محکمہ صحت کے مطابق ویکسین کی مانگ میں زبردست کمی آئی ہے جس کی وجہ سے کئی کروڑ کے ویکسین کی میعاد ختم ہونے کی وجہ سے انہیں ضائع کرنا پڑا ہے۔

ریاست اور ملک میں کورونا پر قابو پانے اور کووڈ کے مریضوں کی تعداد کم ہونے کے سبب کووڈ سے تحفظ کیلئے کروڑوں کی لاگت سے تیار کئے گئے  ویکسین کی مانگ میں زبردست کمی آئی ہے۔ دوسری جانب ویکسین کی میعاد بھی ختم ہوچکی ہے جس سے حکومت کو  لاکھوں ویکسین کو ضائع کرنا پڑا ہے۔
اطلاعات کے مطابق کووِڈ جیسے مہلک مرض سے محفوظ کرنے کے لئے مرکزی محکمہ صحت نے کو ویکسین ،کووی شیلڈ اور کورب ویکس نامی ٹیکے تیار کئےتھے۔ ویکسین کے استعمال کی معیاد ختم ہونے کے سبب ریاستی محکمہ صحت کو اسے ضائع کرنا پڑ رہا ہے۔ اطلاع کے مطابق ۱۳؍ لاکھ ۴۰؍ ہزار ویکسین ایسی ہیں جنہیں ۲۶؍ کروڑ کی مالیت سے تیار کیا گیا تھا ، انہیں اب استعمال کی میعاد ختم ہونے کے سبب ضائع کرنا پڑا ہے۔ موصولہ اطلاع کے مطابق جنوری ۲۰۲۱ء  میں ریاست مہاراشٹر کو مرکزی محکمہ صحت کی جانب سے ۱۲؍ کروڑ ۲؍ لاکھ کی کووی شیلڈ،۲؍ کروڑ ۸۹؍ لاکھ کی کوویکسین اور ۷۷؍ لاکھ کی کورب ویکس نامی ویکسین کا اسٹاک فراہم کیا گیا تھا ۔محکمہ صحت کے مطابق ۹؍ کروڑ ۱۴؍ لاکھ شہریوں کو ویکسین لینے کا اہل قرار دیا گیا تھا۔
ان میں سے ۹۲؍ فیصد شہریوں نے پہلی خوراک لے بھی لی تھی جبکہ ۲۰؍ فیصد لوگوں نے بوسٹر خوراک بھی لی تھی۔ موصولہ اطلاع کے مطابق ۹؍ کروڑ لوگ ایسے ہیں جنہیں بوسٹر خوراک لینے کا اہل قرار دیا گیا تھا لیکن انہوں نے نہیں لیا۔ لوگوں کے مذکورہ بالا ویکسین نہ لینے اور اس سے پرہیز کرنے کے سبب ریاستی محکمہ صحت کو اب تک ۲۶؍ کروڑ مالیت کی ۱۳؍ لاکھ ۴۰؍ ہزار ویکسین کو جن کے استعمال کی میعاد ختم ہوگئی ہے ،ضائع کرنا پڑا ہے۔