۴۲۲؍ گڑھوں کو بھرنے کا دعویٰ۔گنیش اتسو کے پیش نظر ٹریفک پولیس نے تمام گڑھوں کو بھرنے کی ہدایت دی۔

 مانسون کے دوران سڑکوں کے جان لیوا گڑھوں سے شہریوں کو نجات دلانے کیلئے میرابھائندر میونسپل کارپوریشن (ایم بی ایم سی) کی جانب سے شروع کیا گیا ڈیجیٹل اقدام ’پاٹ ہول رجسٹریشن اینڈ ریپیئرنگ سسٹم‘ ایپ کافی موثر ثابت ہو رہا ہے۔

شہری انتظامیہ کی جانب سے یکم اگست سے شروع کئے گئے اس نظام کے تحت  اندرون  ایک ماہ ۱۰۵۴ ؍ شکایتیں موصول ہوئیں جن میں سے ۴۲۲ ؍ گڑھوں کو بھردیا گیا جبکہ  ۱۸۶  ؍مقامات پر مرمت کا کام جاری ہے۔ اس  ایپ کی خاص بات یہ ہے کہ شہری گڑھے کی تصویر اور گوگل لوکیشن براہ راست ایپ پر اپ لوڈ کرسکتے ہیں جس کے بعد متعلقہ وارڈ کی ٹیم کو فوری اطلاع مل جاتی ہے۔ مرمت کا کام مکمل ہوتے ہی شہری کو ایپ کے ذریعے ہی اطلاع دے دی جاتی ہے۔

یہ بھی پڑھئے:اسرائیل سے۳؍ برسوں سے۱۳۷۰؍ سے زائد ڈاکٹر بیرونِ ملک منتقل، برین ڈرین کا خطرہ

میونسپل کارپوریشن کی رپورٹ کے مطابق ۴۴۲ ؍گڑھے بلدیہ کے دائرہ اختیار سے باہر  ہیں جو ایم ایم آر ڈی اے اور این ایچ اے آئی کے تحت آنے والی قومی شاہراہوں پر ہیں  جن کی اطلاع متعلقہ محکموں کو دے دی گئی ہے۔

دریں اثناء گنیش اتسو کے پیش نظر ٹریفک پولیس نے سخت رخ اختیار کیا ہے۔ پولیس نے ایم ایم آر ڈی اے اور این ایچ اے آئی کو باضابطہ نوٹس جاری کرتے ہوئے تمام گڑھوں کو فوری طور پر بھرنے کی ہدایت دی ہے۔ پولیس نے واضح طور پر متنبہ کیا ہے کہ اگر سڑکوں کے گڑھوں کے سبب کوئی حادثہ یا جانی نقصان ہوتا ہے تو ذمہ دار ایجنسی اور متعلقہ ٹھیکیدار کے خلاف براہ راست کیس درج کیا جائے گا۔