مہاراشٹر پبلک سروس کمیشن کے چیئرمین کا اعلان، ۲۱؍ دنوں میں نتائج، سال کے آخر تک بھرتی کا عمل مکمل کرنے کا ہدف۔

نیٹ اور ٹی وائی بی کام جیسےامتحانات کے پیپر لیک ہونے کے معاملات سے سبق سیکھتے ہوئے مہاراشٹر پبلک سروس کمیشن ( ایم پی ایس سی ) نے اپنے تمام ابتدائی امتحانات اب کمپیوٹر پر مبنی ٹیسٹ ( سی بی ٹی )پر منعقد کرنے کا اعلان کیا ہے۔کمیشن کی جانب سے یہ بھی یقین دہانی کرائی گئی ہے کہ امتحان کے  ۲۱؍ دنوں میں نتائج جاری کر دیئے جائیں گے، اتنا ہی نہیںبلکہ سال کے آخر تک بھرتی کا عمل مکمل کرنے کا ہدف طے کیا گیا ہے۔ چیئرمین وویک بھیمنوار نے جمعہ کومہاراشٹر پبلک سروس کمیشن کے دفتر میں میڈیا سے بات چیت کرتے ہوئے یہ معلومات  فراہم کیں۔

انہوں نے واضح کیا کہ کمیشن نے امتحانات میں تاخیر کو کم کرنے اور بھرتی کے عمل کو وقت پر مکمل کرنے کیلئے وسیع پیمانے پر اصلاحات شروع کی ہیں۔ اس پریس کانفرنس میں مہاراشٹر پبلک سروس کمیشن کے سیکریٹری مہندر ہرپالکر اور امتحانی کنٹرولر سریتا بنڈیکر دیشمکھ موجود تھے۔

یہ بھی پڑھئے: این سی پی نے ثنا ملک کے تین طلاق سے متعلق بیان سے لاتعلقی ظاہر کی

چیئرمین نے کہا کہ اس سے قبل امتحانات کے نتائج اور اگلے مراحل میں تاخیر کی وجہ سے امیدواروں کو مشکلات کا سامنا کرنا پڑتا تھا۔ اس صورتحال کو بدلنے کیلئے کمیشن نے ابتدائی امتحانات کے نتائج کا اعلان۲۱؍دنوں میں کرنے کا منصوبہ بنایا ہے۔ انہوں نے کہا کہ حال ہی میں اعلان کردہ ریاستی خدمات کے ابتدائی امتحان کے نتائج صرف۲۲؍ دنوں میں جاری ہوئے ہیں اور اس کے بعد تمام ابتدائی امتحانات کے نتائج کا اعلان۲۱؍دنوں کے اندر کرنے کی کوشش کی جائے گی۔اس کے علاوہ کمیشن نے اپنی بھرتی کے عمل کو اسی سال مکمل کرنے کا ہدف مقرر کیا ہے جس سال امتحان منعقد ہوتا ہے۔ انٹرویو کے ساتھ اسامیوں کیلئے انتخاب کا عمل۹؍تا ۱۱؍ ماہ میں مکمل کیا جائے گا جبکہ صرف تحریری امتحان والی اسامیوں کا عمل۶؍ تا ۷؍ ماہ مکمل کیا جائے گا۔