• Mon, 16 November, 2026
  • EPAPER

Inquilab Logo Happiest Places to Work

ممبئی: پرنس ولیم اور کیٹ نے سچن تینڈولکر کے ساتھ گلی کرکٹ کھیلا

Updated: November 16, 2026, 2:32 PM IST | Mumbai

شاہی جوڑے کا تین روزہ ہندوستانی دورہ ممبئی کے بالارڈ اسٹیٹ سے شروع، ناگپاڑہ کی اسکول طالبات کے ساتھ کرکٹ کھیلی، ولیم نے پہلے بلے بازی کی پھر کیٹ اور سچن کو گیندیں کرائیں؛ مٹی کے کلہڑ میں کٹنگ چائے اور ڈھول تاشے سے روایتی استقبال بھی ہوا۔

Prince William and Princess Kate in Mumbai, with Sachin Tendulkar and students. Photo: PTI
ممبئی میں پرنس ولیم اور شہزادی کیٹ، سچن تینڈولکر اور طلبہ کے ساتھ۔ تصویر: پی ٹی آئی

برطانیہ کے پرنس ولیم اور شہزادی کیٹ نے اپنے تین روزہ ہندوستانی دورے کا آغاز ممبئی میں کرکٹ کے میدان سے کیا، جہاں انہوں نے سابق ہندوستانی کرکٹر سچن تینڈولکر اور ناگپاڑہ کی اسکول طالبات کے ساتھ گلی کرکٹ کھیلی۔ پیر کی صبح بالارڈ اسٹیٹ کے علاقے این مرارجی روڈ پر منعقدہ اس تقریب میں شاہی جوڑے نے روایتی شاہی پروٹوکول سے ہٹ کر بلے اور گیند کے ساتھ وقت گزارا۔ پرنس ولیم نے پہلے بلے بازی کی، پھر شہزادی کیٹ کو گیندیں کرائیں اور بعد میں سچن تینڈولکر کو بھی بولنگ کی۔ اس موقع پر مقامی موسیقاروں نے ڈھول تاشے کے ساتھ ان کا استقبال کیا، جبکہ مہمانوں کو مٹی کے کلہڑ میں ممبئی کی مشہور کٹنگ چائے بھی پیش کی گئی۔ یہ تقریب ممبئی کے تاریخی بالارڈ اسٹیٹ میں منعقد ہوئی، جہاں پرانی پتھر کی عمارتیں اور ان کے چھوٹے بالکونیاں اس علاقے کو نوآبادیاتی دور کی ایک الگ شناخت دیتی ہیں۔ سچن تینڈولکر نے شاہی جوڑے کا استقبال کیا اور انہیں کرکٹ کے کھیل میں شامل کیا۔ گلی کرکٹ ممبئی سمیت ہندوستان کے کئی شہروں میں کھیلی جانے والی ایک مقبول شکل ہے، جس میں محدود جگہ کے باعث تنگ گلیوں یا چھوٹے میدانوں میں بلے بازی اور گیند بازی کی جاتی ہے۔ اس کھیل کے ذریعے شاہی جوڑے کو ہندوستان کی روزمرہ زندگی اور کرکٹ سے عوام کی وابستگی کا تجربہ کرایا گیا۔ 

اس تقریب میں شریک اسکول طالبات کے لیے بھی یہ ملاقات غیر متوقع تھی۔ ناگپاڑہ کے انجمن اسلام کے بیگم شریفہ کالسیکر گرلز انگلش اسکول کی آٹھویں جماعت کی طالبات بتول فاطمہ شیخ اور امِ ہانی نے بتایا کہ اساتذہ نے انہیں ۱۶؍ نومبر کو ایک تقریب میں شرکت کی دعوت دی تھی، لیکن یہ نہیں بتایا تھا کہ وہاں کون آنے والا ہے۔ طالبات نے دیوالی کی تعطیلات کے دوران دلچسپی کی بنیاد پر اپنا نام درج کرایا تھا۔ جب انہیں بتایا گیا کہ مہمان برطانیہ کے پرنس آف ویلز ہیں تو بتول فاطمہ حیران ہوئیں اور مسکراتے ہوئے کہا، ’’اوہ! میں نے ان کے بارے میں پڑھا ہے۔‘‘ سچن تینڈولکر اور شاہی جوڑے کے درمیان کرکٹ پر گفتگو بھی ہوئی۔ سچن ہاتھوں کے اشاروں سے کھیل کے مختلف واقعات اور لمحات سمجھاتے رہے، جبکہ ولیم اور کیٹ دلچسپی سے ان کی باتیں سنتے اور مسکراتے رہے۔ پرنس ولیم نے بلے بازی کے بعد گیند بازی بھی آزمائی اور پہلے کیٹ کو، پھر سچن کو گیندیں کرائیں۔ اس موقع پر سابق ہندوستانی کپتان نے بھی بلے کے ساتھ اپنی مہارت دکھائی۔ ولیم نے سفید قمیص کے اوپر گہرے نیلے رنگ کی بغیر آستین والی نہرو طرز کی جیکٹ پہن رکھی تھی، جبکہ شہزادی کیٹ ہلکے سبز رنگ کے بلیزر اور سفید لباس میں نظر آئیں۔ 

