امریکہ میں حکیم جیفریز کو ایوانِ نمائندگان کا اسپیکر منتخب کرنے کی مخالفت میں آن لائن مہم زور پکڑ رہی ہے، جس پر ۶؍ لاکھ ۶۶ ؍ہزار سے زائد افراد دستخط کر چکے ہیں۔ پٹیشن میں ڈیموکریٹک ارکان سے مطالبہ کیا گیا ہے کہ وہ جنوری ۲۰۲۷ء میں نئے اسپیکر کے انتخاب کے دوران کسی متبادل امیدوار کی حمایت کریں۔

امریکی ایوانِ نمائندگان کے ڈیموکریٹک ارکان سے مطالبہ کیا گیا ہے کہ وہ جنوری ۲۰۲۷ء میں نئی کانگریس کے اجلاس کے موقع پر ایوان کے اسپیکر کے عہدے کیلئے حکیم جیفریز کے حق میں ووٹ نہ دیں۔ اس مطالبے کی حمایت میں آن لائن پٹیشن پر اب تک ۶ ؍لاکھ ۶۶؍ ہزار سے زائد افراد دستخط کر چکے ہیں۔ یہ پٹیشن ۳؍ ستمبر کو نکول وِٹڈ نے ’چینج ڈاٹ آرگ‘ پر شروع کی تھی۔ اس میں ۱۲۰؍ویں کانگریس کے تمام نئے ارکان سے اپیل کی گئی ہے کہ وہ موجودہ ڈیموکریٹک لیڈر حکیم جیفریز کو مسترد کرتے ہوئے کسی دوسرے امیدوار کا انتخاب کریں۔ پٹیشن میں کہا گیا ہے کہ ’’ڈیموکریٹس کو انتخاب کا موقع ملنا چاہئے۔ ‘‘ اس میں اسپیکر کے انتخاب کیلئے مسابقتی اور شفاف انتخابی عمل پر زور دیا گیا ہے۔

یہ بھی پڑھئے: ٹیمپل محض فٹنس ٹریکر ہے، طبی آلہ نہیں: ڈاکٹروں کے سوالات پر گوئل کا جواب

پٹیشن کے مطابق، اسپیکر کو پارٹی کی قیادت کے بجائے ڈیموکریٹک ووٹروں کی نمائندگی کرنی چاہئے۔ اس مقصد کیلئےقانون سازوں پر زور دیا گیا ہے کہ وہ ووٹ دینے سے قبل حکیم جیفریز کی عوامی کارکردگی، پالیسی موقف، انتخابی مہم کے عطیہ دہندگان کے ریکارڈ اور قیادت کا جائزہ لیں۔ پٹیشن میں ایوانِ نمائندگان کے دیگر ڈیموکریٹک ارکان کی بھی حوصلہ افزائی کی گئی ہے کہ وہ اسپیکر کے عہدے کیلئے اپنی امیدواری پیش کریں کیونکہ اس انتخاب کا نتیجہ ابھی طے نہیں ہوا ہے۔ اب تک اس آن لائن پٹیشن پر مجموعی طور پر ۶؍ لاکھ ۶۶؍ ہزار ۲۵؍ افراد دستخط کر چکے ہیں۔