جماعت اسلامی ہند نے آنے والے یونین بجٹ میں روزگار کے مواقع بڑھانے، دولت کی غیر منصفانہ تقسیم کم کرنے اور شمولیتی معاشی ترقی کو ترجیح دینے کا مطالبہ کیا ہے۔ تنظیم کا کہنا ہے کہ موجودہ معاشی نمو عام شہری تک نہیں پہنچ رہی۔

جماعتِ اسلامی ہند نے آنے والے یونین بجٹ سے قبل مرکزی حکومت پر زور دیا ہے کہ وہ معاشی پالیسیوں کا محور صرف ترقیاتی اعداد و شمار کے بجائے روزگار کی تخلیق، مساوی ترقی اور سماجی انصاف کو بنائے۔ تنظیم کے مطابق موجودہ اقتصادی ڈھانچے میں ترقی کے فوائد محدود طبقے تک سمٹتے جا رہے ہیں، جبکہ نوجوان بے روزگاری، غیر محفوظ ملازمتیں اور آمدنی کی عدم مساوات سنگین صورت اختیار کر چکی ہے۔ جماعت نے اپنے بیان میں کہا کہ ملک میں اقتصادی نمو کے باوجود ملازمتوں کی رفتار سست ہے، جس کا براہِ راست اثر نوجوانوں، اقلیتوں اور کمزور طبقات پر پڑ رہا ہے۔ تنظیم کے مطابق بجٹ کو اس طرح ترتیب دیا جانا چاہیے کہ وہ روزگار پیدا کرنے والے شعبوں، خصوصاً مینوفیکچرنگ، چھوٹے و درمیانے درجے کے کاروبار، زراعت اور خدمات کے شعبے کو مضبوط کرے۔

یہ بھی پڑھئے: بلی ایلیش کی ٹرمپ انتظامیہ پر شدید تنقید، امریکی شہری حقوق پر سنگین تحفظات

بیان میں کہا گیا کہ شہری علاقوں میں بڑھتی بے روزگاری ایک بڑا چیلنج بن چکی ہے جس کے لیے شہری روزگار ضمانت اسکیم جیسے اقدامات ناگزیر ہیں۔ جماعت نے نشاندہی کی کہ صرف سرمایہ کاری کے اعلانات کافی نہیں، بلکہ ایسی پالیسیوں کی ضرورت ہے جو براہِ راست روزگار پیدا کریں اور نوجوانوں کو ہنر مند بنائیں۔ تنظیم نے بجٹ میں تعلیم، صحت اور سماجی تحفظ کے لیے زیادہ وسائل مختص کرنے کا مطالبہ بھی کیا۔ ان کا کہنا ہے کہ انسانی ترقی کے بغیر پائیدار معاشی ترقی ممکن نہیں۔ جماعت کے مطابق صحت اور تعلیم پر کم خرچ معاشرے میں عدم مساوات کو مزید گہرا کرتا ہے۔ 

یہ بھی پڑھئے: داؤس میں ہندوستانی ریاستوں کی ہندوستانی کمپنیوں کےساتھ معاہددوں پرشدید تنقید

جماعتِ اسلامی نے دولت کے بڑھتے ارتکاز پر بھی تشویش ظاہر کی اور کہا کہ ٹیکس اصلاحات اور فلاحی اسکیموں کے ذریعے آمدنی کی منصفانہ تقسیم کو یقینی بنایا جانا چاہیے۔ بیان میں کہا گیا کہ اگر بجٹ سماجی شمولیت کو نظرانداز کرتا رہا تو معاشی ترقی عوامی اعتماد کھو دے گی۔ تنظیم کا کہنا ہے کہ آنے والا یونین بجٹ حکومت کے لیے ایک موقع ہے کہ وہ معاشی سمت درست کرے، بے روزگاری جیسے بنیادی مسئلے کو ترجیح دے اور ترقی کو چند طبقوں کے بجائے پورے معاشرے تک پہنچائے۔