جندل گروپ پروجیکٹ کیلئے مناسب جگہ کا متلاشی ، ۶؍ ماہ میں انتخاب کرلینے کی امید، پروجیکٹ کو آئندہ ۴؍ برسوں میں قابل عمل بنایا جائیگا۔

ملک کی سب سے بڑی اسٹین لیس اسٹیل ساز کمپنی جندل اسٹین لیس لمیٹڈ نے مہاراشٹر میں مجوزہ۴۰؍ ہزار کروڑ روپے کے بڑے اسٹین لیس اسٹیل منصوبے کیلئے زمین کی تلاش تیز کر دی ہے۔ کمپنی کے چیف ایگزیکٹیو آفیسر ترون کھلبے نے کہا ہے کہ ریاست میں کئی مقامات کا جائزہ لیا جا رہا ہے اور آئندہ ایک سے دو سہ ماہی میں منصوبے کیلئے زمین کے انتخاب کی صورت حال واضح ہو سکتی ہے۔ اس منصوبے پر مجموعی طور پر تقریباً ۴۰؍ہزار کروڑ روپے کی سرمایہ کاری کی جائے گی۔ پلانٹ کی مجموعی اسٹین لیس اسٹیل پگھلانے کی صلاحیت سالانہ۴۰؍ لاکھ ٹن ہوگی اور اسے مختلف مرحلوں میں قائم کیا جائے گا۔ کمپنی کے مطابق پہلے مرحلے کو اگلے چار برس میں آپریشنل بنانے کا ہدف ہے۔

یہ بھی پڑھئے: او این جی سی کے نئے چیئرمین کی دوڑ میں رنجیت رتھ سمیت کئی بڑے نام شامل

منصوبے کے مکمل ہونے کے بعد جندل اسٹین لیس کی ہندوستان  میں مجموعی پیداواری صلاحیت موجودہ تقریباً۳۰؍لاکھ ٹن سالانہ سے بڑھ کر۷۰؍لاکھ ٹن سالانہ ہو جائے گی۔ فی الحال کمپنی کے ہریانہ کے حصار اور ادیشہ کے جاج پور میں دو پلانٹ ہیں۔ کمپنی کا کہنا ہے کہ مہاراشٹر میں قائم ہونے والا نیا پلانٹ صرف روایتی اسٹین لیس اسٹیل مصنوعات تک محدود نہیں ہوگا بلکہ اس میں خصوصی نوعیت کے اسٹیل گریڈ بھی تیار کیے جائیں گے۔ یہ مصنوعات ہائیڈروجن، نیوکلیئر انرجی، دفاع، موبیلٹی، بنیادی ڈھانچے اور مختلف پروسیس انڈسٹریز جیسے اہم اور ابھرتے ہوئے شعبوں میں استعمال ہوں گی۔