امریکہ اور ایران کے درمیان ممکنہ امن معاہدے کی امیدوں کے درمیان ہندوستانی شیئر بازاروں میں زبردست تیزی دیکھی گئی۔

امریکہ اور ایران کے درمیان ممکنہ امن معاہدے کی امیدوں کے درمیان جمعہ کو ہندوستانی شیئر بازاروں میں زبردست تیزی دیکھی گئی۔ سرمایہ کاروں کی بھرپور خریداری کے باعث بی ایس ای سینسیکس۴۰ء۱۶۹۵؍ پوائنٹس کے نمایاں اضافے کے ساتھ۹۵ء۷۵۵۲۷؍ پر بند ہوا، جو ۲۹؍مئی کے بعد اس کی بلند ترین سطح ہے۔
امریکی صدر  ڈونالڈ ٹرمپ کے اس بیان کے بعد کہ ایران کے ساتھ امن مذاکرات میں نمایاں پیش رفت ہوئی ہے اور ہفتے کے اختتام تک معاہدہ ممکن ہے، عالمی مالیاتی منڈیوں میں مثبت رجحان دیکھنے میں آیا۔ اگرچہ ایران نے ایسی کسی بڑی پیش رفت کی تصدیق نہیں کی، تاہم اس خبر سے سرمایہ کاروں کے اعتماد میں اضافہ ہوا۔
نیشنل اسٹاک ایکسچینج (این ایس ای) کا نفٹی۵۰؍ انڈیکس بھی۳۰ء۴۶۱؍  پوائنٹس یا ۹۹ء۱؍ فیصد اضافے کے ساتھ۹۰ء۲۳۶۲۲؍ پوائنٹسپر بند ہوا، جو۲۷؍ مئی کے بعد اس کی بلند ترین اختتامی سطح ہے۔

یہ بھی پڑھئے:فرحان اختر آر ڈی برمن کی بایوپک میں ان کا کردار ادا کریں گے

وسیع تر بازار میں بھی زبردست تیزی رہی۔ نفٹی مڈ کیپ۵۰؍انڈیکس ۳۷ء۲؍فیصد اور اسمال کیپ ۱۰۰؍ انڈیکس ۸۰ء۲؍فیصد مضبوط ہوا۔ آئی ٹی سیکٹر کے علاوہ تقریباً تمام شعبوں میں خریداری دیکھی گئی۔ بینکنگ، مالیاتی خدمات، آٹو موبائل، ریئل اسٹیٹ، صارفین کی پائیدار اشیا اور تیل و گیس شعبوں کے حصص نمایاں طور پر مضبوط رہے۔

یہ بھی پڑھئے:فیفاورلڈ کپ: پہلے میچ میں ۳؍ ریڈ کارڈز، سوشل میڈیا پر میمزکا سیلاب

بجاج فائنانس کا شیئر ۵ء۵؍ فیصد سے زائد بڑھا، جبکہ ایل اینڈ ٹی اور انڈیگو کے حصص میں  ۵ء۴؍سے ۵؍ فیصد تک اضافہ ریکارڈ کیا گیا۔ ٹائٹن، ایچ ڈی ایف سی بینک اور ایٹرنل کے حصص بھی ۵ء۳؍ سے ۴؍ فیصد تک چڑھے۔ اسی طرح بجاج فِن سرو، ایکسس بینک، ریلائنس انڈسٹریز، الٹرا ٹیک سیمنٹ، بھارتی ایئرٹیل، کوٹک مہندرا بینک اور ماروتی سوزوکی کے حصص میں۲؍  سے۳؍ فیصد تک اضافہ دیکھا گیا۔ دوسری جانب ٹیک مہندرا کا شیئر تقریباً ۲۵ء۳؍ فیصد گر گیا، جبکہ پاور گرڈ بھی منفی زون میں بند ہوا۔