے ساتھ کسی وبا کی منصوبہ بندی یا پلاننگ کی ہو۔ یہ درست ہے کہ بل گیٹس نے ماضی میں عالمی صحت، وبائی امراض سے نمٹنے اور وبا کی تیاری جیسے موضوعات پر کام کیا اور مختلف عالمی فورمز پر پینڈیمک پری پیئرڈنیس کی وکالت کی۔ تاہم، یہ سرگرمیاں عوامی، دستاویزی اور پالیسی سطح کی تھیں اور انہیں خفیہ سازش یا کسی مجرمانہ سرگرمی سے جوڑنے کا کوئی جواز موجود نہیں۔

یہ بھی پڑھئے: دنیا کے امیر تر افراد کی دولت میں تیزی سے اضافہ کیوں ہورہا ہے؟

اسی طرح، وباؤں کی سمیولیشن ایکسرسائزز (مثلاً صحت عامہ کے خطرات سے نمٹنے کی مشقیں) دنیا بھر میں حکومتیں، ادارے اور ماہرین دہائیوں سے کرتے آ رہے ہیں۔ یہ مشقیں سائنسی اور پالیسی منصوبہ بندی کا حصہ ہوتی ہیں، نہ کہ کسی وبا کو ’’پلان‘‘ کرنے کا ثبوت۔ جہاں تک جیفری ایپسٹین کا تعلق ہے، مختلف قانونی دستاویزات اور میڈیا رپورٹس میں اس کے بعض بااثر افراد سے روابط کا ذکر ضرور آیا، لیکن کسی معتبر عدالتی دستاویز یا مصدقہ رپورٹ میں یہ بات ثابت نہیں ہوئی کہ اس نے بل گیٹس کے ساتھ وبا کی منصوبہ بندی کی ہو۔ وائرل تصویر میں جس سرخی کا حوالہ دیا جا رہا ہے، وہ کسی مستند عدالتی فیصلے یا تحقیق سے ماخوذ نہیں۔ مزید یہ کہ، سوشل میڈیا پر گردش کرنے والی تصاویر اور سرخیاں اکثر سیاق و سباق سے ہٹ کر یا قیاس آرائی پر مبنی ہوتی ہیں۔ ایسی پوسٹس میں ’’نیو فائلز‘‘ یا ئ’انکشاف‘‘ جیسے الفاظ کرکے دعوے کو مستند ظاہر کیا جاتا ہے جبکہ اصل میں کوئی بنیادی ثبوت پیش نہیں کیا جاتا۔

یہ بھی پڑھئے: اٹلی: چرچ کے فرشتے کی بحالی تنازع، چہرہ وزیر اعظم میلونی سے مشابہ

حقائق جانچنے والے ماہرین اس بات پر متفق ہیں کہ کووِڈ ۱۹؍ کی ابتدا اور پھیلاؤ پر عالمی سطح پر تحقیق ہوئی ہے، لیکن اسے کسی فرد یا فلاحی ادارے کی منصوبہ بندی سے جوڑنے کا دعویٰ سائنسی اور قانونی بنیادوں پر درست ثابت نہیں ہوا۔خیال رہے کہ اب تک کسی مستند عدالتی دستاویز، مصدقہ ایپسٹین فائل، یا معتبر تحقیق میں یہ ثابت نہیں ہوا کہ بل گیٹس نے ۲۰۱۷ء میں جیفری ایپسٹین کے ساتھ وبا کی منصوبہ بندی کی ہو۔