وزارت صحت نے خبردار کیا ہے کہ غزہ پٹی کے اسپتالوں کے بلڈ بینک مکمل طور پر بند ہونے کے قریب ہیں کیونکہ اسرائیلی حملوں میں زخمی ہونے والے فلسطینیوں کی بڑی تعداد طبی مراکز میں پہنچ رہی ہے۔

غزہ کی وزارت صحت کے بیان میں کہا گیا کہ خون کی یونٹس اور اجزاء کی منتقلی، جانچ اور ذخیرہ کرنے کیلئے ضروری لیبارٹری سپلائیز کی شدید کمی ہے، جس سے بلڈ بینک مکمل طور پر بند ہونے کے خطرے سے دوچار ہیں۔ بیان میں یہ بھی واضح کیا گیا کہ خون کی شدید قلت زخمیوں کیلئے جان بچانے والی مداخلت کو روک رہی ہے۔ فلسطینی مصنفہ دونیہ ابو سیطہ نے الجزیرہ میں لکھا کہ وہ خان یونس کے ناصر اسپتال کے قریب رہتی ہیں اور تقریباً روزانہ اسپتال کے باہر لاؤڈ اسپیکر پر خون کے عطیات کیلئے مایوس کن اعلانات سنتی ہیں۔

یہ بھی پڑھئے:وزیراعظم مودی نے اطالوی ہم منصب جارجیا میلونی کی کتاب کا پیش لفظ لکھا

جون ۲۰۲۴ء کے اوائل میں، لیبارٹری اور بلڈ بینک کی ڈائریکٹر ڈاکٹر صوفیہ زراب نے کہا تھا کہ خون کے عطیات کی قلت ’’انتہائی نازک‘‘ سطح پر پہنچ گئی ہے، جس سے ایسے مریضوں کی زندگیاں خطرے میں ہیں جنہیں فوری طور پر خون کی ضرورت ہے۔ ان کے مطابق پورے غزہ کو روزانہ ۴۰۰؍ یونٹس خون کی ضرورت ہے۔ غزہ کی وزارت صحت کے مطابق گزشتہ ۲۴؍ گھنٹوں کے دوران اسرائیلی حملوں میں کم از کم ۵۰؍ فلسطینی شہید اور ۱۸۴؍ زخمی ہوئے، جن میں پانچ امداد کے متلاشی بھی شامل ہیں۔