انکم ٹیکس محکمہ کے ملازمین نے مرکزی حکومت کو خط لکھ کر خبردار کیا ہے کہ اگر ان کے’’طویل عرصے سے زیر التوا‘‘ مسائل کو حل  اور کام کی’’غیر یقینی‘‘ نوعیت کو ختم نہ کیا گیا تو وہ۱۶؍ اپریل سے مرحلہ وار احتجاج شروع کریں گے۔ جوائنٹ کونسل ایکشن ( جے سی اے) کی جانب سے لکھا گیا یہ مکتوب وزارت خزانہ کے تحت  آنے والے ریونیو سیکریٹری کو بھیجا گیا ہے۔ جے سی آر میں محکمہ انکم ٹیکس  کے ملازمین کی۲؍ بڑی  تنظیمیں ’انکم ٹیکس ایمپلائز فیڈریشن‘(آئی ٹی ای ایف) اور انکم ٹیکس گزٹیڈ آفیسرز اسوسی ایشن (آئی ٹی جی  او اے) شامل ہیں۔اس لئے اگر احتجاج ہوتا ہے تو محکمہ کا کام کاج بری طرح متاثر ہوگا۔ 

آئی ٹی ای ایف اورآئی ٹی جی  او اے   محکمہ انکم ٹیکس  کے ان ملازمین کی  تقریباً۹۷؍ فیصد افرادی قوت کی نمائندگی کرتے ہیں جو حکومت کیلئے  انکم ٹیکس  شعبے میں آمدنی  اکٹھا کرنے کا براہ راست کام کرتے ہیں۔ انڈین ریونیو سروس  کے افسران کی نمائندگی کرنےوالی ایک تیسری تنظیم  بھی ہے۔ مذکورہ افسران مختلف شعبہ جات کے سربراہ کے طور پر ذمہ داریاں نبھاتے ہیں۔ 

۶؍ اپریل کو لکھے گئے خط میں جے سی اے  نے دس نکاتی زیر التوا مسائل کی تفصیل پیش کی  ہے اور  سنٹرل بورڈ آف ڈائریکٹ ٹیکسز  پر انہیں حل کرنے میں’’مسلسل بے حسی‘‘ کے مظاہرہ  کا الزام عائد کیا ہے۔واضح رہے کہ سی بی ڈی ٹی ہی  انکم ٹیکس محکمہ کی پالیسی بناتا ہے۔

 

 

تنظیم نے متنبہ کیا ہے کہ اگر مسائل کو مقررہ مدت میں حل نہ کیا گیا تو ۷؍ مرحلوں پر مشتمل احتجاجی پروگرام شروع کیا جائے گاجس کا آغاز ۱۶؍ اپریل کو محکمہ کے تمام دفاتر میں دوپہر کے وقفے کے دوران مظاہرے سے ہوگا۔بعد میں احتجاج میں شدت لائی جائے گی، جس میں سیاہ بیج پہننا اور شماریاتی رپورٹس جمع نہ کرانا شامل ہوگا اور بالآخر۱۳؍مئی کو دن بھر کی  مکمل ہڑتال کی جائے گی۔ تنظیم نے انسپکٹر، آفس سپرنٹنڈنٹ اور ٹیکس اسسٹنٹ کے عہدوں پر تقرری کے مسائل کو بھی اپنا موضوع بنایا ہے۔

 

 

 جوائنٹ کونسل ایکشن نے اپنے مسائل کو مختصراً یوں بیان کیا ہے کہ ’’ترقی کے مواقع میں رکاوٹ، ترقیوں کے کم امکانات، غیر معقول سالانہ تبادلے،  سروس کے غیرمستحکم اور غیر یقینی حالات، کام کا غیر ضروری  دباؤ، غیر حقیقت پسندانہ اہداف اور افرادی قوت  اور بنیادی ڈھانچے کی شدید کمی نے ہمارے ارکان کو انتہائی مشکل صورتحال میں پہنچا دیا ہے۔‘‘