فرانس میں قائم یورو فلسطین ایسوسی ایشن نے رمضان کے دوران مقبوضہ مغربی کنارے کی اسرائیلی بستیوں میں تیار کی جانے والی کھجوروں کے بائیکاٹ کی اپیل کی ہے۔ تنظیم کا کہنا ہے کہ بعض مصنوعات کی اصل کے بارے میں صارفین کو گمراہ کیا جا رہا ہے۔

فرانس میں قائم تنظیم EuroPalestine Association نے ملک میں فروخت ہونے والی ان کھجوروں کے بائیکاٹ کا مطالبہ کیا ہے جن کی پیداوار مبینہ طور پر مقبوضہ مغربی کنارے کی اسرائیلی بستیوں میں ہوتی ہیں۔ تنظیم کے مطابق رمضان المبارک کے دوران کھجوروں کی کھپت میں نمایاں اضافہ ہوتا ہے، اسی لیے اس عرصے میں صارفین کو مصنوعات کی اصل کے بارے میں آگاہ کرنا ضروری ہے۔ اسوسی ایشن کی صدر اولیویا زیمور نے کہا کہ فرانس میں فروخت ہونے والی مدجول برانڈ کی بڑی مقدار ایسی کمپنیوں سے آتی ہے جو غیر قانونی بستیوں یا قبضے سے منسلک ہیں۔ ان کے مطابق بعض پیکجنگ پر اردن یا مراکش کو اصل ملک ظاہر کیا جاتا ہے جبکہ مصنوعات درحقیقت اسرائیلی ہوتی ہیں۔

یہ بھی پڑھئے: میکسیکو کا ٹرمپ کے’’بورڈ آف پیس‘‘ کی مکمل رکنیت سے انکار، فلسطین کے حق میں موقف

لیبلنگ اور ضوابط کا سوال
زیمور نے کہا کہ فرانسیسی قوانین کے تحت فروخت کنندگان کے لیے لازم ہے کہ وہ خشک میوہ جات سمیت تمام مصنوعات کی اصل واضح طور پر درج کریں۔ ان کے مطابق مقبوضہ فلسطینی علاقوں میں تیار کردہ مصنوعات کو ’’اسرائیل‘‘ کا لیبل نہیں لگایا جا سکتا۔ تنظیم کے رضاکار سپر مارکیٹس میں آگاہی مہم چلا رہے ہیں تاکہ صارفین کو متبادل مصنوعات استعمال کرنے کی ترغیب دی جا سکے۔ زیمور نے دعویٰ کیا کہ بائیکاٹ سے اسرائیلی معیشت پر اثر پڑ سکتا ہے اور بعض ملٹی نیشنل کمپنیاں بھی اس مہم کا ہدف ہیں۔

وسیع تر تناظر
یہ اپیل ایسے وقت میں سامنے آئی ہے جب غزہ پٹی اور مغربی کنارے کی صورتحال عالمی توجہ کا مرکز بنی ہوئی ہے۔ فلسطینی وزارت صحت کے مطابق اکتوبر ۲۰۲۳ء سے جاری تنازع میں ہزاروں افراد ہلاک اور زخمی ہو چکے ہیں۔ یورو فلسطین کا کہنا ہے کہ صارفین کو چاہیے کہ وہ خریداری سے قبل مصنوعات کی اصل کی جانچ کریں اور ذمہ دارانہ انتخاب کریں۔