کرکٹ کے بعد شاہی جوڑے نے ایک مقامی چائے کے اسٹال پر کلہڑ میں کٹنگ چائے کا لطف اٹھایا۔ درخت کے نیچے قائم اس اسٹال پر انہیں مٹی کے چھوٹے برتنوں میں چائے پیش کی گئی۔ یہ ممبئی کی روزمرہ شہری زندگی کی ایک مانوس جھلک تھی، جسے دورے کے پروگرام میں شامل کیا گیا تھا۔ استقبال کے دوران ڈھول تاشے کی روایتی دھنوں نے تقریب کو مقامی رنگ دیا۔ پرنس ولیم اور شہزادی کیٹ کا یہ ہندوستان کا دوسرا سرکاری دورہ ہے۔ اس سے قبل دونوں اپریل ۲۰۱۶ء میں ہندوستان آئے تھے اور اس وقت انہوں نے وزیراعظم نریندر مودی سے بھی ملاقات کی تھی۔ موجودہ دورے کا مرکزی مقصد ممبئی میں منعقد ہونے والی ۲۰۲۶ء کی ارتھ شاٹ پرائز تقریب میں شرکت ہے۔ یہ ایوارڈز پہلی مرتبہ ہندوستان میں منعقد ہورہے ہیں اور اس سال ان کی چھٹی تقریب ممبئی میں ۱۷؍ نومبر کو ہوگی۔ اس کے بعد شاہی جوڑا ۱۸؍ نومبر کو نئی دہلی جائے گا، جہاں ان کی وزیراعظم نریندر مودی سے ملاقات متوقع ہے۔ 

ارتھ شاٹ پرائز کا آغاز پرنس ولیم نے ۲۰۲۰ء میں دس سالہ منصوبے کے طور پر کیا تھا۔ اس کا مقصد ماحولیاتی تبدیلی اور کرۂ ارض کو درپیش دیگر مسائل کے ایسے عملی حل تلاش کرنا ہے جنہیں بڑے پیمانے پر نافذ کیا جاسکے۔ اس ایوارڈ کے تحت ہر سال پانچ فاتح منصوبوں کو ایک ایک ملین پاؤنڈ کی رقم دی جاتی ہے، تاکہ وہ اپنے کام کو مزید وسعت دے سکیں۔ انعام کے شعبوں میں قدرتی ماحول کا تحفظ، صاف ہوا، سمندروں کی بحالی اور زمین کے قدرتی نظام کی حفاظت جیسے موضوعات شامل ہیں۔ اس سال کے ۱۵؍ فائنلسٹ ستمبر میں سامنے آئے تھے۔ ممبئی میں قیام کے دوران شاہی جوڑے کے پروگرام میں شہر کی میٹرو کا سفر اور فلمی دنیا سے وابستہ شخصیات سے ملاقاتیں بھی شامل ہیں۔ ارتھ شاٹ پرائز کی تقریب میں سچن تینڈولکر کے علاوہ اداکارہ عالیہ بھٹ، اداکار رامی ملک اور برطانوی موسیقی گروپ ’ٹیک دیٹ‘ کی شرکت بھی متوقع ہے۔ یہ گروپ پہلی مرتبہ ہندوستان میں پرفارم کرے گا۔ ممبئی کے بعد نئی دہلی میں وزیراعظم سے ملاقات کے ساتھ اس دورے کا اگلا مرحلہ مکمل ہوگا۔ 

سچن تینڈولکر اس تقریب میں محض ایک کرکٹ لیجنڈ کے طور پر شریک نہیں تھے، بلکہ ان کی فاؤنڈیشن محروم طبقات کے بچوں کے لیے کھیل، صحت اور تعلیم کے شعبوں میں کام کرتی ہے۔ ناگپاڑہ کی طالبات کے ساتھ شاہی جوڑے کی کرکٹ اسی وسیع تر پیغام کا حصہ تھی کہ کھیل مختلف پس منظر سے تعلق رکھنے والے لوگوں کو ایک جگہ جمع کرنے اور بچوں کے لیے نئے مواقع پیدا کرنے کا ذریعہ بن سکتا ہے۔

متعلقہ خبریں

This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK