ہند پاک کشیدگی کے درمیان حکومت ہند نے او ٹی ٹی اور ڈجیٹل اسٹریمنگ پلیٹ فارمز کو حکم دیا ہے کہ وہ پاکستان کے تمام مشمولات بلاک کردیں۔ ایسا قومی سلامتی کے تحت کیا جارہا ہے۔

حکومت ہند نے جمعرات کو تمام ’’اوور دی ٹاپ‘‘ (OTT) پلیٹ فارمز، میڈیا اسٹریمنگ سروسیز، اور ڈجیٹل اداروں کو ایڈوائزری جاری کی ہے کہ وہ پاکستان سے آنے والے تمام مشمولات کی میزبانی اور تقسیم کو فوری طور پر بند کر دیں۔ اس ضمن میں وزارت برائے اطلاعات و نشریات نے ایکس پوسٹ کیا کہ ’’پہلگام دہشت گردانہ حملے کی روشنی میں، قومی سلامتی کو فوقیت حاصل ہے۔ او ٹی ٹی پلیٹ فارمز کو پاکستان سے آنے والے تمام مواد کو ہٹانے کا حکم دیا گیا ہے۔‘‘ واضح رہے کہ یہ ایڈوائزری ۲۲؍ اپریل ۲۰۲۵ء کو پہلگام حملے کے بعد سرحد پر کشیدگی بڑھنے کے بعد جاری کی گئی ہے۔ یہ ہدایت انفارمیشن ٹیکنالوجی (رہنما خطوط اور ڈجیٹل میڈیا ایتھکس کوڈ) رولز ۲۰۲۱ء کے دائرہ کار میں آتی ہے، خاص طور پر حصہ سوم کے تحت جو آن لائن مواد کیلئے ضابطہ اخلاق کو کنٹرول کرتا ہے۔ حکومت نے پارٹ دوم کے ضابطہ ۳ (۱) (ب) کا حوالہ دیا، جو ثالثوں کو اس بات کو یقینی بنانے کا پابند کرتا ہے کہ صارفین ایسے مواد کا اشتراک یا پھیلاؤ نہ کریں جس سے ہندوستان کے اتحاد، سالمیت، دفاع یا بیرونی ریاستوں کے ساتھ اس کے تعلقات کو خطرہ ہو۔

یہ بھی پڑھئے: ہندوستان کے وہ اقدامات جن کی وجہ سے پاکستان چاروں شانے چت ہو گیا

ایڈوائزری میں کہا گیا ہے کہ قومی سلامتی کے مفاد میں، تمام مواد، بشمول ویب سیریز، فلمیں، گانے، پوڈ کاسٹ، اور پاکستان میں تیار کئے جانے والے یا اس سے وابستہ میڈیا کی دیگر اقسام کو فوری طور پر ہٹا دیا جانا چاہئے، قطع نظر اس کے کہ پلیٹ فارم کے کاروباری ماڈل (سبسکرپشن پر مبنی یا فری ٹو ایئر)۔ وزارت نے تصدیق کی کہ یہ ایڈوائزری مجاز اتھاریٹی کی منظوری سے جاری کی گئی ہے اور تمام ڈجیٹل مواد فراہم کرنے والوں سے آئی ٹی رولز ۲۰۲۱ء کے قانونی اور اخلاقی مینڈیٹ کو برقرار رکھنے پر زور دیا گیا ہے۔

Advisory on content originating from Pakistan

In light of the Pahalgam terror attack, national security takes precedence. OTT platforms are hereby mandated to remove all content originating from Pakistan.#OperationSindoor #IndiaFightsPropaganda pic.twitter.com/fDBMWqLjBX

— Ministry of Information and Broadcasting (@MIB_India) May 8, 2025

ڈجیٹل رائٹس گروپ، انٹرنیٹ فریڈم فاؤنڈیشن (آئی ایف ایف) نے اس اقدام کو سنسرشپ کی مبہم شکل قرار دیا اور وزارت پر زور دیا کہ وہ ایڈوائزری واپس لے۔ آئی ایف ایف نے بیان میں کہا کہ ’’معلومات کی تکنیکی نوعیت کے پیش نظر اس طرح کی بلاکنگ ممکن یا قابل عمل نہیں ہے۔ اس سے نجی سروس فراہم کرنے والوں کی طرف سے حد سے زیادہ تعمیل اور خود سنسر شپ ہوگی، آزادی اظہار اور آزادی کو نقصان پہنچے گا جو ہماری جمہوریت کو برقرار رکھتی ہے۔‘‘