آئرلینڈ کی سن فین پارٹی نےوہائٹ ہاؤس کی سینٹ پیٹرک ڈے کا بائیکاٹ کرنےکا اعلان کیا ہے، ایک بیان میں پارٹی نے کہا کہغزہ میں انسانی بحران اور نسل کشی کی وجہ سے وہ مسلسل دوسرے سال واشنگٹن میں ہونے والی سالانہ تقریب میں شرکت کرنے سے قاصر ہے۔

آئرلینڈ کی سن فین مسلسل دوسرے سال وہائٹ ہاؤس میں منعقد ہونے والے سینٹ پیٹرک ڈے کی تقریبات میں شرکت نہیں کرے گی، پارٹی قیادت نے اس کی وجہ اسرائیل کی غزہ نسل کشی اور فلسطینیوں کو درپیش انسانی بحران کو قرار دیا ہے۔پارٹی صدر میری لو میکڈونلڈ نے پیر کو سوشل میڈیا پر اس فیصلے کی تصدیق کرتے ہوئے کہا کہ’’ گزشتہ سال کے بائیکاٹ کے بعد سے غزہ اور مقبوضہ مغربی کنارے کی صورتحال میں بہتری نہیں آئی ہے۔ غزہ اور مقبوضہ مغربی کنارے کی زمینی صورتحال اب بھی تشویشناک ہے۔ غزہ پر اسرائیلی حملے ختم نہیں ہوئے ہیں۔ نسل کشی جاری ہے۔‘‘ انہوں نے مزید کہا، ’’یہ ضروری ہے کہ سن فین بین الاقوامی قانون کے نفاذ اور امن و انصاف کے قیام کا مطالبہ کرنے کے لیے اپنی آواز بلند کرے۔‘‘

یہ بھی پڑھئے: اسرائیلی حکام نے مسجد اقصیٰ کے امام کو ایک ہفتےکیلئے مسجد میں داخلے سے روک دیا

بعد ازاں میکڈونلڈ نے زور دے کر کہا کہ پارٹی کے اس فیصلے کو وسیع تر تعلقات میں دراڑ کے طور پر نہیں دیکھا جانا چاہیے۔ انہوں نے دونوں ملکوں کے تعلقات کا اعادہ کرتے ہوئے کہا کہ ، ’’آئرلینڈ اور امریکہ کے عوام کے درمیان تعلقات بہت اہم ہیں۔ایک پارٹی کے طور پر، ہمارے دیرینہ اور پائیدار تعلقات ہیں جو کئی دہائیوں پر محیط ہیں۔ یہ تعلقات جاری رہیں گے۔‘‘شمالی آئرلینڈ کی فرسٹ منسٹر مشیل اونیل نے بھی کہا کہ انہوں نے غزہ اور مقبوضہ مغربی کنارے کی صورتحال کے پیش نظر اس سال وائٹ ہاؤس میں ہونے والے سینٹ پیٹرک ڈے کی تقریبات میں شرکت نہ کرنے کا فیصلہ کیا ہے۔تاہم دونوں ملکوں کے تعلقات کو ترقی کی بنیاد قرار دیتے ہوئے انہوں نے کہا، تاہم، غزہ میں جنگ بندی معاہدے سے پیدا ہونے والی امیدوں اور وعدوں کے باوجود، اسرائیلی فوجی حملے جاری ہیں۔ میں اسرائیل کی جانب سے منظم انسانی حقوق کی خلاف ورزیوں اور بین الاقوامی قوانین کی صریح خلاف ورزیوں سے آنکھیں نہیں چرا سکتی اور نہ ہی چراؤں گی۔‘‘انہوں نے مزید کہا، ’’ایک سیاسی لیڈر کی حیثیت سے انسانی ہمدردی کے ساتھ کھڑا ہونا میری ذمہ داری ہے۔‘‘

یہ بھی پڑھئے: رفح کراسنگ: اسرائیلی پابندیاں، ۲۰؍ ہزار سے زائد فلسطینی مریض امداد کے منتظر

واضح رہے کہ وائٹ ہاؤس میں سینٹ پیٹرک ڈے کی تقریبات آئرش-امریکی سفارت کاری کا ایک دیرینہ حصہ ہیں، جو آئرلینڈ اور امریکہ کے درمیان قریبی سیاسی اور ثقافتی تعلقات کی علامت ہے۔ شمالی آئرلینڈ سے تعلق رکھنے والے آئرش سیاسی لیڈروں کی شرکت کو روایتی طور پر بحر اوقیانوس کے دونوں پار تعلقات کو مضبوط کرنے اور شمالی آئرلینڈ کے امن عمل کی حمایت میں امریکی حکومتوں کے کردار کو اجاگر کرنے کے ایک موقع کے طور پر دیکھا جاتا رہا ہے۔