کوئل ملک کے استعفے کے ساتھ ہی ٹی ایم سی کے راجیہ سبھا سے استعفیٰ دینے والے اراکین پارلیمنٹ کی تعداد۴؍ ہو گئی۔

ترنمول کانگریس اور ممتا بنرجی کیلئےمشکلیں کم ہونے کا نام نہیں لے رہی ہیں ۔ پارٹی کے ۲؍ گروہوں میں تقسیم ہونے کے بعد اب پارٹی کی رکن پارلیمنٹ کوئل ملک نے بھی راجیہ سبھا کی رکنیت سے استعفیٰ دے دیا ہے۔ کوئل ملک ٹالی ووڈ کی مقبول اداکارہ ہیں۔ ان کا استعفیٰ مغربی بنگال کی سابق وزیر اعلیٰ ممتا بنرجی کے لیے شدید دھچکا تصور کیا جا رہا ہے۔ اس سے قبل بدھ کوپارٹی لیڈر مدن مترا نے بھی ممتا کا ساتھ چھوڑ دیا تھا اور رتبرت کے خیمے میں چلے گئے تھے۔جمعرات کو رکن پارلیمنٹ کوئل ملک نے راجیہ سبھا سے استعفیٰ دے کر پارٹی کو نئی پریشانیوں میں مبتلا کر دیا ہے۔

یہ بھی پڑھئے: دہلی ہائی کورٹ کے سابق جسٹس پر گھریلو گیس سلنڈر ایجنسی چلانے کا الزام، لائسنس معطل

قابل ذکر ہے کہ کوئل ملک کا اصل نام رکمنی ملک ہے۔ وہ ایک معروف بنگالی اداکارہ ہیں۔ وہ بنیادی طور پر ٹالی ووڈ میں ’ٹالی کوئن‘ کے نام سے جانی جاتی ہیں۔ راجیہ سبھا کے چیئرمین سی پی رادھا کرشنن کو لکھے گئے اپنے خط میں کوئل ملک نے کہا ہے کہ وہ اپنے عہدے سے استعفیٰ دے رہی ہیں۔ براہِ کرم اسے قبول کیا جائے۔ انہوں نے راجیہ سبھا کے تمام افسران اور اراکین کا شکریہ ادا کیا ہے۔ کوئل ملک کے استعفیٰ کی وجہ سامنے نہیں آ سکی ہے اور نہ ہی انہوں نے راجیہ سبھا کے چیئرمین کو بھیجے گئے خط میں اس وجہ کا ذکر کیا ہے۔کوئل ملک کے استعفے کے ساتھ ہی ٹی ایم سی کے راجیہ سبھا سے استعفیٰ دینے والے اراکین پارلیمنٹ کی تعداد۴؍ ہو گئی ہے۔ اس سے پہلے سُکھیندو شیکھر رائے، سشمتا دیو اور پرکاش چک برائک نے راجیہ سبھا سے استعفیٰ دیا تھا۔ اب اس فہرست میں کوئل ملک کا نام بھی شامل ہو گیا ہے۔ یہ قیاس آرائیاں کئی دنوں سےجا ری تھیںکہ کوئل بھی استعفیٰ دے دیں گی ۔