نیویارک کی گورنر کیتھی ہوچل نے مسلمان پولیس افسر کی نمازِ جنازہ میں شرکت کے دوران سر پر اسکارف پہننے پر امریکی سینیٹر ٹیڈ کروز کی تنقید کا دوٹوک جواب دیا ہے۔

میڈیا رپورٹس کے مطابق، مسلم پولیس اہلکار کے جنازے پر اسکارف پہننے سے متعلق تنازع اس وقت شروع ہوا جب ٹیکساس کے ریپبلکن سینیٹر ٹیڈ کروز نے ایک سوشل میڈیا پوسٹ میں نیویارک کی گورنر کیتھی ہوچل کی مسجد میں سر ڈھانپے ہوئے تصویر شیئر کی۔جنازے میں مذہبی آداب کی پاسداری کرتے ہوئے گورنر ہوچل سمیت پولیس کمشنر جیسیکا ٹش اور پولیس وردی میں ملبوس 100 سے زائد خواتین اہلکاروں نے حجاب پہن کر شرکت کی، جبکہ مردوں نے روایتی ٹوپیاں پہن رکھی تھیں۔ خواتین کے لیے الگ انتظامات کیے گئے تھے۔سینیٹر کروز نے تصویر پر طنزیہ تبصرہ کرتے ہوئے سوال اٹھایا: "نیویارک کی گورنر نے حجاب کیوں پہن رکھا ہے؟" اس پر گورنر ہوچل نے ردِعمل دیتے ہوئے اسے "غیر شائستہ اور غیر حساس" قرار دیا اور کہا کہ کسی سوگوار خاندان کے مذہب کا احترام صرف لیڈرز اور شائستہ لوگ ہی کرتے ہیں۔

یہ بھی پڑھئے: غزہ جنگ: نیتن یاہو حکومت قیدیوں کو بھی بھوکا مار رہی ہے: حماس

امریکہ کی سب سے بڑی مسلم سول رائٹس تنظیم ’کونسل آف امریکن-اسلامک ریلیشنز‘ (CAIR) نے بھی سینیٹر کروز کے بیان کی مذمت کرتے ہوئے اسے "قابلِ نفرت اور بے حرمتی پر مبنی" قرار دیا، اور معافی کا مطالبہ کیا۔ تنظیم نے یہ بھی نشاندہی کی کہ ماضی میں خود سینیٹر کروز یہودی مذہبی رہنماؤں کے ساتھ ملاقاتوں میں روایتی ٹوپی پہنے جا چکے ہیں، جو ان کے دوہرے معیار کو ظاہر کرتا ہے۔ جواب میں، سینیٹر کروز نے اپنے مؤقف پر قائم رہتے ہوئے طنزیہ انداز میں لکھا کہ گورنر کو "ہر روز حجاب پہننا چاہیے کیونکہ آپ بہت ’مہذب‘ ہیں۔"واضح رہے کہ ۲۸؍ جولائی کو نیویارک میں ایک مسلح شخص کی فائرنگ سے بنگلادیشی نژاد پولیس اہلکار دیدار الاسلام سمیت 4 افراد ہلاک اور ایک زخمی ہوا تھا، جبکہ حملہ آور نے خودکشی کر لی تھی۔