پربھنی ۔ ہنگولی سیٹ سے کامیابی حاصل کرنے والے سعید خان کو کونسل کے چیئرمین نے حلف دلایا اور وزیر اعلیٰ نے تعارف پیش کیا۔

قانون ساز کونسل کے نومنتخب  رکن سعید خان عرف ’گبر‘نے بدھ کو رکنیت کا حلف لیا۔ کونسل کے چیئرمین پروفیسر رام شندے نے سعید خان(۴۶) کو حلف دلایا۔ پربھنی سے تعلق رکھنے والے سعید خان ایکناتھ شندے کی قیادت والی شیو سینا کے پہلے مسلم رکن کونسل ہیں۔پروفیسر شندے کے دفتر میں منعقد اس پروگرام کے موقع پر قانون ساز کونسل کے سکریٹری۳؍ ڈاکٹر ولاس اٹھاؤلے، سیکریٹری ۴؍، شیو درشن ساتھیا موجود تھے۔ 

حلف برداری کےبعد ایوان کونسل میں وزیر اعلی دیویندر فرنویس نے سعید خان کا  تعارف کروایا اوران کا خیرمقدم کیا اور مستقبل  کیلئے نیک خواہشات کا اظہار کیا۔واضح رہےکہ سعید خان، اپنے آبائی شہر پاتھری میں ’گبر‘ کے نام سے مشہور ہیں،  انہوں نے پربھنی۔ہنگولی سیٹ سے کامیابی حاصل کی ۔۴؍سال پہلے، سعید خان منی لانڈرنگ کے ایک کیس میں ای ڈی کی طرف سے گرفتار ہونے کے بعد جیل میں تھے۔ سعید خان نے اپنے کریئر کا آغاز ایک ٹھیکیدار کے طور پر کیا اور آہستہ آہستہ مقامی سیاست دانوں سے روابط استوار کیا۔ ’گبر‘ کی عرفیت  برسوں سے ان کے نام کے ساتھ ہے۔ علاقے کے اکثر لوگ اصل نام سے زیادہ اس نام سے انہیں جانتے ہیں۔ان کا سیاسی عروج اس وقت شروع ہوا جب وہ شیو سینا کی سابق رکن پارلیمان بھاونا گاؤلی کے قریبی ساتھی بن گئے اور خطے میں اپنا اثر و رسوخ  بڑھایا۔

یہ بھی پڑھئے: جیل میں ۶؍ سال مکمل ہونے پر ’دی گارجین‘ میں عمرخالد کے انٹرویو کی اشاعت

۲۰۲۱ءمیں ای ڈی نے ا نہیں گاؤلی کی قائم کردہ’ مہیلا اتکرشا پرتشٹھان‘ میں مبینہ بے ضابطگیوں کے سلسلے میں گرفتار کیا۔ ایجنسی کا الزام تھاکہ تقریباً۷؍کروڑ روپے کے ٹرسٹ فنڈ کا غلط استعمال کیا گیا اور سعید خان اور دیگر نے جعلی دستاویزات کے ذریعے ٹرسٹ پر کنٹرول حاصل کیا ہے۔سعید خان نے جولائی ۲۰۲۲ءمیں بامبے ہائی کورٹ سے ضمانت حاصل کرنے سے پہلے ۹؍ماہ سے زیادہ جیل میں گزارے۔اپنی رہائی کے چند دنوں کے اندر، گاؤلی شیوسینا کی تقسیم کے بعد ایکناتھ شندے کے کیمپ میں شامل ہو گئیں۔ سعید خان کو بھی نئے سیاسی انتظام میں جگہ ملی۔اگلے چند برسوں میں، انہوں نے وزیر اعلیٰ ایکناتھ شندے اور ایم پی شریکانت شندے کے ساتھ قریبی تعلقات استوار کئے۔ پارٹی نے بعد میں انہیں اپنے اقلیتی ونگ کا سربراہ مقرر کیا، جس سے انہیں ایک بڑا تنظیمی کردار ملا۔