ای وی ایم ہٹاؤ سنیوکت مورچہ کے رکن ایڈوکیٹ بنسوڑے کےمطابق اپوزیشن کو چاہئے کہ وہ ای وی ایم کے خلاف کھل کر میدان میں اترے۔

بامبے ہائی کورٹ کے سابق جسٹس بی جی کولسے پاٹل کی قیادت میں پیر کو الیکٹرانک ووٹنگ مشین(ای وی ایم ) کے خلاف مورچہ نکالا گیا۔ 
اس مورچہ میں عام شہریوں کے ساتھ ساتھ بڑی تعداد میں وکلاء نے بھی شرکت کی۔ اس موقع پر کولسے پاٹل نے جمہوریت کی بقا کیلئے انتخابات بیلٹ پیپر کے ذریعے کروائے جانے کا مطالبہ کیا۔ پیر کی صبح ۱۱؍ بجے ڈاکٹر بابا صاحب گارڈن سے کلیان تحصیلدار آفس تک ای وی ایم ہٹاؤ مورچہ نکالا گیا۔ مورچہ میں شامل مظاہرین نے ایم وی ہٹاؤ، دیش بچاؤ، ای وی ایم ہٹاؤ، سنویدھان بچاؤ کے نعرے لگائیں۔ جسٹس کولسے پاٹل نے کلیان تحصیلدار کو میمورنڈم دیتے ہوئے مطالبہ کیا کہ لوک سبھا انتخابات بیلٹ پیپر ہی پر کروائے جائیں تاکہ رائے دہندگان کے من میں کوئی شک و شبہ نہ رہے۔ انہوں نے کہا کہ ووٹر کو معلوم ہونا چاہئے کہ اس کا ووٹ خفیہ ہے۔ 
ای وی ایم ہٹاؤ سنیوکت مورچہ کے رکن ایڈوکیٹ بنسوڑے نے دعویٰ کے ساتھ کہا کہ بیشتر حلقوں میں ووٹوں کی گنتی اور ڈالے گئے ووٹوں کے اعداد وشمار میں تضاد پایا گیا ہے۔ انہوں نے کہا کہ اپوزیشن کو چاہئے کہ وہ ای وی ایم کے خلاف کھل کر میدان میں اترے۔