ایران نے الزام عائد کیا ہے کہ سوشل میڈیا پلیٹ فارم ایکس نے اس کی وزارتِ خارجہ سے منسلک اکاؤنٹس سے بلیو چیک مارک ہٹا دیئے، حالانکہ پریمیم پلس سبسکرپشن موجود تھی۔ تہران نے اس اقدام کو ’منتخب سنسرشپ‘ قرار دیتے ہوئے اسے امریکہ-ایران تنازع سے جڑی معلومات کو دبانے کی کوشش کہا ہے۔

ایران نے کہا ہے کہ امریکی سوشل میڈیا کمپنی ایکس نے اس کی وزارتِ خارجہ سے منسلک اکاؤنٹس سے تصدیقی بیجز (verification badges) ہٹا دیئےہیں، حالانکہ انہوں نے پریمیم پلس سبسکرپشن لے رکھی تھی، اور اس اقدام کو ’منتخب سنسرشپ‘ قرار دیا ہے۔ یہ بیان منگل کو ایکس پر وزارتِ خارجہ کے ترجمان اسماعیل بقائی کی جانب سے پوسٹ کیا گیا، جس میں کہا گیا کہ نہ صرف ترجمان کے اکاؤنٹ بلکہ وزارت اور وزیرِ خارجہ کے پروفائلز سے بھی بلیو چیک مارک ہٹا دیا گیا ہے۔ بیان میں اس اقدام کو ’من مانا ڈی ویریفیکیشن‘ (arbitrary de-verification) قرار دیتے ہوئے کہا گیا کہ یہ ایک وسیع تر رجحان کی عکاسی کرتا ہے جس کا مقصد مبینہ طور پر امریکہ-ایران تنازع سے متعلق معلومات کو دبانا ہے۔ اس دعوے پر ایکس کی جانب سے فوری طور پر کوئی ردِعمل سامنے نہیں آیا۔ 

یہ بھی پڑھئے: ڈونالڈ ٹرمپ کا آبنائے ہرمز میں پروجیکٹ فریڈم عارضی طور پر روکنے کا اعلان

بتا دیں کہ یہ معاملہ ایسے وقت سامنے آیا ہے جب ایکس نے اپنی ویریفیکیشن پالیسی میں بڑی تبدیلیاں کی ہیں، جہاں بلیو چیک مارک اب شناخت کی تصدیق کے بجائے زیادہ تر ادائیگی پر مبنی سبسکرپشن (جیسے پریمیم پلس) سے منسلک ہے۔ اس کے باوجود مختلف ممالک، خاص طور پر ایران جیسے سیاسی طور پر حساس ریاستوں کے سرکاری اکاؤنٹس کے ساتھ ماضی میں بھی پابندیوں، لیبلنگ یا ویریفیکیشن کے مسائل دیکھنے میں آئے ہیں۔ ایران اور امریکہ کے درمیان طویل عرصے سے جاری کشیدگی، اطلاعاتی جنگ (information war) اور سوشل میڈیا کو بیانیہ پھیلانے کے ایک اہم ذریعہ کے طور پر استعمال کرنے کے تناظر میں، اس اقدام کو ایران کی جانب سے سنسرشپ اور ڈجیٹل پلیٹ فارمز پر دباؤ کی ایک کڑی کے طور پر پیش کیا جا رہا ہے۔