اسرائیلی وزیر اتمار بن گویر کی جانب سے غزہ کی تباہی اور فلسطینی باشندوں کا مذاق اڑانے والی اے آئی ویڈیو سامنے آنے کے بعد فرانس نے انہیں تنقید کا نشانہ بنایا ہے۔ فرانسیسی وزارتِ خارجہ نے طنزیہ انداز میں کہا کہ جادو بھی بن گویر کے فرانس میں داخلے پر عائد پابندی ختم نہیں کرسکتا۔

فرانس نے بدھ کے روز اسرائیل کے قومی سلامتی کے وزیر اتمار بن گویر کو تنقید کا نشانہ بنایا۔ معاملہ ایک مصنوعی ذہانت (اے آئی) سے تیار کردہ ویڈیو کا ہے، جس میں غزہ کے باشندوں کو جادوئی انداز میں پیرس پہنچتے ہوئے دکھایا گیا ہے۔ فرانسیسی وزارتِ خارجہ کے ’فرینچ رسپانس‘ نامی اکاؤنٹ نے امریکی سوشل میڈیا پلیٹ فارم ’ایکس‘ پر کہا، ’’تصور کیجیے کہ آپ کے پاس ایک جادوئی چراغ ہے اور آپ اپنی خواہش بن گویر پر ضائع کردیتے ہیں۔ جادو بھی فرانس میں ان کے داخلے پر عائد پابندی ختم نہیں کرسکتا۔‘‘ واضح رہے کہ بن گویر نے منگل کے روز اسرائیل میں ۲۷؍ اکتوبر کو ہونے والے پارلیمانی انتخابات سے قبل جاری کردہ ایک انتخابی ویڈیو میں غزہ کی تباہی پر فخر کا اظہار کیا اور فلسطینی باشندوں کا مذاق اڑایا۔

Ben-Gvir mocks France unrest with AI video of Palestinian ‘expelled’ to Paris Israel’s National Security Minister shared an AI-generated clip in which Ben-Gvir appears as a genie and transports a Palestinian resident to Paris https://t.co/n2lQEHMf3i

— RT (@RT_com) October 20, 2026

انتہائی دائیں بازو کی جماعت ’جیوِش پاور‘ کے سربراہ بن گویر نے منگل ہی کو مصنوعی ذہانت سے تیار کردہ ایک اور ویڈیو بھی پوسٹ کی، جس میں ان کی حکومت کی جانب سے غزہ میں بڑے پیمانے پر کی گئی تباہی کی بنیاد پر ۲۰۳۰ء کے غزہ کا منظر پیش کیا گیا ہے۔ ویڈیو میں محصور غزہ کو ایک ویران شہر کے طور پر دکھایا گیا ہے، جہاں اسکول، بنیادی ڈھانچہ اور بندرگاہ تباہ ہوچکے ہیں۔ ایک منظر میں گدھا دکھانے کے بعد جماعت کا پیغام سامنے آتا ہے: ’’غزہ میں رہنے کیلئے آپ کو گدھا ہونا پڑے گا۔‘‘ اس طرح ویڈیو میں غزہ میں رہ جانے والے فلسطینیوں کا مذاق اڑایا گیا ہے۔ بن گویر نے بارہا غزہ پر قبضہ کرنے، فلسطینی آبادی کو وہاں سے بے دخل کرنے اور اس علاقے میں اسرائیلی بستیاں قائم کرنے کا مطالبہ کیا ہے۔

یاد رہے کہ اکتوبر ۲۰۲۳ء میں امریکہ کی حمایت سے شروع ہونے والی غزہ پر اسرائیل کی نسل کش جنگ میں ۷۴؍ ہزار سے زائد افراد ہلاک اور ایک لاکھ ۷۵؍ ہزار سے زیادہ زخمی ہوچکے ہیں، جبکہ شہری بنیادی ڈھانچے کا ۹۰؍ فیصد حصہ تباہ ہوگیا ہے۔ ۱۰؍ اکتوبر ۲۰۲۵ء سے نافذ جنگ بندی کے باوجود اسرائیل کی جانب سے گولہ باری، فائرنگ اور فلسطینی عمارتوں کو منہدم کرنے کا سلسلہ جاری ہے، جس سے تباہی میں مزید اضافہ ہوا ہے۔

یہ بھی پڑھئے: غزہ اور لبنان کے کوریج پر نیویارک ٹائمز کے دفتر کے باہر فلسطین حامیوں کا احتجاج

یہ انتخابی ویڈیو ایسے وقت میں سامنے آئی ہے جب عرب جماعتوں نے اتوار کے روز بن گویر پر الزام لگایا تھا کہ وہ فلسطینیوں کے خلاف اپنے اقدامات اور خلاف ورزیوں کو سیاسی حمایت حاصل کرنے اور عرب ووٹروں کو خوف زدہ کرنے کیلئے استعمال کررہے ہیں۔