مشہور انگریزی اخبار’دی ٹیلی گراف‘ کے سابق ایڈیٹر آر راج گوپال بھی ’ایس آئی آر‘ کے متاثرین میں شامل ہیں جن کا نام ’’منطقی تضاد‘‘ کے نام پر کٹ گیا، ان کی رُوداد ایس آئی آر کی قہر سامانیوں کو بیان کرتی ہے، ان ہی کی زبان میں  پڑھیں۔

’’اس سال مارچ میں کولکاتا کے بالی گنج اسمبلی حلقے کی ووٹر  لسٹ سے میرا نام حذف کر دیا گیا۔ بظاہر اس کی وجہ یہ بتائی گئی کہ  ایس آئی آر  کے دوران ۲۰۰۲ء کی ووٹر لسٹ میں نہ میرا نام ملا اور نہ ہی میرے آنجہانی والد کا۔ میرے والد جو گاندھیائی نظریات کے حامل ریٹائرڈ پروفیسر تھے  اور گاندھی اسمارک ندھی کی کیرالا اکائی  کے سیکریٹری  رہ چکے تھے، کا  انتقال۲۰۱۶ء میں ہوا۔ آج تک میری سمجھ میں نہیں آیا کہ اتنے ذمہ دار ووٹر کا نام ووٹرلسٹ میں کیسے موجود نہیں تھا۔

مغربی بنگال کے تقریباً۲۷؍لاکھ دیگر شہریوں کی طرح مجھے بھی’’منطقی تضاد‘‘ کی بنیاد پر ووٹر لسٹ سے خارج کر دیا گیا۔ میں نے اپنا میٹرک کا سرٹیفکیٹ بھی جمع کرایا  لیکن  نام خارج کرنے کی کوئی وجہ نہیں بتائی گئی ۔ میری اپیل اب سپریم کورٹ کی ہدایات پر قائم کئے گئے ٹریبونل میں زیر سماعت ہے۔ بہرحال نتیجہ یہ ہوا کہ میں حالیہ  اسمبلی الیکشن میں ووٹ نہیں ڈال سکا۔

یہ بھی پڑھئے: نوآبادیاتی دور کے جیل نظام کا خاتمہ، ریاستی حکومت نے تمام ۱۱۶؍ ذیلی جیلوں کو بند کیا

اس سے بھی زیادہ پریشان کن معاملہ میرے پاسپورٹ کی تجدید کا ہے۔ اس کیلئے میں نے۱۹؍ مارچ۲۶ءکو بایومیٹرک کی تمام کارروائی مکمل کر لی تھی لیکن پولیس ویری فکیشن   میں مجھے اس  لئے کلین چٹ نہیں ملی کہ میرا نام اب  ووٹر  لسٹ میں موجود نہیں ہے۔ میں نے کئی متبادل دستاویزات جمع کرائے، مگر  انہیں ناکافی قرار دیاگیا۔ آج(۲۷؍  جون۲۶ءکو ) بایومیٹرک کی کارروائی مکمل کئے ہوئے مجھے ۱۰۰؍ دن  مکمل ہوگئے ۔ گزشتہ ہفتے کولکاتا کی پاسپورٹ اتھاریٹی نے  مجھے باضابطہ طور پر اطلاع دی کہ  پولیس نے منفی رپورٹ بھیجی ہے کیونکہ میرا نام ووٹر لسٹ سے کٹ  چکا ہے۔ مجھے فوری طور پر علاقائی پاسپورٹ دفتر، کولکاتا، میں حاضر ہونے کو کہا گیا، لیکن جب میں نے ملاقات کا وقت مانگا  کیوں کہ اس کے بغیر دفتر میں داخل ہونا بھی مشکل ہے، تو مجھے۱۷؍ جولائی۲۶ء کی تاریخ دی گئی۔