سیکھنے کی مدت میں توسیع کے بجائے پہلی بار پکڑے جانے پر ڈرائیور کو وجہ بتائو نوٹس دے کر ایک مہینے میں مراٹھی سیکھنے کا موقع دیا جائیگا۔

کل، منگل ۱۸؍ اگست، سے ریاست بھر میں ٹیکسی اور آٹو رکشا ڈرائیوروں کیلئے مراٹھی لازمی ہو جائے گی اور اس کے بعد اگر کوئی ڈرائیور مراٹھی نہیں بول سکے گا تو پہلی مرتبہ پکڑے جانے پر اسے وجہ بتائو نوٹس دے کر ایک مہینے میں مراٹھی سیکھنے کا موقع دیا جائے گا لیکن تمام ڈرائیوروں کیلئے مراٹھی سیکھنے کی مدت میں عام توسیع نہیں کی گئی ہے، اس لئے اس مہم کے تحت ڈرائیوروں کو مراٹھی سکھانے کیلئے شروع کئے گئے تمام مراکز بھی بند کردیئے جائیں گے۔

یاد رہے کہ ریاستی حکومت نے ’مہاراشٹر موٹر وہیکل رُولز‘ میں ترمیم کی ہے جس کے تحت پبلک ٹرانسپورٹ کے ڈرائیوروں، جن میں ٹیکسی، رکشا اور ایپ سے چلنے والی اولا، اوبر اور ریپیڈو کی ٹیکسیوں اور بائیک ٹیکسیوں کے ڈرائیوروں کو اتنی مراٹھی زبان جاننا لازمی قرار دے دیا گیا ہے کہ وہ اپنے گاہکوں سے بنیادی باتیں مراٹھی میں کرسکیں۔ مثلاً کہاں جانا ہے، کتنا کرایہ ہوگا، کتنا وقت صرف ہوگا اور دیگر بنیادی باتیں۔ 

یہ بھی پڑھئے: امریکہ: ہندوستانیوں سمیت غیر ملکی طلبہ کی تعداد میں کمی، ۴ء۳؍ ارب ڈالر کا نقصان

فلائنگ اسکواڈ جن ڈرائیوروں کو وجہ بتائو نوٹس جاری کرکے مہلت دے گا اس ایک مہینے میں بھی اگر وہ ڈرائیور مراٹھی نہیں سیکھ پاتا اور اس کی کوئی قابل اطمینان وجہ بھی نہیں بتا پاتا تو پہلے اس کا لائسنس معطل کردیا جائے گا۔ اس طرح مراٹھی نہ جاننے والے ڈرائیوروں کو موقع دے کر ان کے لائسنس معطل کئے جائیں گے اور اگر ۳؍ مرتبہ لائسنس معطل ہونے کے باوجود بھی ڈرائیور مراٹھی نہیں سیکھتا تو اس کا لائسنس مستقل طور پر منسوخ کردیا جائے گا۔ اس مہم سے وابستہ ایک آر ٹی او افسر کے مطابق اب بھی ایسے بہت سے ڈرائیور ہیںجو مراٹھی سیکھ گئے ہیں لیکن گاہکوں سے مراٹھی میں گفتگو کرنے کے تعلق سے ان میں خود اعتمادی کی کمی پائی جارہی ہے۔

یاد رہے کہ ڈرائیوروں کو مراٹھی سکھانے کیلئے محکمہ ٹرانسپورٹ، حکومت مہاراشٹر کے مراٹھی زبان کے محکمہ، ریاستی مراٹھی وکاس سنستھا، ممبئی مراٹھی ساہتیہ سنگھ اور کوکن مراٹھی ساہتیہ پریشد کے اشتراک سے یکم مئی سے ’مہاراشٹر ماجھا! مراٹھی میری مواصلاتی زبان‘ مہم شروع کی گئی تھی۔ اس مہم کے تحت ’ہندو ہردئے سمراٹ بالاصاحب ٹھاکرے مراٹھی سکھانے کا کورس‘ شروع کیا گیا تھا اور آج، ۱۷؍ اگست کو اس مہم کا اختتام وزیر اعلیٰ دیویندر فرنویس کے ہاتھوں تھانے کے رام گنیش گڈکری رنگائیتن ہال میں عمل میں آئے گا۔ اس تقریب میں نائب وزرائے اعلیٰ ایکناتھ شندے اور سونیتراپوار، ٹرانسپورٹ وزیر پرتاپ سرنائک کے علاوہ مراٹھی زبان کے محکمے کے وزیر اُدے سامنت موجودرہیں گے۔ اس پروگرام میں کوکن مراٹھی ساہتیہ پریشد کی جانب سے ہزاروں ڈرائیوروں کو مراٹھی کی عملی تربیت مکمل کرنے کے لئے سرٹیفکیٹ تقسیم کئے جائیں گے۔

یہ بھی پڑھئے: بورڈ آف پیس اسرائیل کو غزہ امن منصوبہ قبول کرنے پر مجبور کرے، حماس کا مطالبہ

فلائنگ اسکواڈ سرگرم رہے گا

محکمہ ٹرانسپورٹ کے مطابق ۱۸؍ اگست کے بعد محکمہ ٹرانسپورٹ کا فلائنگ اسکواڈ راستوں پر کہیں بھی کسی بھی ڈرائیور سے مراٹھی میں بات کرکے دیکھے گا کہ اسے مراٹھی آتی ہے یا نہیں اور اگرکوئی ڈرائیور ایسا پایا جاتا ہے جو بنیادی مراٹھی نہیں جانتا تو براہِ راست اس کا ڈرائیونگ لائسنس معطل کرنے کے بجائے پہلے اسے وجہ بتائو نوٹس دیا جائے گا کہ اس کا لائسنس کیوں معطل نہ کردیا جائے؟ اس کے ساتھ ہی اسے مراٹھی سیکھنے کیلئے ایک مہینے کی مہلت دی جائے گی۔