مڈل ایسٹ آئی کے سینئر صحافی آزاد عیسیٰ کا ایکس (سابق ٹوئٹر) اکاؤنٹ ہندوستان میں بلاک کر دیا گیا ہے۔ پلیٹ فارم کے مطابق یہ کارروائی وزارت اطلاعات و نشریات کے حکم پر انفارمیشن ٹیکنالوجی ایکٹ ۲۰۰۰ء کی دفعہ ۶۹؍ اے کے تحت کی گئی۔

مڈل ایسٹ آئی کے صحافی Azad Essa (آزاد عیسیٰ) کا ایکس اکاؤنٹ ہندوستان میں معطل کر دیا گیا۔ پلیٹ فارم نے انہیں ای میل کے ذریعے اطلاع دی کہ وزارت اطلاعات و نشریات نے انفارمیشن ٹیکنالوجی ایکٹ ۲۰۰۰ء کی دفعہ ۶۹؍ اے کے تحت بلاکنگ آرڈر جاری کیا ہے۔ ای میل میں کہا گیا کہ ہندوستانی قانون کے تحت ایکس کو ہندوستان کے اندر اکاؤنٹ تک رسائی محدود کرنا لازم ہے، تاہم مواد دیگر ممالک میں دستیاب رہ سکتا ہے۔ پلیٹ فارم نے قانونی پابندیوں کے باعث مزید تفصیلات دینے سے معذرت کی اور متاثرہ صحافی کو وزارت سے رجوع کرنے یا عدالتی چارہ جوئی کا مشورہ دیا۔

یہ بھی پڑھئے: بنگال: ایس آئی آر میں عدالتی افسران کی تقرری کا حکم

آزاد عیسیٰ کا ردعمل
آزاد عیسیٰ، جو Middle East Eye کے سینئر رپورٹر ہیں اور نیویارک میٹروپولیٹن علاقے میں مقیم ہیں، نے کہا کہ ان کی رپورٹنگ زیادہ تر ہندوستان اور اسرائیل کے تعلقات پر مرکوز رہی ہے۔ انہوں نے کہا کہ ’’میں صرف یہ فرض کر سکتا ہوں کہ پابندی اسی کام کے پس منظر میں لگائی گئی ہے۔ یہ اس بات کی علامت ہے کہ ہندوستان میں صحافت کو کس طرح کم کیا جا رہا ہے۔‘‘ عیسیٰ نے ہندوستان کی خارجہ پالیسی اور اسرائیل سے تعلقات پر ایک کتاب بھی لکھی ہے، جس کا عنوان ہے Hostile Homelands: The New Alliance Between India and Israel۔

یہ بھی پڑھئے: حکام کو ذات پات کا نظام ختم کرنے کیلئے کام کرنا چاہئے: مدراس ہائی کورٹ

دفعہ ۶۹؍ اے کیا ہے؟
انفارمیشن ٹیکنالوجی ایکٹ کی دفعہ 69A حکومت کو اختیار دیتی ہے کہ وہ خودمختاری، امن عامہ اور قومی سلامتی جیسے اسباب کی بنیاد پر کسی آن لائن مواد تک عوامی رسائی روکنے کی ہدایت دے۔ اس دفعہ کے تحت جاری کیے جانے والے احکامات عموماً خفیہ رکھے جاتے ہیں، اور متاثرہ صارفین کو اکثر مکمل وجوہات فراہم نہیں کی جاتیں۔

اظہارِ رائے اور پلیٹ فارم کا کردار
آزاد عیسیٰ نے ایکس کے اقدام پر بھی تنقید کی اور کہا کہ یہ واقعہ ظاہر کرتا ہے کہ پلیٹ فارم آزادی اظہار کا دعویٰ کرنے کے باوجود حکومتی احکامات کی تعمیل میں صحافتی آوازوں کو محدود کر رہا ہے۔