ایم آئی ایم نے ضلع کلکٹر کو میمورنڈم دے کر رکن اسمبلی کی گرفتاری کا مطالبہ کیا تو سماج وادی پارٹی کارکنان نے رانے کی تصویر پر جوتے مارے

 بد زبان  رکن اسمبلی نتیش رانے کی جانب سے مسلما نوں کو مسجد میںگھس کر مارنے کی دھمکی دینے  پر ہر سمت ناراضگی ہے۔ اور جگہ جگہ احتجاج ہو رہے ہیں۔ منگل کی شام دھولیہ میں بھی  سماج وادی پارٹی اور مجلس اتحاد المسلمین  کی جانب سے الگ الگ طریقے سے احتجاج کئے گئے اور نتیش رانے کے خلاف معاملہ درج کرکے اسے گرفتار کرنے کا مطالبہ کیا گیا۔ 
  ایم آئی ایم کا ضلع کلکٹر کے دفتر کے پاس مظاہرہ 
           دھولیہ کے رکن اسمبلی فاروق شاہ کی ہدایت پر مجلس اتحاد المسلمین کے کارکنان نے  ضلع کلکٹر دفتر  کے سامنے احتجاج کیا اور نتیش رانے کے خلاف کیس درج کر کے  اسے فوراً گرفتار کرنے کا مطالبہ کیا ۔ بصورت دیگر سڑک پر اتر کر ریاست گیر احتجاج کا انتباہ دیا۔ اس موقع پر ایم آئی ایم کے  ضلع صدر ناصر پٹھان ، خاتون ونگ کی ضلع صدر دیپا میڈم اور اسٹوڈنٹس ونگ کے ضلع صدر نذر پٹھان نے میڈیا سے بات کرتے ہوئے کہا کہ آئے دن نتیش رانے مسلمانوں کے خلاف زہر افشانی کرتا دکھائی دیتا ہے لیکن حکومت اسکے خلاف کوئی کارروائی نہیں کرتی جسکی وجہ سے اسکے حوصلے بلند ہیں۔ اب  وہ مسلمانوں کو مسجد میں گھس کر مارنے کی دھمکی دے رہا ہے ۔‘‘ انہوں نے الزام لگایا کہ’’عنقریب اسمبلی الیکشن  ہونے والے ہیں اور بی جے پی کو شکست کا ڈر ستا رہا ہے اسی لئے نتیش رانے کے ذریعے ریاست میں فساد بھڑکانے کی کوشش کی جا رہی ہے۔ اگر حکومت نے نتیش رانے کو گرفتار نہیں کیا تو ریاست گیر احتجاج کیا جائے گا ۔  اس کے بعد ضلع کلکٹر کو میمورنڈم دے کر نتیش کی گرفتاری کا مطالبہ کیا گیا۔ اس وفد میں ناصر پٹھان  کے علاوہ  غنی ڈالر ، دیپا میڈم ، نذر خان ، ادریس شیخ ، قادر انصاری ، سمیر مرزا ، ناصر شاہ فائر ، ڈاکٹر شرافت علی ، ڈاکٹر پوار ، سعود سردار ، پیارے لال پنجاری  ،  توقیر رضا ، رفیق قاضی ، رفیق شاہ پٹھان ، سعود عالم ، ہاشم انصاری ، فیصل انصاری ، زبیر شاہ ،  موجود تھے ۔ 
 سماج وادی کارکنان نے تصویروں پر جوتے مارے
         دوسری طرف سماج وادی پارٹی نے بھی رانے کے متنازع بیان پر شدید اعتراض جتایا اور شہر کے لوک مانیہ چوک پر واقع سنت کبیر کے مجسمے کے پاس   رانے کے پوسٹر کو چپل، جوتے مار کر  احتجاج کیا ۔            اس ضمن میں جمیل منصوری نے کہا  کہ بی جے پی نے مہاراشٹر کا امن و امان خراب کرنے کی غرض سے نتیش رانے نامی ڈیڑھ فٹ کا منافرتی وائرس  چھوڑا ہے۔یہ مسلمانوں کو مسجد میں گھس کر مارنے کی دھمکی دے رہا ہے ،پولیس افسران کے تعلق سے نازیبا الفاظ استعمال کر رہا ہے۔ اگراسکے خلاف فوری کارروائی نہیں کی گئی تو وہ  مہاراشٹرمیں نفرت کی آگ لگا کر فساد برپا کردے گا۔          امین پٹیل نے کہا کہ بی جے پی کواسمبلی الیکشن  میں اپنی ہار واضح نظر آرہی ہے۔اسی لئے رانے جیسے سپاری باز کو کھلی چھوٹ دے رکھی ہے۔سماج وادی کے وفد نے ضلع انتظامیہ اورپولیس انتظامیہ سے مانگ کی ہے کہ وہ کسی کے دبائو میں نہ آئے  اورقانون کو ہاتھ میں لینے والے رانے جیسے شرپسندوں کے خلاف ایف آئے آر درج کرکے اسے فورا گرفتار کر یں۔ اور اگر ایسا نہ کیا گیا تو بڑے پیمانے پر احتجاج کیا جائے گا۔