غیر ملکی ادارہ جاتی سرمایہ کاروں نے عالمی حالات کے پیش نظر اپنا سرمایہ ہندوستانی مارکیٹ سے نکالا ہے ۔

ممبئی(ایجنسی): غیر ملکی ادارہ جاتی سرمایہ کاروں (ایف پی آئی) نے اپریل کے مہینے میں ہندوستانی سرمایہ بازار سے ۷۰؍ ہزار ۴۴۹؍ کروڑ روپے کی خالص رقم نکال لی۔خالص نکاسی سے مراد وہ فرق ہے جو ایف پی آئی کی جانب سے سرمایہ بازار میں لگائی گئی اور نکالی گئی سرمایہ کاری کے درمیان ہوتا ہے۔ یہ مسلسل دوسرا مہینہ ہے جب ایف پی آئی فروخت کنندہ رہے ہیں۔ اس سے قبل مارچ میں انہوں نے ریکارڈ ایک لاکھ ۲۶؍ ہزار کروڑ  روپے نکالے تھے۔ 

یہ بھی پڑھئے: عالمی منڈیوں میں الیکٹرک کاروں کی فروخت میں بڑی کمی، چین اور امریکہ میں گراوٹ

سینٹرل ڈپازیٹری سروس کے اعداد و شمار کے مطابق اپریل میں ایف پی آئی نے ایکویٹی اور ڈیٹ دونوں سے سرمایہ نکالا جبکہ ہائبرڈ  اور میوچوئل فنڈز میں ان کی سرمایہ کاری بڑھی ہے۔ مالی سال ۲۷ءکے پہلے مہینے میں انہوں نے خالص طور پر ۵۸؍ ہزار کروڑ روپے کی ایکویٹی فروخت کی، جبکہ ڈیٹ سے بھی ۱۳؍ ہزارکروڑ روپے نکال لئے۔ حالانکہ ہائبرڈ  میں انہوں نے ۵۹۲؍کروڑ روپے کی سرمایہ کاری کی جبکہ میوچوئل  فنڈز میں ان کی سرمایہ کاری ۴۱۷؍ کروڑ روپے کے آس پاس رہی ہے۔  یاد رہے کہ موجودہ کیلنڈر سال میں ایف پی آئی نے فروری کو چھوڑ کر باقی تین مہینوں میں فروخت ہی کی ہے۔ اس سال اب تک انہوں نے ہندوستانی سرمایہ بازار سے مجموعی طور پر ایک لاکھ ۸۸؍ ہزار ۶۶۴؍ کروڑ  روپے کی خالص نکاسی کی ہے۔