ریاستی حکومت نے فلائی اوور کے لئے درکار جنگلاتی زمین کی منتقلی کو حتمی منظوری دے دی۔

شیل پھاٹا روڈ پر واقع مصروف ترین کلیان پھاٹا جنکشن پر مجوزہ فلائی اوور کی تعمیر کی راہ میں حائل سب سے بڑی اور طویل عرصے سے درپیش رکاوٹ بالآخر دور ہو گئی ہے۔ریاستی حکومت نے فلائی اوور  کیلئے درکار جنگلاتی زمین کی منتقلی کو حتمی منظوری دے دی ہے جس سے برسوں سے ٹریفک جام کے سنگین مسئلہ سے نجات ملنے کی قوی امید ہے۔حکومت کے ذرائع کے مطابق فلائی اوور کی تعمیر کیلئے    درکار۰ء۵۴۹۶؍ ہیکٹر جنگلاتی اراضی کو باضابطہ طور پر ممبئی میٹروپولیٹن ریجن ڈیولپمنٹ اتھاریٹی ( ایم ایم آر ڈی اے) کے سپرد کرنے کا سرکاری حکم نامہ جاری کر دیا گیا ہے۔

یہ بھی پڑھئے:بھیونڈی: موسلادھار بارش سے کئی سڑکیں زیر آب، ٹریفک متاثر

قابل ذکر ہے کہ مرکزی وزارت ماحولیات، جنگلات و موسمیاتی تبدیلی کے علاقائی دفتر نے پہلے ہی اس کی منظوری دے دی تھی۔ ٹینڈر کا عمل مکمل ہونے کے باوجود جنگلاتی اراضی کا کلیئرنس نہ ملنے کی وجہ سے کام رکا ہوا تھا۔ تاہم حکومت کے نوٹیفکیشن کے بعد اب تعمیراتی کام کے آغاز کی تمام رکاوٹیں مکمل طور پر ختم ہو چکی ہیں۔کلیان پھاٹا جنکشن طویل عرصے سے کلیان، ڈومبیولی، الہاس نگر، امبرناتھ اور بدلاپور سے آنے جانے والی گاڑیوں کیلئے بدترین ٹریفک جام کا مرکز بنا ہوا ہے ۔دفتری اوقات میں مسافروں کو گھنٹوں جام میں پھنسے رہنا پڑتا ہے۔اس فلائی اوور کی تعمیر سے نوی ممبئی، مہاپے اور تھانے کے درمیان روزانہ آمد و رفت کرنے والے ہزاروں ملازمین اور مسافروں کے وقت اور ایندھن کی بڑی بچت ہوگی اور سفر انتہائی ہموار ہو جائے گا۔ایم ایم آر ڈی اے کے مطابق ​مجوزہ کلیان پھاٹا فلائی اوور کی کل لمبائی ۲۳۹۴ ؍ میٹر جبکہ چوڑائی ۲۰۔۲۴ میٹر ہوگی۔مستقبل کی سفری ضروریات کو مدنظر رکھتے ہوئے متعلقہ ٹھیکیدار نے اس فلائی اوور کو مجوزہ میٹرو لائن-۱۴ کے ساتھ مربوط کرنے کی تکنیکی تجویز بھی پیش کی ہے۔جس پر مثبت انداز میں غور کیا جا رہا ہے۔